ބުޅާތައް މަރަނީ! ފުލުހުން ބުނަނީ މައްސަލަ ބަލާނީ ހުށަހެޅުމުން ކަމަށް

ފަހަކަށް އައިސް މާލޭގައި އަނިޔާވެރި ގޮތަކަށް ބުޅާތައް މަރަމުންދާ މައްސަލަ ބޮޑުވަމުންދާއިރު އެ މައްސަލަ ފުލުހުން ބަލަން ފަށާފައި ނުވަނީ އެއްވެސް ފަރާތަކުން މައްސަލަ އެ މުއައްސަސާއަށް ހުށަހަޅާފައި ނެތުމުން ކަމަށް ފުލުހުން ބުނެފި އެވެ.

ރާއްޖެއެމްވީއަށް މައުލޫމާތު ދެއްވަމުން ފުލުހުންގެ ތަރުޖަމާން އިޒްމިއާ ޒާހިރު ވިދާޅުވީ، ފަހަކަށް އައިސް އަނިޔާވެރިކޮށް ބުޅާތައް މަރަމުންދާ މައްސަލަ ފުލުހަށް ރިޕޯޓްކޮށްފައިނުވާ ކަމަށާއި، އެ މައްސަލަ ރިޕޯޓްކޮށްފިނަމަ ބަލާނެ ކަމަށެވެ.

Advertisement

އެގޮތުން އިޒްމިއާ ވިދާޅުވީ، މީގެ ކުރިންވެސް ބުޅާތައް މެރި މައްސަލަތަކެއް ފުލުހުން ބަލާފައިވާނެ ކަމަށެވެ.

"މިހާތަނަށް ބުޅާތައް މަރާ މައްސަލަ ފުލުހަށް ރިޕޯޓްކޮށްފައެއް ނުވޭ. ރިޕޯޓްކޮށްފިއްޔާ މައްސަލަ ބަލާނަން. ކުރިންވެސް ބުޅަލަށް އަނިޔާކޮށް މަރާ މައްސަލަތަކެއް ވަނީ ބަލާފައި" ފުލުހުންގެ ތަރުޖަމާން އިޒްމިއާ ވިދާޅުވިއެވެ.

ފުލުހުން މިހެން ބުނެފައިވާއިރު، މާލޭ މަގުމަތީގައި އުޅޭ ބުޅާތަކަށް އަނިޔާކޮށް މަރަމުންދާ މައްސަލަ ވަނީ އިތުރުވެފައެވެ. އެގޮތުން މިކަމާ ކަންބޮޑުވުން ފާޅުކޮށް، ގިނަ ބަޔަކު ދަނީ ސޯޝަލް މީޑިއާގައި މި މައްސަލަތައް ބެލުމަށް އެދި ގޮވާލަމުންނެވެ.

ބުޅާތައް މަރަމުންދާ މައްސަލައިގައި، ޖަނަވާރުތަކުގެ ހިމާޔަތުގައި މަސައްކަތް ކުރަމުން އަންނަ ހިއުމަން ސޮސައިޓީ އޮފް މޯލްޑިވްސް އިން ވަނީ މިދިޔަ ހޮނިހިރު ދުވަހު މާލޭ ސިޓީ ކައުންސިލާ ބައްދަލުކޮށް، އެކަމަށް ހައްލެއް ހޯދުމަށް މަޝްވަރާ ކޮށްފައެވެ.

ރާއްޖޭގައި އުޅޭ ބުޅާތައް ތަހައްމަލުކުރަމުންދާ އަނިޔާގެ މައްސަލަ އަމިއްލަ ފަރުދަކު ހޯމް މިނިސްޓަރު އިމްރާންގެ ސަމާލުކަމަށް މީގެ ކުރިން ގެނެސްފައިވެ އެވެ. އެ ސިޓީއާ ގުޅިގެން އެ މަނިކުފާނު ވިދާޅުވެފައި ވަނީ އިސްލާމީ މުޖުތަމައުގައި ދިރޭ ތަކެތީގެ ރައްކާތެރިކަން ކަށަވަރުވެފައި އޮންނަންޖެހޭ ކަމަށާއި މިއީ ދީނުގައި ވަރަށް ބޮޑަށް ބާރު އަޅުއްވާފައިވާ ކަމެއް ކަމަށެވެ. "މިއީ ކުރިއަށް އޮތް ތާނގައި ދައުލަތުގެ ނިޒާމުގެ ތެރެއިން ހައްލު ހޯދަންޖެހޭ ކަމެއް،" މިނިސްޓަރު އިމްރާން ވިދަޅުވެފައިވެ އެވެ.

ރާއްޖޭގެ ގާނޫނުލް އުގޫބާތުގައި، ޖަނަވާރުންނަށް އަނިޔާ ކުރުން ކަނޑައަޅާފައި ވަނީ ކުށެއްގެ ގޮތަށެވެ. އަދި އެ ކުށުގެ އަދަބެއްގެ ގޮތުން އެއް މަހާއި ހަ ދުވަހުގެ މުއްދަތަކަށް ޖަލަށްލެވިދާނެއެވެ.