މޯލްޑިވްސް އިސްލާމިކް ބޭންކްއަށް އާ މެނޭޖިންގް ޑިރެކްޓަރަކު އައްޔަންކޮށްފިއެވެ.

އިސްލާމިކް ބޭންކް އިން އަންގާރަ ދުވަހު ނެރުނު ނޫސްބަޔާނެއްގެ ބުނެފައިވަނީ އާ މެނޭޖިންގ ޑިރެކްޓަރަކަށް ހަމަޖައްސާފައިވަނީ އަބްދުލް މުހައިމިން ކަމަށެވެ. އަދި އެ ބޭފުޅާ މަޤާމާ ހަވާލުވެ މަސައްކަތަށް ނުކުންނަވާފައިވަނީ މި މަހުގެ 17 ވަނަ ދުވަހު ކަމަށް ވެސް އެ ބަޔާނުގައިވެއެވެ.

ބަންގްލަދޭޝް ރައްޔިތެއްކަމުގައިވާ މުހައިމިން މީގެ ކުރިން ވަނީ ބަންގްލަދޭޝްގައި ހުންނަ ޔުނައިޓަޑް ކޮމާޝަލް ބޭންކްގެ މެނޭޖިންގް ޑިރެކްޓަރުކަމާއި ޗީފް އެގްޒެކްޓިވް އޮފިސަރކަމުގެ މަޤާމު އަދާކުރައްވާފައެވެ.

މަޤާމާ ހަވާލުވުމަށްފަހު މުހައިމިން ވިދާޅުވީ އެމްއައިބީއާއެކު މަސައްކަތް ކުރަން ލިބުމުން އެކަމާ އުފާކުރައްވާ ކަމަށެވެ. އަދި ރާއްޖޭގައި ބޭންކިންގް ހިދުމަތް ދިނުމުގެ ޤާބިލުކަން އެބަހުރި ކަމަށާއި އެ ހިދުމަތުގެ މައި ރޯލެއް އެމްއައިބީ އިން އަދާކުރާނެ ކަމަށް އޭނާ ވިދާޅުވިއެވެ.

މުހައިމިން އަކީ ބޭންކިންގް ދާއިރާގައި 30 އަހަރަށްވުރެ ގިނަ އަހަރު ތަޖުރިބާ ލިބިފައިވާ ފަރާތެކެވެ.

މީގެ ކުރިން އެމްއައިބީގެ މެނޭޖިންގް ޑިރެކްޓަރަކަށް ހުންނެވީ ހާރިސް ހާރޫންއެވެ. އޭނާ ވަނީ ބޭންކް ހުޅުވި ދުވަހުން ފެށިގެން (2009 ވަނަ އަހަރުން ފެށިގެން) 2018 ވަނަ އަހަރުގެ އޭޕްރީލް މަހާއި ހަމައަށް އެ ބޭންކްގެ މެނޭޖިންގް ޑިރެކްޓަރުގެ މަޤާމު އަދާކުރައްވާފައެވެ.