ޖަރުމަންގެ ބަޔާން މިއުނިކްގެ ވަގުތީ ކޯޗު ހަންސީ ފްލިކްގެ އެއްބަސްވުން އާކޮށްފި އެވެ.

މި ސީޒަނުގައި ހަންސީ ފްލިކް އެންމެ ފުރަތަމަ ބަޔާނާ ގުޅުނީ ކްރޮއޭޝިއާގެ ނިކޯ ކޮވަޗްގެ އެސިސްޓަންޓެއްގެ ގޮތުގައެވެ. އެކަމަކު މިދިޔަ އަހަރުގެ ނޮވެމްބަރު ކުރީކޮޅުގައި ބަޔާންގެ ކޯޗުކަމުން ނިކޯ ކޮވަޗް ވަކިކުރިއިރު، އޭގެ ފަހުން އެ ޓީމަށް އިރުޝާދުދެމުން އަންނަނީ ހަންސީ ފްލިކް އެވެ.

އެންމެ ފުރަތަމަ ބަޔާނުން ނިންމީ މި ސީޒަނުގެ ނިޔަލަށް އެ ޓީމުގެ ކޯޗަކަށް ފްލިކް ބަހައްޓާށެވެ. އެއަށްފަހު ސީޒަން ނިމުމުން އެ ޓީމަށް ކުރިން އިރުޝާދުދިން މެންޗެސްޓާ ސިޓީގެ މިހާރުގެ ކޯޗު ޕެޕް ގާޑިއޯލާ ނުވަތަ ޓޮޓެންހަމަށް ކޯޗުކަން ކޮށްދިނީ މައުރީޒިއޯ ޕޮޗެޓީނޯ ގެންނަން ބަޔާނުން މަސައްކަތްކުރި ކަމަށް ރިޕޯޓުތައް ބުނެއެވެ.

އެކަމަކު ފްލިކްގެ އިރުޝާދުގެ ދަށުން ބަޔާނުން ރަނގަޅު ނަތީޖާތަކެއް ނެރެމުން އަންނައިރު، މިހާރު ވަނީ 2023 ވަނަ އަހަރުގެ ޖޫން މަހުގެ ނިޔަލަށް ފްލިކްގެ އެއްބަސްވުން އާކޮށްފައެވެ. މިހާތަނަށް ފްލިކްގެ އިރުޝާދުގެ ދަށުން ބަޔާނުން 21 މެޗު ކުޅެފައިވާއިރު، 18 މެޗުން ވަނީ މޮޅުވެފައެވެ.

ބަޔާންގެ ޗެއާމަން ކާލް-ހެއިންޒް ރުމެނިގާ ވިދާޅުވީ ފްލިކާ މެދު މުޅި ޓީމުވެސް ހިތްހަމަޖެހޭ ކަމަށާއި، އެހެންކަމުން ދިގު މުއްދަތަކަށް އޭނާ ޓީމުގައި ބަހައްޓަން ބޭނުންވާ ކަމަށެވެ.

މިހާރު މުޅި ދުނިޔޭގައި ހަލުވިކަމާއެކު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން ޖަރުމަން ލީގުވެސް މެދުކަނޑާލާފައިވާއިރު، އެންމެ ފަހުގެ ޗެމްޕިއަން ބަޔާން އޮތީ ތާވަލުގެ އެއްވަނައިގައި 55 ޕޮއިންޓާއެކު އެވެ. ދެވަނައިގައި އޮތް ބޮރޫޝިއާ ޑޯޓްމުންޑަށް ލިބިފައިވަނީ 51 ޕޮއިންޓެވެ.