ކުރީގެ ރައީސް އަބްދުﷲ ޔާމީންގެ ސަރުކާރުގައި ނުހައްގުން ދީފައިވާ ފްލެޓްތަކާއި ހައުސިން ޕްރޮޖެކްޓް ދޫކޮށްފައިވާ ގޮތް ރިވިއުކުރަން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އުފައްދާފައިވާ "ފްލެޓްތަކުގެ މައްސަލަބަލާ ކޮމިޓީ" ރިޕޯޓް ނިމޭވަރު ވާނީ ސެޕްޓެމްބަރު މަހު ކަމަށް ރާއްޖެއެމްވީ އެނގިއްޖެއެވެ.

"ހިޔާ" މަޝްރޫ އާއި "ގެދޮރުވެރިކުރުން" އަދި "ގުޅީފަޅު ހައުސިންގ ޕްރޮޖެކްޓް" ކުރިއަށް ގެންގޮސްފައިވާ ގޮތާއި ފްލެޓްތައް ދޫކޮށްފައިވާ ގޮތް ރިވިއުކޮށް، އިންސާފުވެރި ދެފުށް ފެންނަ ގޮތަށް ފްލެޓް ލިބުން ހައްގުވާ ފަރާތްތަކަށް، ފްލެޓް ލިބޭނޭ ގޮތް ހެދުމަށް "ފްލެޓްތަކުގެ މައްސަލަބަލާ ކޮމިޓީ"ގެ ނަމުގައި ފަސް މެމްބަރުންގެ މައްޗަށް އެކުލެވޭ ކޮމިޓީއެއް އެކުލަވާލާފައި ވަނީ މިދިޔަ އަހަރުގެ ޑިސެމްބަރު މަހުގެ 31 ވަނަ ދުވަހުއެވެ.

ނަން ނުޖަހަން ޝަރުތުކޮށް ރާއްޖެއެމްވީ އަށް މައުލޫމާތު ދިން ފްލެޓް ކޮމިޓީގެ މެމްބަރަކު ވިދާޅުވީ، ފްލެޓްތައް ދީފައިވާ އުސޫލު ބަލައި ދިރާސާތައް ކުރުމަށް ފަހު ރިޕޯޓް އެކުލަވައިލުމުގެ މަސައްކަތް އެ ކޮމިޓީން ކުރަމުން އަންނަ ކަމަށެވެ. އެ ކޮމެޓީއިން އަންނަނީ ހިޔާ މަޝްރޫއަށް ހުށައަޅާފައިވާ 22,000 ފޯމް ދިރާސާ ކުރަމުންނެވެ. އެ ކަމަށް ދުވަސްތަކެއް ނަގާނެ ކަމަށް އޭނާ ވިދާޅުވިއެވެ.

ފާހަގަކުރެވޭ ބައެއް ކަންތައްތައް އެބަހުރި ކަމާށާއި އެކަންތައްތައް މީޑިއާ އަށް ވަރަށް އަވަހަށް ހިއްސާ ކުރައްވާނެ ކަމަށް އެ މެމްބަރު ވިދާޅުވިއެވެ. އެ ކޮމިޓީގެ ރިޕޯޓް ފޮނުވަން ޖެހެނީ ރައީސް ސޯލިހު އަށެވެ.

ފްލެޓްތަކުގެ މައްސަލަ ބަލާ ކޮމިޓީގައި ހިމެނޭ މެމްބަރުން

1. މުޙައްމަދު މުޢިއްޒު އަދުނާން، މ. ގުލްފާމްގެ

2. ޝީރީން ނާހިދާ ލަޠީފު، ގ. ނޫމަރާވިލާ

3. ފާޠިމަތު ރަޝީދާ، މ. ގަސީމު

4. އަޙްމަދު ޠަލާލް، މއ. އަންޑާޕޫލްއާގެ

5. ޢަލީ ޝުހައިލް މުޙައްމަދު، މ. ފެންގަސް

ހައުސިން މިނިސްޓްރީގެ ޑެޕިއުޓީ މިނިސްޓަރު އަލީ ޝާމިން ވިދާޅުވީ، ރިޕޯޓް ނިމި އެ މިނިސްޓްރީއާ ލިބުމުން ހައްގުވެރި ފަރާތްތަކަށް ފްލެޓް ހަވާލުކުރުމުގެ މަސައްކަތް ކުރިއަށް ގެންދާނެ ކަމަށެވެ. ހިޔާ މަޝްރޫއުގެ ދަށުން ހުޅުމާލޭގެ ދެ ވަނަ ފިޔަވަހީގައި އިމާރާތްކުރަމުން އަންނަ ފްލެޓްތައް ނޮވެމްބަރު މަހަށް ނިންމުމުގެ މަސައްކަތް ދަނީ ކުރަމުންނެވެ.

