ޕްރިމިއާ ލީގަކީ ހޯދަން އެންމެ އުނދަގޫވި ތަށި: ގާޑިއޯލާ

ޕްރިމިއާ ލީގު ތަށްޓަކީ ކޯޗިން ކެރިޔަރުގައި ހޯދަން އެންމެ އުނދަގޫވި ތަށި ކަމަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނެފިއެވެ.

ނޫސްވެރިންނަށް މައުލޫމާތު ދެމުން ގާޑިއޯލާ ބުނީ، ޕްރިމިއާ ލީގު ކާމިޔާބުކުރަން ޖެހިޖެހިގެން 14 މެޗު ކާމިޔާބު ކުރަންޖެހުނު ކަމަށާއި، މިއީ މުޅި ހަޔާތުގައި ވެސް އުނދަގުލުން ހޯދުނު ތަށި ކަމަށެވެ.

އާދީއްތަ ދުވަހުގެ ރޭ ރަށުން ބޭރުގައި ބްރައިޓަންއާ ދެކޮޅަށް ކުޅުނު މެޗު 1-4 ގެ ނަތީޖާއަކުން ކާމިޔާބުކޮށް، ޕްރިމިއާ ލީގުގެ ތަށި ސިޓީން ވަނީ ކަށަވަރު ކޮށްފައެވެ.

މިއީ ގާޑިއޯލާގެ ކޯޗިން ކެރިޔަރުގައި ފާއިތުވެދިޔަ ދިޔަ 10 ސީޒަންގެ ތެރެއިން ލީގް ތަށި ހޯދި 8 ވަނަ ފަހަރެވެ.

ސިޓީ 98 ޕޮއިންޓާއެކު ލީގު ނިންމާލިއިރު، ސިޓީގެ ފަހަތުން ދެވަނައިގައި އޮތް ލިވަޕޫލުން ވަނީ 97 ޕޮއިންޓް ހޯދާފައެވެ. މިއީ 1990 ވަނަ އަހަރުގެ ފަހުން ޕްރިމިއާ ލީގު ކާމިޔާބުކުރުމާ ގާތަށް ލިވަޕޫލްދިޔަ ފުރަތަމަ ފަހަރެވެ.

ލިވަޕޫލްއާ ބެހޭގޮތުން ގާޑިއޯލާ ބުނީ، މިދިޔަ ސީޒަނުގައި ސިޓީ އޮތީ ވަރަށް ރަނގަޅު ހިސާބެއްގައި ކަމަށާއި، އެ ހިސާބުގައި ސިޓީ ބަހައްޓަން އެންމެ ބާރު އެޅި ބަޔަކީ ލިވަޕޫލް ކަމަށެވެ. އެގޮތުން އެޓީމަށް ޝުކުރު އަދާކުރާ ކަމަށް އޭނާ ވަނީ ބުނެފައެވެ.

ސްޕެއިން އަށް އުފަން އުމުރުން 48 އަހަރުގެ ގާޑިއޯލާގެ އިރުޝާދުގެ ދަށުން ސިޓީ ކުޅުނު 173 މެޗުގެ ތެރެއިން 126 މެޗު ކާމިޔާބު ކޮށްފައިވާއިރު، 23 މެޗުން ވަނީ ބަލިވެފައެވެ. އަދި 24 މެޗު ނިމުނީ އެއްވަރުވެގެންނެވެ.

މީގެކުރިން ބާސެލޯނާ އަދި ބަޔާން މިއުނިކާއެކު ވެސް ކާމިޔާބު ހޯދާފައިވާ ކޯޗު ގާޑިއޯލާގެ އިރުޝާދުގެ ދަށުން ސިޓީ ވަނީ ޕްރިމިއާ ލީގު ދެފަހަރު، ލީގު ކަޕް ދެފަހަރު އަދި އެފްއޭ ކޮމިއުނިޓީ ޝިލްޑް އެއްފަހަރު ކާމިޔާބު ކޮށްފައެވެ.