ޖޯނަސް ބްރަދަރސްގެ "ވަޓް އަ މޭން ގޮޓަ ޑޫ"ގެ ވީޑިއޯގައި ވެސް ތިން ބެއިންގެ އަނބިން!
"ވަޓް އަ މޭން ގޮޓަ ޑޫ"ގައި "ރިސްކީ ބިޒްނަސް"، "ގްރީސް" އަދި "ސޭ އެނީތިންގް"ގެ މަންޒަރުތައް ރީކްރިއޭޓް ކޮށްފައިވޭ
\"ވަޓް އަ މޭން ގޮޓަ ޑޫ\"ގެ މަންޒަރެއް
އެމެރިކާގެ މަޝްހޫރު ބޭންޑެއްކަމަށްވާ ޖޯނަސް ބްރަދަރސްގެ އާ ލަވައެއް، ވީޑިއޯއާކު ރިލީޒްކޮށްފިއެވެ.
ތިން ބެއިން ހިމެނޭ މި ބޭންޑްގެ މި އަހަރުގެ ފުރަތަމަ ލަވައަކީ "ވަޓް އަ މޭން ގޮޓަ ޑޫ"އެވެ.
1970 އާއި 1980ގެ ފިލްމުތަކެއްގެ މައްޗަށް ބިނާކޮށް ތައްޔާރުކޮށްފައިވާ މި ވީޑިއޯގައި ނިކް، ޖޯ އަދި ކެވިން ޖޯނަސްގެ އަނބިން ޕްރިޔަންކާ ޗޯޕްރާ، ސޯފީ ޓަރނަރ އަދި ޑޭނިއަލް ޖޯނަސް ފެނިގެންދެއެވެ.
މި ލަވައިގެ ޕްރޮމޯ ފޮޓޯ "ސަޓަޑޭ ނައިޓް ފީވަރ"އިން އިންސްޕަޔަރ ވެފައިވާއިރު، ލަވައިން "ރިސްކީ ބިޒްނަސް"، "ގްރީސް" އަދި "ސޭ އެނީތިންގް"ގެ މަންޒަރު ރީކްރިއޭޓް ކޮށްފައިވެއެވެ.
އެގޮތުން، ނިކް އާއި ޕްރިޔަންކާ "ރިސްކީ ބިޒްނަސް"ގެ މަންޒަރުތަކުން ފެންނައިރު، ޖޯ އާއި ސޯފީގެ ބައިގައި ފެންނަނީ "ގްރީސް"ގެ މަންޒަރުތަކެވެ. އަދި ކެވެންއާއި ޑޭނިއެލް ރީކްރިއޭޓްކޮށްފައިވަނީ "ސޭ އެނީތިންގް"ގެ މަންޒަރުތަކެވެ.
މިއީ ޖޯނަސް ބްރަދަރސްގެ ލަވައަކުން ތިން ބެއިންގެ އަނބިން ފެންނަ ފުރަތަމަ ފަހަރެއް ނޫނެވެ.
2005 ވަނަ އަހަރު ތައާރަފުވި ޖޯނަސް ބްރަދަރސް އޭގެ ފަސް އަހަރު ފަހުން ވަކިވެ އަމިއްލަ ކެރިއަރގެ މަސައްކަތްކޮށްފައިވާއިރު، މި ބޭންޑްވަނީ 2019 ވަނަ އަހަރު އަލުން ގުޅިފައެވެ. އަދި އަލުން ގުޅުމަށްފަހު ރިލީޒްކުރި ފުރަތަމަ ލަވަ، "ސަކަރ"ގައިވެސް ޕްރިޔަންކާ، ސޯފީ އަދި ޑޭނިއަލް ފެނިގެންދެއެވެ.
ޔޫޓިއުބްގައި ހުކުރު ދުވަހު ރިލީޒްކުރި މި ލަވައަށް މިހާތަނަށް 8.8 މިލިއަނަށް ވުރެ ގިނަ ވިއުވަނީ ލިބިފައެވެ.
