ރޮނާލްޑޯގެ ގޯލާއިއެކު ޔުވެންޓަސް ބަލި ނުވުމުގެ ރިކޯޑް ދަމަހައްޓައިފި

އިޓާލިއަން ސެރިއާ ގައި, ޔުވެންޓަސް އާއި ލާޒިއޯ ބައްދަލުކުރި މެޗްގެ ފަހު މިނިޓްގައި ކްރިސްޓިއާނޯ ރޮނާލްޑޯ ޖަހައިދިން ގޯލުން މި ސީޒަނުގައި ކުޅުނު އެއްވެސް މެޗަކުން ބަލިނުވުމުގެ ރިކޯޑް ޔުވެންޓަސް ދަމަހައްޓައިފިއެވެ.

އިޓަލީގެ ސްޓާޑޭ އޮލިމްޕިކޯ ގައި ކުޅުނު މި މެޗް ޔުވެންޓަސް ކާމިޔާބުކޮށްފައިވަނީ 2-1 ގެ ނަތީޖާއަކުންނެވެ. މެޗްގެ ފުރަތަމަ ހާފުގައި ލާޒީއޯއިން ވަނީ ގިނަ އިރުތަކެއް ވަންދެން ބޯޅަ ހިފަހައްޓައި ޔުވެންޓަސްގެ ގޯލަށް ބާރު ބޮޑުކޮށްފައެވެ.

ނަމަވެސް ދެވަނަ ހާފުގައި ޔުވެންޓަސްގެ އެމްރޭ ކާންގެ އަތުން 75 ވަނަ މިނިޓްގައި ޖެހި ގޯލުން ލާޒިއޯ އިން ވަނީ ލީޑު ހޯދާފައެވެ. ޔުވެންޓަސް އިން ކުޅުން ވަރުގަދަ ކުރުމަށް ފަހު މެޗްގެ ސްކޯ ހަމަހަމަ ކޮށްފައި ވަނީ 74 ވަނަ މިނިޓްގައި ބަދަލު ކުޅުންތެރިއެއްގެ ގޮތުގައި އެރި ޖޯއާއޯ ކަންސޭލޯއެވެ.

ފޯރިގަދަ ކުޅުމެއް ފެނިގެން ދިޔަ މެޗްގެ ދެވަނަ ހާފުގެ 88 ވަނަ މިނިޓްގައި ލާޒިއޯގެ ކުޅުންތެރިއަކު ކުރި ފައުލަކާއި ގުޅިގެން ޔުވެންޓަސްއަށް ލިބުނު ޕެނަލްޓީ ޖަހައިގެން އެ ޓީމައް ލީޑު ހޯދައިދިނީ ރޮނާލްޑޯއެވެ.

މި ލަނޑާއި އެކު ރޮނާލްޑޯ ވަނީ ޔުވެންޓަސްއަށް 15 ގޯލް ޖަހައިދީފައެވެ. މިގޯލާއި އެކު މެޗް ނިމިގެން ދިޔައީ 2-1 ގެ ނަތީޖާއިން ޔުވެންޓަސް މޮޅުވެގެންނެވެ. އާދީއްތަ ދުވަހުގެރޭގެ ނަތީޖާ އާއިއެކު ތާވަލުގެ އެއްވަނަ ގައި ޔުވެންޓަސް އޮތް އިރު ލާޒިއޯ އޮތީ ތާވަލުގެ ފަސްވަނައިގައި 32 ޕޮއިންޓާއިއެކުއެވެ. ޔުވެންޓަސް ދެން އެންމެ އަވަހަށް ނިކުންނާނީ ކޮޕާ އިޓާލިއާ ކަޕްގައި ބުދަ ދުވަހުގެރޭ އެޓްލާންޓާއާ ދެކޮޅަށެވެ.