ޓެރަރިޒަމާއި ދެކޮޅަށް ރާއްޖެއިން ކުރަމުންދާ މަސައްކަތަށް 2.5 މިލިޔަން ޔޫރޯގެ ހިލޭ އެހީއެއް

ޓެރަރިޒަމާއި ހައްދު ފަހަނައެޅުމާއި ދެކޮޅަށް ރާއްޖެއިން ކުރަމުން އަންނަ މަސައްކަތަށް އެއްބާރުލުން ދިނުމުގެ ގޮތުން ޔޫރަޕިއަން ޔޫނިއަން (އީޔޫ) އިން 2.5 މިލިޔަން ޔޫރޯގެ އެހީއެއް ރާއްޖެއަށް ދިނުމަށް ނިންމައިފިއެވެ.

އީޔޫއިން ރާއްޖެއަށް ދިނުމަށް ހަމަޖެހިފައިވާ, މި އެހީ އިއުލާންކޮށްފައިވަނީ އެ ކޮމިޝަންގެ ނައިބް ރައީސް އަދި ޚާރިޖީ ގުޅުންތަކާއި ބެހޭ އެންމެ މަތީ ވެރިޔާ ފެޑްރިކާ މޯގްރެނީ ރައްޔިތުންގެ މަޖިލީހުގައި ދެއްކެވި ވާހަކަފުޅުގައެވެ.

މިއީ އެކަމަނާ ޔޫރަޕް ނޫން ގައުމެއްގެ ގާނޫނު ހަދާ މަޖިލީހުގައި ތަގްރީރް ކުރެއްވި ފުރަތަމަ ފަހަރުއެވެ.

ބުރާސްފަތި ދުވަހު ރައްޔިތުންގެ މަޖިލީހުގައި ތަގްރީރް ކުރައްވަމުން ފެޑްރިކާ ވިދާޅުވީ ކަނޑުމަގުން ކުރާ ވިޔަފާރިތަކުގެ ފަސް ބައި ކުޅަ އެއްބައި ވިޔަފާރިތައް ކުރެވުމުން އަންނަނީ ގަލްފް ކަނޑާއި އިންޑިޔާ ކަނޑުގެ ސަރަހައްދު ހުރަސްކޮށް ކަމަށެވެ. އެހެންކަމުން އިންޑިޔާ ކަނޑުގެ ސަލާމަތާއި ރައްކާތެރިކަން ވަރަށް މުހިއްމު ކަމަށެވެ. ފެޑްރިކާ ވިދާޅުވީ އިންޑިޔާ ކަނޑަކީ އަމާން ތަނަކަށްވާންޖެހޭ ކަމަށާއި، އެކަމުގައި ގުޅިގެން އެކުގައި މަސައްކަތް ކުރުމަކީ މުހިއްމު ކަމެއް ކަމަށެވެ. ޓެރަރިޒަމާއި ދެކޮޅަށް ރާއްޖެއިން ކުރަމުން އަންނަ މަސައްކަތަށް އެއްބާރުލުން ދިނުމުގެ ގޮތުން، ރާއްޖެއަށް އީޔޫއިން ދޭ "ޕެކޭޖެއް" ގެ ގޮތުގައި 2.5 މިލިޔަން ޔޫރޯގެ ހިލޭ އެހީ ދޭން ނިންމާފައިވާ ކަމަށެވެ.

