ފަސް އަހަރު ވަންދެން ރާއްޖެ އެކަހެރިވެ އޮތުމަށް ފަހު ދުނިޔެ އިން ރާއްޖެ ބަލައި އެބަގަނޭ: ޝާހިދު
30 ޖެނުއަރީ 2019 | ބުދަ 13:51ޖެނުއަރީ މަހުގެ 26 އިން 29 ޝަހިދު ކުރެއްވި ދަތުރުފުޅު ނިންމަވައިލެއްވީ ލަންޑަނުން
ދަތުރުފުޅަށް ފަހު ޝާހިދު ރާއްޖޭގައި
ކުރީގެ ސަރުކާރުގެ ފަސް އަހަރުގައި ރާއްޖެ އެކަހެރިކޮށް އޮތުމަށް ފަހު ބައިނަލްއަގްވާމީ ގޮތުން ރާއްޖެ ބަލައިގަންނަން ފަށާފައިވާ ކަމަށް ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.
ވަޒީރުކަމާއި ހަވާލުވެވަޑައިގަތުމަށް ފަހު ބޭރުގެ ގިނަ ގައުމުތަކަކަށް ކުރެއްވި ދަތުރުފުޅު ނިންމަވާލެއްވުމަށް ފަހު ރާއްޖެ ވަޑައިގެން ކުރެއްވި ޓްވީޓްގައި ޝާހިދު ވިދާޅުވީ، ޔޫއޭއީ އާއި އިނގިރޭސިވިލާތުގެ އިތުރުން އެމެރިކާ އަށް ކުރެއްވި ޒިޔާރަތުގައި އެ ގަމުތަކުން ހޫނު މަރުހަބާއެއް ކިޔާފައިވާ ކަމަށެވެ.
މީގެ އިތުރުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ މެނިފެސްޓޯ ތަންފީޒު ކުރުމަށްޓަކައި ބައިނަލްއަގްވާމީ ޖަމާއަތްތަކުން އެއްބާރުލުން ދޭނެ ކަމުގެ ޔަގީންކަން ދީފައިވާ ކަމަށް ވެސް ފޮރިން މިނިސްޓަރ ވިދާޅުވިއެވެ.
ޖެނުއަރީ މަހުގެ 26 އިން 29 އަށް ފޮރިން މިނިސްޓަރު ކުރެއްވި ދަތުރުފުޅު ނިންމަވާލެއްވުމަށް ފަހު ރާއްޖެއަށް ފުރާވަޑައިގަތުމުގެ ކުރިން ޝާހިދު ވަނީ އިނިގރޭސިވިލާތުގެ ފޮރިން އޮފީހުގެ މިނިސްޓަރ އޮފް ސްޓޭޓް ފޮރ ކޮމަންވެލްތު އެންޑް ޔޫ.އެން ލޯޑް އަހްމަދް އޮފް ވިމްބެލްޑަންއާ ފޮރިން އެންޑް ކޮމަންވެލްތުގެ އޮފީހުގައި ބައްދަލުކުރައްވާފައިވާ ކަމަން ފޮރިން މިނިސްޓްރީން މައުލޫމާތުދެއެވެ. މީގެ އިތުރުން ފޮރިން އެންޑް ކޮމަންވެލްތު އޮފީހުގެ މިނިސްޓަރ އޮފް ސްޓޭޓް ދަ ރައިޓް އޮނަރަބަލް މާރކް ފީލްޑްއާ ވެސް ވަނީ ބައްދަލުކުރައްވާފައެވެ.
މި ބައްދަލުވުންތަކުގައި ދެ ގައުމުގެ ގުޅުން ބަދަހި ކުރެވޭނެ ގޮތްތަކާ ބެހޭ ގޮތުން މަޝްވަރާކޮށްފައުވާ ކަމަށް ފޮރިން މިނިސްޓްރީން ބުންޏެވެ. ލަންޑަނަށް ވަޑައިގަތުމަށް ފަހު ކޮމަންވެލްތް ސެކްރެޓަރީ ޖެނެރަލް ޕެޓްރީޝިއާ ސޮކްޓްލެންޑާއާ ބައްދަލުކުރައްވައި، ދިވެހިރާއްޖެއިން ކޮމަންވެލްތާ އަލުން ގުޅުމަށް ކުރަންޖެހޭ މަސައްކަތް އަވަސް ކޮށްދިނުމަށް އެކަމަނާ އަރިހުން ޝަހިދު ވަނީ އެދިވަޑައިގެންފައެވެ.
ރާއްޖެ އަލުން ކޮމަންވެލްތުގައި ބައިވެރިކުރުމުގެ މަސައްކަތް ފަށާފައިވާ އިރު ރާއްޖޭގެ ހާލަތު ދެނެގަތުމަށް އެ ޖަމާއަތުގެ ވަފުދެއް މިހާރު ވަނީ ރާއްޖެ އައިސްފައެވެ.
