ލޭންޑިން ގިއާގައި މައްސަލަ ޖެހުނު ފްލައިޓް ޖެއްސީ އެއް ގަޑިއިރު ފަހުން

ލޭންޑިން ގިއަރގައި މައްސަލައެއް ޖެހުނު މޯލްޑިވިއަން ފްލައިޓެއް، އައްޑޫ ސިޓީ، ގަން އިންޓަނޭޝަނަލް އެއާޕޯޓަށް ނުޖެއްސި އުޅޭތާ އެއް ގަޑިއިރު ފަހުން އެމެޖެންސީގައި ޖައްސައިފިއެވެ.

ލޭންޑިން ގިއަރގައި މައްސަލަ ޖެހުނީ މާލެއިން ފުރައިގެން ކައްދޫގައި ޖައްސާފައި ގަމަށް ދިޔަ މޯލްޑިވިއަން ޑޭޝް 8 މަރުކާރުގެ ބޯޓެއްގައެވެ. އަންގާރަ ދުވަހުގެ މެންދުރު 12:30 ގައި ގަމަށް ޖައްސަން ޝެޑިއުލްކޮށްފައި އޮތް ބޯޓު ނުޖެއްސި، އެންމެ ފަހުން އެ ބޯޓު ޖެއްސީ މެންފުރު ފަހު 1:30 އެހާކަންހާއިރުއެވެ.

މޯލްޑިވިއަނުން ބުނީ ބޯޓުގައި ދިމާވި މެކޭނިކަލް މައްސަލައަށް ކްރޫއިން ހައްލެއް ހޯދުމަށް ފަހު، ބޯޓު ޖައްސާފައި ވަނީ ރައްކާތެރިކަމާ އެކުގައި ކަމަށެވެ. ބައެއް ފަރާތްތަކުން ބުނީ ބޯޓުގެ ކެޕްޓަން ފްލައިޓް ޖައްސާފައި ވަނީ "ފިފްޓީ، ފިފްޓީ ޖާންސެއް"ގައި ކަމަށެވެ.

ސޯޝަލް މީޑިއާގައި ބައެއް ފަރާތްތަކުން ދަނީ ކެޕްޓަނަށް ތައުރީފު ކުރަމުންނެވެ.