ފެޑްރިކާ ވިދާޅުވީ އާ ސަރުކާރު އައި ފަހުން އީޔޫ އާއި ރާއްޖެ އާއި އޮތް ގުޅުން ބަދަހިވެފައިވާ ކަމަށެވެ. އަދި މި ގުޅުން އިތުރަށް ހަރުދަނާ ކުރުމަށް ގިނަ މަސައްކަތްތަކެއް އީޔޫއިން ރާއްޖެ އާއި އެކު ކުރުމަށް ނިންމާފައިވާ ކަމަށެވެ. އެގޮތުން ވިޔަފާރީގެ ގިނަ އެއްބަސްވުންތަކެއް އީޔޫގެ ގައުމުތަކާއި ރާއްޖެ އާއި އެކުގައި ކުރިއަށް އޮތްތާގައި ކުރެވިގެންދާނެ ކަމަށާއި، އަންނަ މަހު ވިޔަފާރިވެރިންނާއި އެކުގައި ބޭއްވޭ ވަށްމޭޒު މަޝްވަރާ ބައްދަލުވުމެއް އޮންނާނެ ކަމަށެވެ.

މޫސުމަށް އަންނަ ނޭދެވޭ ބަދަލުތަކުގެ ސަބަބުން، ކުދި ޖަޒީރާ ގައުމުތަކަށް ލިބޭނެ ގެއްލުންތައް ދުނިޔޭގެ ގައުމުތަކުގެ ސަމާލުކަމަށް ގެނައުމަށް ރާއްޖެއިން ކުރަމުން އަންނަ މަސައްކަތަށް ފެޑްރިކާ ވަނީ ޝުކުރު އަދާކުރައްވާފައެވެ. އަދި ރާއްޖެއިން އެކަމަށް އެހާ ސަމާލުކަންދެނީ ކީއްވެގެންކަން އެކަމަނާ ދަތުރުފުޅު ކުރެއްވި ފްލައިޓް ވެލާނާ އިންޓަރނޭޝަނަލް އެއަރޕޯޓްގައި ޖެއްސުމުން އެގިވަޑައިގެންނެވި ކަމަށް ފެޑްރިކާ ވަނީ ވިދާޅުވެފައެވެ.

މޫސުމަށް އަންނަ ނޭދެވޭ ބަދަލުތަކުގެ ސަބަބުން ދުރުހެލިވުމަށް ރާއްޖެއިން ކުރަމުން އަންނަ މަސައްކަތަށް އީޔޫއިން ދެމުން އަންނަ އެއްބާރުލެއްވުމަށް އަލިއަޅުވާލައްވާ ވާހަކަދައްކަވަމުން ފެޑްރިކާ ވިދާޅުވީ، އިއާދަ ކުރަނިވި ހަކަތައިގެ މަޝްރޫއުތަށް ކުރިއަށް ގެންދިޔުމަށް ޔޫރަޕް އިންވެސްޓްމަންޓް ބޭންކާ އާއި ރާއްޖެ އާއި ދެމެދު 45 މިލިޔަން ޔޫރޯގެ ލޯން އެއްބަސްވުމެއްގައި މިދިޔަ މަހު ސޮއިކުރެވިފައިވާ ކަމަށެވެ.

ފެޑްރިކާ ވިދާޅުވީ މިފަދަ ކަންތަކުގައި ކުރިއަރަމުން އަންނަ ގައުމަތަކަށް އެންމެ ގިނައިން ފާއިސާގެ އެހީ ދެމުން އަންނަނީ އީޔޫއިން ކަމަށާއި، އެކަން ބަދަލުނުވާނެ ކަމަށެވެ. މި ކަމުގައި ރާއްޖެ އާއި އެކު އީޔޫއިން އަބަދުވެސް އޮންނާނެ ކަމުގެ ޔަގީންކަން އެކަމަނާ ވަނީ ދެއްވާފައެވެ.

ރާއްޖޭގެ ގާނޫނު ހަދާ މަޖިލީހުގައި ތަގްރީރް ކުރެއްވުމުގެ ފުރުސަތު އެކަމަނާއަށް ދެއްވި ކަމަށްޓަކާ ގާނޫނު ހަދާ މަޖިލީހުގެ ރައީސް އަދި މެމްބަރުންނަށް ފެޑްރިކާ ވަނީ ޝުކުރު އަދާކުރައްވާފައެވެ.