ރެއާލުން އަނެއްކާވެސް ފުރުސަތު ނަގާލައިފި

ސްޕެނިޝް ލީގުގައި ރެއާލް ބެޓިސް އަތުން ބަލިވެ، ތާވަލުގެ ދެވަނައަށް ރެއާލް މެޑްރިޑް ވެއްޓިއްޖެ އެވެ.

ލީގުގައި އާދީއްތަ ދުވަހުގެރޭ ރަށުން ބޭރުގައި ކުޅުނު މެޗުން ރެއާލް ބަލިވީ 2-1 އިންނެވެ. އާދީއްތަ ދުވަހުގެރޭގެ މެޗުން ރެއާލް ބަލިވިއިރު، ވާދަވެރި ބާސެލޯނާއިން ވަނީ ހޮނިހިރު ދުވަހުގެރޭ ރެއާލް ސޮސިއެޑާޑް 1-0 އިން ބަލިކޮށް ތާވަލުގެ އެއްވަނައަށް ޖެހިލާފައެވެ.

މި ނަތީޖާތަކާއެކު ބާސާ އެއްވަނައިގައި އޮތީ ކުޅުނު 27 މެޗުން 58 ޕޮއިންޓާއެކުއެވެ. ދެވަނައިގައި އޮތް ރެއާލަށް ލިބިފައިވަނީ 27 މެޗުން 56 ޕޮއިންޓެވެ.

ބެޓިސްގެ ދަނޑުގައި އާދީއްތަ ދުވަހުގެރޭ ކުޅުނު މެޗުގައި ފުރަތަމަ ލަނޑު ޖަހާ ލީޑު ނެގީވެސް އެޓީމުންނެވެ. މެޗުގެ 40 ވަނަ މިނެޓުގައި ނަބީލް ފެކީރް ދިން ބޯޅައަކުން މި ލަނޑު އެޓީމަށް ކާމިޔާބުކޮށްދިނީ ސިޑްނެއީ ރެޝެލް އެވެ.

އެކަމަކު ފުރަތަމަ ހާފު ނިމުމުގެ ކުރިން ރެއާލުން ވަނީ ނަތީޖާ އެއްވަރުކޮށްފައެވެ. އިތުރު ވަގުތުގައި ލިބުނު ޕެނަލްޓީއަކުން މި ލަނޑު ކާމިޔާބުކޮށްދިނީ ކަރިމް ބެންޒެމާ އެވެ. މި ޕެނަލްޓީއަކީ އޭރިއާ ތެރެއިން ރެއާލްގެ ޑިފެންޑަރު މާސެލޯ އަށް ފައުލްކުރުމުން ރެފްރީ ދިން ޕެނަލްޓީއެކެވެ.

ބެޓިސް އިން މި މެޗުގައި ދެވަނަ ފަހަރަށް ލީޑު ނެގީ މެޗު ނިމެން 8 މިނެޓަށް ވެފައިވަނިކޮށް ކްރިސްޓިއަން ޓެލޯ ޖެހި ލަނޑުންނެވެ.

ލީގުގައި އާދީއްތަ ދުވަހުގެރޭ ކުޅުނު މެޗުން ބެޓިސް އަތުން ބަލިވެ ތާވަލުގެ ދެވަނައަށް ރެއާލް ވެއްޓުނުއިރު، ލީގުގައި ދެން އެޓީމުން މެޗެއް ކުޅޭނީ މި މަހުގެ 14 ވަނަ ދުވަހު އެވެ. އެ ދުވަހު އަމިއްލަ ދަނޑުގައި ރެއާލް ނުކުންނާނީ އެއިބާއާ ދެކޮޅަށެވެ.