މި އަހަރުގެ މޭ މަހަށް ނިންމާނެ ކަމަށް ކުރީ ސަރުކާރުން ބުނި "ހިޔާ" މަޝްރޫއުގެ ފްލެޓްތަކުގެ ސްޓްރަކްޗަރ އަށް މި ސަރުކާރުން ގެންނަ ބަދަލުތަކާ އެކު ފްލެޓްތަކުގެ އަދަދު 7،000 އިން 3،588 އަށް ވަނީ މަދުކޮށްފައެވެ. އަދި މަސައްކަތް ވަނީ ދިގުލައިގެން ގޮސްފައެވެ. އެ ތަންތަނަށް ބަދަލު ގެންނަން މި ސަރުކާރުން ނިންމީ އެއީ ދިރިއުޅެން ކަމުދާ ތަންތަނަށް ނުވުމުން ކަމަށް ހައުސިން މިނިސްޓްރީން ބުނެފައި ވެއެވެ.

މި ސަރުކާރުން ރައްޔިތުންނަށް ބޯހިޔާވަހިކަމުގެ އެކި އެކި މަޝްރޫއުތައް ކުރިއަށް ގެންދަން ހަމަޖެހިފައިވާއިރު ބައެއް ޕްރްޖެކްޓްތަކުގައި މިހާރު ވަނީ ސޮއިކޮށްފައެވެ. ނަމަވެސް މާލެ ސަރަހައްދުގައި ބޯހިޔާވަހިކަމުގެ އާ މަޝްރޫއެއް އަދި އިއުލާނުކޮށްފައެއް ނުވެއެވެ.

ބޯހިޔާވަހިކަމުގެ މައްސަލައަށް ހައްލެއް ގެންނާނެ ކަމަށް އެމްޑީޕީގެ އެޖެންޑާ 19 ގައި މުހިއްމު ސިޔާސަތުތަކެއް ކަނޑައަޅާފައިވާއިރު، މާލޭގެ ގޯތި ގެދޮރު ނެތް ހުރިހާ ފަރާތްތަކަށް މި ފަސް އަހަރުގެ ވެރިކަމުގެ ތެރޭގައި ބޯހިޔާވަހިކަން ފޯރުކޮށްދޭނެ ކަމަށް ސަރުކާރުން ވައުދުވެފައިވެ އެވެ. މާލެއަށް ޚާއްސަކޮށް، އަދި މާލޭގައި ދިރިއުޅޭ ރައްޔިތުންގެ ތެރެއިން ގޯތިގެދޮރު ނެތް ރައްޔިތުންނަށް ޚާއްސަކޮށްގެން ބޮޑު ހައުސިންގް ޕްރޮޖެކްޓެއް ދާދި އަވަހަށް އިއުލާނު ކުރެވިގެންދާނެ ކަމަށް ރައީސް ސޯލިހު ވެސް ވިދާޅުވެފައި ވެއެވެ. އަދި އޭގެ އިތުރުން އެޖެންޑާ 19ގެ ދަށުން މާލޭގެ ކޮންމެ ރައްޔިތަކަށް ގޯއްޗެއް ލިބިގެންދާނެ ކަމަށް ކުރީގެ ރައީސް މުހައްމަދު ނަޝީދު ވެސް ވަނީ ވިދާޅުވެފައެވެ.

ރައީސް ޔާމީންގެ ސަރުކާރުގެ ދުވަސްވަރު ޝަރުތު ހަމަނުވާ ގިނަ ބަޔަކަށް ފްލެޓް ދީފައިވާކަން ވަނީ ހަމާވެފައެވެ. ފްލެޓްތައް ދިނުމުގައި އިސްކަން ދީފައި ވަނީ ސަރުކާރުގެ އިސްވެރިންނާއި ޕީޕީއެމްއަށް ނިސްބަތްވާ މީހުންނަށެވެ.