އެޓެލްޓިކޯ މެޑްރިޑަށް ކުޅެމުން އަންނަ ފްރާންސްގެ ފޯވާޑް އެންޓޯނިއޯ ގްރިޒްމަން އެ ކްލަބުގައި މަޑުކުރުމަށް އެދޭ ކަމަށް އެޓްލެޓިކޯގެ ކުޅުންތެރިޔާ ކޮކޭ ބުނެފިއެވެ.

ނޫސްވެރިންނަށް މައުލޫމާތު ދެމުން ކޮކޭ ބުނީ، ގްރިޒްމަން އަކީ ފޯވާޑަށް ކުޅެމުން އަންނަ މޮޅު ލީޑަރެއް ކަމަށާއި، އޭނާ ކްލަބުގައި މަޑުކުރުމަށް ވަރަށް ބޮޑަށް އެދޭ ކަމަށެވެ.

އެގޮތުން ކޮކޭ ބުނީ، ގްރިޒްމަން އިތުރު ދުވަސްތައް އެޓްލެޓިކޯގައި ހޭދަކުރާނަމަ، އޭނާ ކްލަބް ދޫކޮށްދާނީ ޑިއެގޯ ގޮޑިން ކްލަބް ދޫކޮށްދިޔަ ފަދައިން ކަމަށެވެ. ގޮޑިން އެޓްލެޓިކޯ ދޫކޮށް އިންޓައަށް ސޮއިކުރީ އެޓްލެޓިކޯއިން ބޭއްވި ފޯރިގަދަ ފެއާވެލްއަކާ އެކުގައި ކަމަށެވެ.

އެޓްލެޓިކޯއާއެކު ގްރިޒްމަން ހަދާފައިވާ އެއްބަސްވުން 2022 ވަނަ އަހަރު ހަމަވާއިރު، އޭނާއަށް ދުނިޔޭގެ ނަން މަޝްހޫރު ގިނަ ކްލަބްތަކުން އަންނަނީ ފާރަލުމުންނެވެ. އޭގެ ތެރެއިން އެންމެ ފާހަގަ ކޮށްލެވެނީ މެންޗެސްޓާ ޔުނައިޓެޑެވެ.

ގްރިޒްމަން އޭނާގެ ކެރިޔަރު ފެށީ 2009 ވަނަ އަހަރު ރެއާލް ސޮސައިޑާޑް އިންނެވެ. އޭނާ އެޓްލެޓިކޯ އަށް ބަދަލުވީ 2014 ވަނަ އަހަރެވެ. އެގޮތުން އޭނާ ވަނީ އެޓްލެޓިކޯގައި މިހާތަނަށް ހޭދަކުރި ފަސް ސީޒަނުގައި އެ ކްލަބަށް ކުޅުނު 252 މެޗުގައި 133 ލަނޑު ކާމިޔާބު ކޮށްފައެވެ.

އެޓްލެޓިކޯއާއެކު ޔުއެފާ ޔޫރޮޕާ ލީގު، ޔުއެފާ ސުޕާކަޕް އަދި ސްޕެނިޝް ސުޕާކަޕް ކާމިޔާބު ކޮށްފައިވާ ގްރިޒްމަން ވަނީ އެ ކްލަބުގައި އަމިއްލަ ގިނަ ރެކޯޑްތައް ވެސް ހަދާފައެވެ.

ލަލީގާގެ އެންމެ މޮޅު ކުޅުންތެރިޔާގެ މަގާމު 2016 ވަނަ އަހަރު ހޯދާފައިވާ ގްރިޒްމަން ވަނީ ހަމަ އެ އަހަރު ބެލޮންޑޯ އެވޯޑުގެ ތިންވަނަ ހޯދާފައެވެ. އަދި އޭނާ ވަނީ މިދިޔަ އަހަރު ބެލޮންޑޯ އެވޯޑުގެ ތިންވަނަ ވެސް ހޯދާފައެވެ.

ފްރާންސް ގައުމީ ޓީމާއެކު މިދިޔަ އަހަރު ރަޝިއާގައި ބޭއްވި ފީފާ ވޯލްޑް ކަޕް ކާމިޔާބު ކޮށްފައިވާ ގްރިޒްމަން ވަނީ 2010 ވަނަ އަހަރު ފްރާންސްގެ 19 އަހަރުން ދަށުގެ ޓީމާއެކު ޔޫރޯވެސް ކާމިޔާބު ކޮށްފައެވެ. އޭނާ ވަނީ ގައުމީ ޓީމަށް މިހާތަނަށް ކުޅުނު 69 މެޗުގައި 28 ލަނޑު ކާމިޔާބު ކޮށްފައެވެ.