ޝަހީބާއި ޒައިނާގެ މައްސަލަ އަނެއްކާވެސް މަޖިލީހުގެ ތަޅުމަށް ފޮނުވާލަނީ
މިގޮތަށް ކޮމެޓީން ފާސްކޮށްފައިވަނީ ކޮމެޓީއަށް ހާޒިރުވެ ތިއްބެވި ހުރިހާ މެމްބަރުންގެ އިއްތިފާގުން
މިނިވަން މުއައްސަސާތަކުގެ ކޮމެޓީ
ބްރޯޑްކާސްޓިންގް ކޮމިޝަން (ބްރޯޑްކޮމް)ގެ ރައީސް މުހައްމަދު ޝަހީބާއި ނައިބު ރައީސް ފާތިމަތު ޒައިނާ މަގާމުން ވަކި ކުރުމާއި ގުޅޭ މައްސަލައިގެ ރިޕޯޓު އަނބުރާ މަޖިލީހުގެ ތަޅުމަށް ފޮނުވާލުމަށް މަޖިލީހުގެ މިނިވަން މުއައްސަސާތަކާބެހޭ ކޮމެޓީއިން ފާސްކޮށްފިއެވެ.
މިގޮތަށް ކޮމެޓީން ފާސްކޮށްފައިވަނީ ކޮމެޓީއަށް ހާޒިރުވެ ތިއްބެވި ހުރިހާ މެމްބަރުންގެ އިއްތިފާގުންނެވެ.
މަޖިލީހުގެ ތަޅުމަށް އަނބުރާ ފޮނުވާލުމަށް ހުށަހަޅުއްވާފައިވަނީ އިނގުރައިދޫ ދާއިރާގެ މެމްބަރު ހަސަން އަހުމަދުއެވެ. މި ހުށަހެޅުއްވުމަށް ތާއީދު ކުރައްވާފައިވަނީ ތިނަދޫ ދެކުނު ދާއިރާގެ މެމްބަރު އަބްދުﷲ ސަނީފްއެވެ.
މަޖިލީހުގެ އާ ގަވާއިދުގައި ބުނާ ހަމަތަކުން ބްރޯޑްކޮމްގެ ރައީސް މުހައްމަދު ޝަހީބާއި ނައިބު ރައީސް ފާތިމަތު ޒައިނާގެ މައްސަލަ، ބަލާ ދިރާސާކޮށް ގޮތެއް ނިންމައި ދިނުމަށް މިނިވަން މުއައްސާތަކާއި ބެހޭ ކޮމެޓީއަށް ފޮނުވާލާފައިވަނީ އަންގާރަ ދުވަހުއެވެ. މިގޮތަށް އަމަލުކުރުމަށް މަޖިލީހުގެ ރައީސް މުހައްމަދު ނަޝީދު ނިންމެވީ މިހާރު މަޖިލީހުން އަމަލު ކުރަމުންދާ ގަވާއިދުގައި ބުނާ ގޮތަށް އަމަލު ކުރުމުގެ ގޮތުންނެވެ.
އިސްލާހު ކުރެވުނު ގަވާއިދުގައި މުސްތަގިއްލު މުއައްސަސާތަކުގެ މެމްބަރުންނާއި މުސްތަގިއްލު މަގާމުތަކުގެ މީހުން ވަކި ކުރުމާއި ބެހޭ މާއްދާގައި ވާގޮތުން މީހަކު ވަކި ކުރުމަށްޓަކައި މަޖިލީހަށް ހުށަހެޅުމުން، އެ މީހެއްގެ ނަން މަޖިލީހުގައި އިއްވާ، ކަމާބެހޭ ކޮމެޓީއަށް ފޮނުވަންޖެހެއެވެ. އަދި އެމީހުން ވަކި ކުރެވޭނީ އެ މައްސަލަ އެ ކޮމެޓީއަކުން ދިރާސާ ކުރުމަށް ފަހު ނިންމާ ނިންމުމަށް އެކުލަވާލެވޭ ރިޕޯޓަގެ މައްޗަށް ބަހުސްކޮށް، ނެގޭ ވޯޓަކަށް ފަހުއެވެ.
