ރާއްޖޭގެ ބޮޑު ބަޔަކަށް ވިއްސާރަކޮށް ބައެއް އަތޮޅުތަކަށް ވައިޓް އެލާޓް ނެރެފި
19 ޖޫން 2019 | ބުދަ 09:11މިއަދުގެ ހެނދުނު 08:45 އިން މެނދުރު 14:00 އަށް ވައިޓް އެލާރޓް ނެރުން
މާލެއަށް މީގެ ކުރިން ކުރި ވިއްސާރައިގެ ތެރެއިން
ރާއްޖޭގެ ބޮޑު ހިސާބަކަށް ކުރަމުންދާ ވިއްސާރައިގައި ބ. އަތޮޅާއި އައްޑު ސިޓީ އަށް ވައިޓް އެލާޓް ނެރެފިއެވެ.
ބ. އަތޮޅާއ އައްޑު އަށް މިއަދު ހެނދުނު 08:45 އިން މެނދުރު 14:00 އަށް ވައިޓް އެލާޓް ނެރެފައިވާއިރު ކުރިއަށް އޮތް 24 ގަޑިއިރު ތެރޭގައި ރާއްޖޭގެ ދެކުނާއި މެދުތެރޭގެ ބައެއް އަތޮޅުތަކަށް ބޯކޮށް ވާރޭވެހޭނެ ކަމަށް މޫސުމާ ބެހޭ ގައުމީ އިދާރާއިން ބުންޏެވެ. އެގޮތުން ގަޑިއަކު ތިން މޭލާއި 13 މޭލާ ދެމެދުގެ ބޭރުމިނުގައި ދެކުނާއި ހުޅަނގު ދެކުނުން، ވައިޖެހޭނެ ކަމަށާއި ރާއްޖޭގެ އެހެން ހިސާބުތަކަށް ހުޅަނގާއި ހުޅަނގު އިތުރުން ގަޑިއަކު 10 މޭލާއި 20 މޭލާ ދެމެދުގެ ބާރު މިނުގައި ވައިޖެހޭނެ ކަމަށް ލަފާކޮށްފައި ވެއެވެ. ރާއްޖޭގެ އެކި ހިސާބުތަކަށް ގުރުމާ އެކު ބޯކޮށް ވާރޭ ވެހުމުގެ އިތުރުން ވިލާގަނޑުގައި ގާތްގަނޑަކަށް 40 މޭލަށް ވައިގަދަވާނެ ކަމަށް ވެސް މެޓް އޮފީހުން ލަފާކޮށްފައި ވެއެވެ.
މީގެ އިތުރުން ދިޔަވަރު ބޮޑުވާ ގަޑިތަކުގައި ބައެއް ރަށްތަކަށް އުދަ އެރުމުގެ ފުރުސަތު ބޮޑުކަމަށް ވެސް މޫސުމާ ބެހޭ ގައުމީ އިދާރާއިން ހާމަކުރެއެވެ.
މާލެ އަށް ވެސް ބޯކޮށް ވާރޭ ވެހުމުގެ ސަބަބުން މަގުތަކުގައި ފެންބޮޑުވެ އެމްއެންޑީއެފް އިން ވަނީ ފެން ހިންދުމުގެ މަސައްކަތް ކޮށްފައެވެ.
