އިނގިރޭސި ޕްރިމިއާ ލީގުގެ ދެވަނައިގައި އޮތް ލެސްޓާ އާއި ތިން ވަނައިގައި އޮތް މެންޗެސްޓާ ސިޓީ ބައްދަލުކުރި މެޗު ސިޓީ އިން ފަސޭހަ ކަމާއިއެކު ކާމިޔާބުކޮށް އެއް ޕޮއިންޓާ ކައިރިކޮށްފިއެވެ.

ސިޓީގެ އަމިއްލަ ދަނޑުގައި ކުޅުނު މި މެޗު ސިޓީ އިން ކާމިޔާބުކުރީ 3-1 ގެ ނަތީޖާ އަކުންނެވެ.

މެޗު ފަށައިގެން ލެސްޓާއިން ސިޓީގެ ގޯލަށް ނުރައްކާކޮށް ގިނަ ހަމަލާތަކެއް ފޮނުވައިލައިފައިވާއިރު މެޗުގެ 22 ވަނަ މިނެޓުގައި ލެސްޓާއިން ވަނީ ލަނޑުޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ ޖެމީ ވާރޑީ އެވެ. މި ލަނޑަށްފަހު މެންޗެސްޓާ ސިޓީ އިން ވަނީ އެޓީމުގެ ކުޅުން އިތުރަށް ރަނގަޅުކޮށް ލެސްޓާ ސިޓީގެ ގޯލަށް ނުރައްކާ ކޮށްފައެވެ. އެގޮތުން މެޗުގެ 30 ވަނަ މިނެޓުގައި ސިޓީ އިން ވަނީ ލަނޑުޖަހާ ނަތީޖާ ހަމަހަމަ ކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ރިޔާދް މަހްރޭޒް އެވެ. މި ލަނޑަށްފަހުވެސް ސިޓީ އިން ގެންދިޔައީ ލެސްޓަ ސިޓީގެ ގޯލަށް ނުރައްކާ ކުރަމުންނެވެ. އެގޮތުން މެޗުގެ 43 ވަނަ މިނެޓުގައި ސިޓީ އިން ވަނީ އިތުރު ލަނޑެއްޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ އިކޭ ގޯޑިގަން އެވެ.

މި މެޗުގެ ފުރަތަމަ ހާފު ނިމިގެންދިޔައީ 2-1 ގެ ނަތީޖާއަކުން ސިޓީ ކުރީގައި އޮވެގެންނެވެ.

މެޗުގެ ދެވަނަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު މެންޗެސްޓާ ސިޓީ އިން ވަނީ ލެސްޓާ ސިޓީގެ ގޯލަށް ނުރައްކާކޮށްފައެވެ. އެގޮތުން މެޗުގެ 69 ވަނަ މިނެޓުގައި ސިޓީ އިން ވަނީ އިތުރު ލަނޑެއްޖަހާ ލީޑު ފުޅާ ކޮށްފައެވެ. މި ލަނޑު އެޓީމަށް ކާމިޔާބު ކޮށްދިނީ ގެބްރިއަލް ޖީސަސްއެވެ.

މި ނަތީޖާ އާއިއެކު ތާވަލުގެ އެއްވަނައިގައި އެއް މެޗު މަދުންކުޅެ ލިވަރޕޫލް އޮތީ 49 ޕޮއިންޓާއި އެކުގައެވެ. ދެވަނައިގައި ލެސްޓާ ސިޓީ 39 ޕޮއިންޓާއިއެކު އޮތްއިރު ތިންވަނައިގައި ސިޓީ އޮތީ 38 ޕޮއިންޓާއި އެކުގައެވެ. އަދި ތާވަލުގެ ހަތަރު ވަނައިގައި އޮތް ޗެލްސީ އަށް ލިބިފައިވަނީ 29 ޕޮއިންޓެވެ.