އިނގިރޭސި އެފްއޭ ކަޕްގެ ހަތަރުވަނަ ބުރުގެ ރީޕްލޭ މެޗުގައި އަންގާރަ ދުވަހުގެރޭ ތިންވަނަ ޑިވިޝަނުގެ ޝްރޫސްބަރީ ޓައުން 1-0 އިން ބަލިކޮށް ފަސްވަނަ ބުރަށް ލިވަޕޫލް ދަތުރުކޮށްފި އެވެ.

އެފްއޭ ކަޕްގެ ހަތަރުވަނަ ބުރުގައި ލިވަޕޫލުން އަމިއްލަ ދަނޑުގައި ރީޕްލޭ މެޗެއް ކުޅެން ޖެހުނީ ފުރަތަމަ މެޗުގައި ޝްރޫސްބަރީ ދަނޑުގައި 2-2 އިން އެއްވަރުވުމުންނެވެ.

ރޭ ކުޅުނު މެޗުގައި ލިވަޕޫލުން ބޭނުންކޮށްފައިވަނީ އެޓީމުގެ 23 އަހަރުން ދަށުގެ ޓީމެވެ. އެގޮތަށް އެޓީމުން ނިންމީ މިއީ އިނގިރޭސި ޕްރިމިއަރ ލީގުގެ ފިނި މޫސުމުގެ ޗުއްޓީ ކަމަށް ވުމުން ސީނިއަރ ޓީމުގެ ކުޅުންތެރިންނަށް ޗުއްޓީ ދިނުމަށެވެ.

އަންގާރަ ދުވަހުގެރޭގެ މެޗުގައި ކުޅުނު ލިވަޕޫލްގެ ޒުވާން ޓީމަކީ ލިވަޕޫލްގެ ތާރީޚުގައިވެސް ނުކުތް އެންމެ ޒުވާން ޓީމެވެ. މި މެޗުގައި ޒުވާން ކުޅުންތެރިން ވަނީ މޮޅު ކުޅުމެއް ދައްކާފައެވެ. އަދި މި މެޗުގައި ޓީމަށް އިރުޝާދު ދީފައިވަނީ 23 އަހަރުން ދަށުގެ ޓީމުގެ ކޯޗު ނީލް ކްރިޗްލީ އެވެ. މި މެޗުން މޮޅުވުމުން ސީނިއަރ ޓީމުގެ ކޯޗު ޔާގެން ކްލޮޕް ވަނީ ޒުވާން ޓީމުގެ ކުޅުންތެރިންނާއި އޮފިޝަލުންނަށް މަރުހަބާ ކިޔާފައެވެ.

ލިވަޕޫލްގެ ދަނޑުގައި ކުޅުނު މި މެޗުގައި ފެނިގެންދިޔަ ހަމައެކަނި ލަނޑަކީ 75 ވަނަ މިނެޓުގައި ޝްރޫސްބަރީގެ ޑިފެންޑަރު ރޯ ޝޯން ވިލިއަމްސް އަތުން ބައިކޮޅަށް ވަން ގޯލެކެވެ.

ޒުވާން ޓީމުގެ އެހީއާއެކު ލިވަޕޫލް ފަސްވަނަ ބުރަށް ދަތުރުކުރިއިރު، އެފްއޭ ކަޕްގެ ފަސްވަނަ ބުރުގައި ލިވަޕޫލުން ރަށުން ބޭރުގައި ކުޅޭނީ ޗެލްސީއާ ދެކޮޅަށެވެ.