ސަލާ ހޯދުމުގެ މަސައްކަތް ހުއްޓާނުލާން ފުޓުބޯޅަ އާއިލާ އެދިއްޖެ

ދަތުރުކުރި ޖެޓާ އެކު ގެއްލުނު އާޖެންޓީނާގެ ފޯވާޑް އެމިލިއާނޯ ސަލާ ހޯދުމުގެ މަސައްކަތް ހުއްޓާ ނުލުމަށް ފުޓުބޯޅަ އާއިލާ އިން އެދިއްޖެއެވެ.

އަންގާރަ ދުވަހު ފްރާންސް ގަޑިން ރޭގަނޑު 19:15 ގައި ނެންޓެސް އިން ނައްޓާލި މި ޖެޓުގެ ޚަބަރެއް އެންމެ ފަހުންވީ 5000 ފޫޓު މަތީގައި އޮއްވައި ކަމަށާއި، ޖެޓާ ގުޅުން ކެނޑުނީ 2300 ފޫޓު މަތިން ދަތުރުކުރަނިކޮށް ކަމަށް ރިޕޯޓުތައް ބުނެއެވެ.

މި ޖެޓު ގެއްލުނީ ޗެނަލް އައިލެންޑްގެ ގޯންސީގެ ލައިޓް ހައުސް ކައިރިން ކަމަށްވާއިރު، ޖެޓު ހޯދުމުގެ މަސައްކަތް ތިން ދުވަސް ވަންދެން ވަރަށް ބާރަށް ކުރިޔަށް ގެންދިޔައެވެ.

ނަމަވެސް ގޯންސީ ޕޮލިހާއި ފްރާންސް އަދި އިންގްލެންޑްގެ ސިފައިން ގުޅިގެން ސަލާ ހޯދުމަށް ކުރަމުންދިޔަ މަސައްކަތް ހުއްޓާލީ އެ ސަރަހައްދުގެ މޫސުން ހުރި ގޮތުންނެވެ. މަސައްކަތް ހުއްޓާލީ 1700 ސްކޮޔާ މައިލް ބެލުމަށް ފަހުއެވެ.

ސަލާ ހޯދުމުގެ މަސައްކަތް ހުއްޓާލުމާ އެކު، ފުޓުބޯޅަ ގިނަ ތަރިން އަދި ގިނަ ބަޔަކު މީސްމީޑިއާގައި އަންނަނީ އޭނާ ހޯދުމުގެ މަސައްކަތް އަލުން ފެށުމަށް ގޮވާލަމުންނެވެ. އަދި ފެނުމުގެ ކިރިޔާ ފުރުސަތެއް އޮތިއްޔާ އެ ފުރުސަތު ދޫކޮށްނުލުމަށް ވެސް ވަނީ އެދިފައެވެ.

ލީގުގައި ދަށް ނަތީޖާތަކެއް ނެރެމުން އަންނަ ކާޑިފް ރެލިގޭޝަނުން ސަލާމަތްކުރުމަށް އެޓީމަށް ސަލާ ގެނެސްފައި ވަނީ މިދިޔަ ހަފްތާއެވެ. މައުލޫމާތު ލިބިފައިވާ ގޮތުގައި ފްލައިޓްގައި ކާޑިފް އަށް ސަލާ ދަތުރުކުރަމުން ދިޔައީ އެޓީމާ ގުޅުމަށެވެ.

ފްރާންސްގެ ނެންޓެސްއަށް ކުޅެމުން އައި ސަލާ ވަނީ އެޓީމަށް ކުޅުނު 130 މެޗުގައި 48 ލަނޑު ކާމިޔާބުކޮށްފައެވެ. އޭނާ ވަނީ އެ ކްލަބާއެކު ހަތަރު ސީޒަން ހޭދަކޮށްފައެވެ.

އާޖެންޓީނާއަށް އުފަން އުމުރުން 28 އަހަރުގެ ސަލާ ވަނީ ސިއަން އަދި ބޯޑޯ އަށް ވެސް ކުޅެފައެވެ.