ދިރާގު ދިވެހި ޕްރިމިއަރ ލީގުގަ ކްލަބު އީގަލްސްއާއި ނިލަންދޫ ބައްދަލުކުރި މެޗު ފަސޭހަ ކަމާއެކު އީގަލްސްއިން ކާމިޔާބުކޮށްފިއެވެ.
ގަލޮޅު ރަސްމީ ފުޓުބޯޅަ ދަނޑުގަ ކުޅުނު މި މެޗު އީގަލްސްއިން ކާމިޔާބުކުރީ 4-2 ގެ ނަތީޖާއަކުންނެވެ.
ފޯރިގަދަ ކުޅުމެއް ފެނިގެންދިޔަ މި މެޗުގެ 10 ވަނަ މިނެޓުގައި އީގަލްސްއިން ވަނީ ލަނޑު ޖަހާ ލީޑު ނަގާފައެވެ. މި ލަނޑު އީގަލްސްއިން ކާމިޔާބުކުރީ ނިލަންދޫ ކުޅުންތެރިން އޭރިޔާ ތެރެއިން ހައިޝަމްއަށް ކުރި ފައުލަކާއި ގުޅިގެން ލިބުނު ޕެނަލްޓީއަކުން އަހުމަދު ރިޒްވާން (ރިޒޭ) އެވެ. މި ލަނޑަށްފަހު ވެސް އީގަލްސް ކުޅުންތެރިން ވަނީ ނިލަންދޫގެ ހާފަށް ބާރު ބޮޑުކޮށް ގިނަ ހަމަލާތަކެއް އެޓީމުގެ ގޯލަށް ފޮނުވާލާފައެވެ. އެގޮތުން މެޗުގެ 13 ވަނަ މިނެޓުގައި ހަސަން ރާއިފު އަހުމަދު (ހަންނަ) އަށް ވަނީ ރަނުގެ ފުރުސަތެއް ލިބި ބޭކާރުވެފައެވެ. އޭނާ ފޮނުވާލި ހަމަލާ ގޯލު ރޮނގު މަތީ ހުރެ ނިލަންދޫގެ ޑިފެންޑަރ ސައްދާމް ހުސެއިން ވަނީ ދިފާއު ކޮށްފައެވެ. މެޗުގެ 35 ވަނަ މިނެޓުގައި ނިލަންދޫއަށް ވަނީ ނަތީޖާ ހަމަހަމަ ކުރުމަށް ފުރުސަތެއް ލިބި ބޭކާރުވެފައެވެ. ނިލަންދޫގެ ބިދޭސީ ކުޅުންތެރިޔާ ޓޮސީކީ އޮކަމާޓޯ އަށް އީގަލްސް ކުޅުންތެރިން އޭރިޔާ ތެރެއިން ކުރި ފައުލަކާ ގުޅިގެން ލިބުނު ޕެނަލްޓީ ވަނީ އީގަލްސްގެ ކީޕަރު ދިފާއު ކޮށްފައެވެ. މެޗުގެ ފުރަތަމަ ހާފު ނިމުމުގެ ކުރިން ނިލަންދޫ އިން ވަނީ ލަނޑު ޖަހާ ނަތީޖާ ހަމަހަމަ ކޮށްފައެވެ. މި ލަނޑު އެޓީމަށް ކާމިޔާބުކޮށް ދިނީ ފަރުހާދު އަހުމަދު (ފަރޭ) ގެ އެހީތެރިކަމާއެކު ޓޮސީކީއެވެ.
މެޗުގެ ދެވަނަ ހާފު ފަށައިގެން ދެ ޓީމުގެ ފަރާތުންވެސް ފެނިގެން ދިޔައީ ހަމަހަމަ ކުޅުމެކެވެ. މެޗުގެ 73 ވަނަ މިނެޓުގައި އީގަލްސްއިން ވަނީ ލަނޑު ޖަހާ މެޗުގެ ލީޑު އަލުން ނަގާފައެވެ. މި ލަނޑު ވެސް އެޓީމަށް ކާމިޔާބުކޮށް ދިނީ ރިޒޭއެވެ. އީގަލްސްގެ ދެވަނަ ލަނޑާއެކު ނިލަންދޫ އިން ކުރިޔަށް ޖެހިލިއެވެ. އެގޮތުން މެޗުގެ 75 ވަނަ މިނެޓުގައި ނިލަންދޫ އިން ވަނީ ލަނޑު ޖަހާ ނަތީޖާ ހަމަހަމަ ކޮށްފައެވެ. މި ލަނޑު އެޓީމަށް ކާމިޔާބުކޮށް ދިނީ ލަމްޕްޓޭ ސެމިއުލްއެވެ. މެޗުގައި އީގަލްސް އިން ކާމިޔާބުކުރި ތިންވަނަ ލަނޑަކީ ނިލަންދޫގެ ކެޕްޓަން ފަރޭ އަތުން ބައިކޮޅަށް ވަތް ލަނޑެކެވެ. މެޗުގެ 84 ވަނަ މިނެޓުގައި އީގަލްސްގެ ރިޒޭ ވަނީ ލަނޑު ޖަހާ އޭނާގެ ހެޓްރިކް ފުރިހަމަކޮށްފައެވެ.
