ޕްރިމިއާ ލީގު: ސައުތްހެމްޓަނުން މެންޗެސްޓާ ޔުނައިޓޭޑް މޮޅުވިޔަ ނުދީ ހިފަހައްޓައިފި
1 ސެޕްޓެމްބަރު 2019 | އާދީއްތަ 03:23މި މެޗު އެއްވަރުވީ 1-1 ގެ ނަތީޖާއަކުން
ސައުތްހެމްޓަން އަދި ޔުނައިޓެޑް ބައްދަލުކުރި މެޗުގެ ތެރެއިން
އިނގިރޭސި ޕްރިމިއާ ލީގުގައި ސައުތްހެމްޓަނާއި މެންޗެސްޓާ ޔުނައިޓެޑް ބައްދަލުކުރި މެޗު އެއްވަރު ވެގެން ނިމިއްޖެއެވެ.
ހޮނިހިރު ދުވަހު ހަވީރު މެންޗެސްޓާ ޔުނައިޓެޑް އަދި ސައުތްހެމްޕްޓަން ބައްދަލު ކުރި މެޗު ނިމުނީ 1-1 ގެ ނަތީޖާ އަކުން އެއްވަރުވެގެންނެވެ.
މި މެޗު ފަށައިގެން މެންޗެސްޓާ ޔުނައިޓެޑުން ބޯޅަ ކޮންޓްރޯލު ކޮށްގެން ކުޅުނު އިރު އެޓީމުން ވަނީ މެޗުގެ ދިހަވަނަ މިނެޓުގައި ލަނޑެއްޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ ޖޭމްސްއެވެ.
މި ލަނޑައް ފަހު ވެސް މެންޗެސްޓާ ޔުނައިޓެޑުން ވަނީ މޮޅަށްކުޅެ ސައުތްހެމްޓަމްގެ ގޯލަށް ނުރައްކާ ކޮށްފައެވެ. ނަމަވެސް ސައުތްހެމްޓަން އިން ވަނީ އެޓީމުގެ ޑިފެންސް ރަނގަޅުކޮށް ޔުނައިޓެޑުގެ ހަމަލާތައް ހުއްޓުވައިފައެވެ.
މެޗުގެ ދެވަނަ ހާފުގައި ދެޓީމުގެ ފަރާތުން ވެސް ފެނިގެން ދިޔައީ ހަމަހަމަ ކުޅުމެކެވެ. މި ހާފުގައި ބޯޅަ ކޮންޓްރޯލްކޮށް މޮޅަށް ކުޅެފައިވަނީ ސައުތްހެމްޓަނުންނެވެ. އެގޮތުން ސައުތްހެމްޓަނުން ވަނީ މެޗުގެ 58 ވަނަ މިނެޓުގައި ލަނޑެއް ޖަހާ މެޗުގެ ނަތީޖާ ހަމަހަމަކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ޑެންސޯގެ އެހީތެރިކަމާއިއެކު ވެސްޓަރގާޑްއެވެ.
މި މެޗުން ލިބުނު އެއް ޕޮއިންޓާއެކު މެންޗެސްޓާ ވަނީ ލީގު ތާވަލުގެ ހަތް ވަނަ އަށް ވެއްޓިފައެވެ. ސައުތްހެމްޓަން އޮތީ ލީގު ތާވަލުގެ 13 ވަނައިގައެވެ.
