އޮފީސް ބިލިއާޑް މުބާރާތުގައި ބައިވެރިވުމުގެ ފުރުސަތު ހުޅުވާލައިފި
13 ޖެނުއަރީ 2019 | އާދީއްތަ 11:28މުބާރާތުގައި ބައިވެރިވެވޭ ފަހު ތާރީހަކީ ފެބުރުއަރީ 21
މިދިޔަ އަހަރުގެ ޓީމް އިވެންޓުން ޗެމްޕިއަންކަން ހޯދި ދިވެހި ސިފައިންގެ ކްލަބް
މޯލްޑިވްސް ޕޫލް ބިލިއާޑް އެސޯސިއޭޝަން (އެމްޕީބީއޭ) އިން އިންތިޒާމުކޮށްގެން ބާއްވާ އިންޓަރ އޮފީސް ބިލިއާޑް ޗެމްޕިއަންޝިޕްގައި ބައިވެރިވުމުގެ ފުރުސަތު ހުޅުވާލައިފި އެވެ. ސަރުކާރު އަދި އަމިއްލަ އޮފީސްތަކާއި ކުންފުނިތަކުގެ މުވައްޒަފުންނަށް ހުޅުވާލައިގެން ކޮންމެ އަހަރަކުވެސް ކުރިއަށްގެންދާ މި މުބާރާތް މިއަހަރު ފެށުމަށް ހަމަޖެހިފައި ވަނީ މާޗް މަހުގެ އެއްވަނަ ދުވަހުއެވެ. ސަރުކާރު އޮފީސްތަކާއި ކުންފުނިތަކާއި، ސަރުކާރުގެ ހިއްސާ އޮންނަ އޮފީސްތަކާއި، ކުންފުނިތަކުގެ އިތުރުން ޕަބްލިކް އަދި ޕްރައިވެޓް އޮފީސްތަކާއި ކުންފުނިތަކުގެ މުވައްޒަފުންނަށް ބައިވެރިވެވޭ މި މުބާރާތުގައި ޕްރައިވެޓް އޮފީސްތަކާއި ކުންފުނި ތަކަށް ބައިވެރިވެވޭނީ އެ އޮފީހެއް ނުވަތަ ކުންފުންޏެއްގައި 100 މުވައްޒަފުން ހަމަވާނަމައެވެ. މުބާރާތުގައި ރަޖިސްޓްރީ ވާން ބޭނުންވާ ފަރާތްތަކަށް މިހާރު އެ ފުރުސަތު ހުޅުވާލާފައިވާއިރު، ފެބުރުއަރީ މަހުގެ 21 ވަނަ ދުވަހުގެ ނިޔަލަށް ވަނީ ފުރުސަތު ހުޅުވާލާފަ އެވެ. އަދި މުބާރާތުގައި ބައިވެރިވުމަށް ބޭނުންވާ ރެޖިސްޓްރޭޝަން ފޯމް އެމްޕީބީއޭގެ ވެބްސައިޓުން ޑައުންލޯޑް ކުރެވޭނެ ކަމަށް އެސޯސިއޭޝަނުން މައުލޫމާތުދެ އެވެ. މިދިޔަ އަހަރު ބޭއްވި އޮފީސް ބިލިއާޑް މުބާރާތުގެ ޓީމް އިވެންޓުގެ ޗެމްޕިއަންކަން ދިވެހި ސިފައިންގެ ކުލަބް ހޯދާފައިވާއިރު، ސިންގަލްސް ޗެމްޕިއަންކަން ހޯދީ އެމްޕީއެލްގެ އަބްދުﷲ އަފީފް އެވެ.
