"ހިންދީ މީޑިއަމް 2" ގައި އިރްފާން ޚާންއާ އެކު ލީޑް ރޯލުން ފެނިގެންދާނީ ކަރީނާ ކަޕޫރު ކަމަށް ރިޕޯޓްތައް ބުނެފިއެވެ.
ކަރީނާއާ ގާތް މީހަކު އައިއޭއެންއެސް އަށް ބުނެފައި ވަނީ މި ފިލްމްގެ ލީޑް ރޯލުން ފެންނާނީ ކަރީނާ ކަމަށާއި ފިލްމް ޝޫޓް ކުރުމަށް ހަމަޖެހިފައި ވަނީ ލަންޑަންގައި ކަމަށެވެ.
ސާކެޓް ޗައުދަރީ ޑައިރެކްޓް ކޮށްފައިވާ "ހިންދީ މީޑިއަމް" ރިލީޒް ކޮށްފައިވަނީ 2017 ވަނަ އަހަރުއެވެ. މި ފިލްމްގެ ލީޑް ރޯލް ކުޅެފައި ވަނީ އިރްފާން ޚާން އާއި ޕާކިސްތާނުގެ އެކްޓްރެސް ސަބާ ޤަމަރު އެވެ. މި ފިލްމަކީ އިންޑިއާގެ ތައުލީމީ ނިޒާމާ ގުޅޭ ގޮތުން ތައްޔާރު ކޮށްފައިވާ ފިލްމެކެވެ. މި ފިލްމަށް ބޮކްސް އޮފީހުގައި ވަނީ ބޮޑު ކާމިޔާބީއެއް ލިބިގެން ގޮސްފައެވެ.
މި ސީކުއެލް ވެގެންދާނީ މިދިޔަ އަހަރުގެ މާރޗް މަހުން ފެށިގެން ކެންސަރު ބައްޔަށް ފަރުވާ ހޯދުމަށް ފަހު އިރުފާން މަސައްކަތް ކުރާ ފުރަތަމަ ފިލްމަށެވެ.
ކަރީނާ ދެން އެންމެ އަވަހަށް ފެނިގެންދާނީ ކަރަން ޖޯހަރުގެ ފިލްމް "ތަޚްތު" އަދި އަކްޝޭއާ އެކު "ގުޑް ނިއުސް" އިންނެވެ.
