އީލޮން މަސްކުގެ ތައުރީފް ބާޖީރާއޯ މަސްތާނީއަށް

އެމެރިކާގެ މަޝްހޫރު ޓެކް ބިލިއަނަރު އީލޮން މަސްކު ބަޖީރާއޯ މަސްތާނީއަށް ތައުރީފް ކޮށްފިއެވެ.

ދާދި ފަހުން ކައިވެނި ކޮށްފައިވާ ބޮލީވުޑްގެ ދެ ފަންނާނުން ކަމަށްވާ، ރަންވީރު ސިންހް އަދި ދީޕިކާ ޕަދުކޯން ކުޅެފައިވާ ބާޖީރާއޯ މަސްތާނީއަށް އީލޮން މާސްކް ތައުރީފް ކޮށްފައި ވަނީ ޓްވީޓަކުންނެވެ.

ހުކުރު ދުވަހު ކުރި ޓްވީޓެއްގައި އީލޮން ވަނީ ބާޖީރާއޯ މަސްތާނީގެ "މަލްހާރީ'' ލަވައިގެ ޖިފްއެއް ހިމަނާފައެވެ. ކެޕްޝަނަކަށް ބާޖީރާއޯ ޖަހާފައި ދެ ފަޅިއަށް އީލޮން ވަނީ ހިތް ރަމްޒުކޮށްދޭ އިމޯޖީއެއް ޖަހައި، އޭނާއަށް އެ ލަވަ ކަމުދާ ކަމުގެ ޝުއޫރު ފާޅުކޮށްފައެވެ.

އީލޮން މިހެން ޓްވީޓް ކުރުމުން އެތައް ބަޔަކު ވަނީ އޭނާގެ ޓްވިޓަށް ކޮމެންޓް ކޮށް ރީޓްވީޓް ކޮށްފައެވެ. ފިލްމު އުފެއްދި އެރޯސް ކުންފުނިން އިލޮން ގާތުގައި އެ ފިލްމު އެރޯސްގެ ވެބްސައިޓް އިން ބެލޭނެ ކަމަށް ވަނީ ބުނެފައެވެ.

ޔޫޓިއުބްގައި 82 މިލިއަން ވިއުސް ލިބިފައިވާ ހިތްގައިމު މި ލަވަ ކިޔާފައިވަނީ އާޝިގީ 2 ގެ "ސުން ރަހާ ހޭނާ" ފަދަ ލަވަތަށް ކިޔާފައިވާ ޝްރެޔާ ގޯޝާލްގެ އިތުރުން ފޯކް ލަވަކިޔުންތެރިޔާ ގަނޭޝް ޗަންދަން ޝިވްއެވެ.

ލޯބީގެ ގިނަ ފިލްމު ތަކެއް ޑައިރެކްޓް ކޮށްފައިވާ ސަންޖޭ ލީލާ ބަންސާލީ ޑައިރެކްޓް ކޮށްފައިވާ ''ބާޖީރާއޯ މަސްތާނީ'' އަކީ 18 ވަނަ ގަރުނުގައި ހިނގާފައިވާ ލޯބީގެ ހާދިސާއެއްގެ މައްޗަށް ބިނާކޮށް 2015 ވަނަ އަހަރު ހަދާފައިވާ ފިލްމެކެވެ. ގިނަ ފަންނާނުންތަކެއް ހަރަކާތްތެރިވެފައިވާ މި ފިލްމު ހަދާފައިވަނީ 1.25 ބިލިއަން ރުޕީސް (17 މިލިއަން ޑޮލަރު) ގެ ބަޖެޓަކުންނެވެ. މި ފިލްމު ވަނީ ގިނަ އެވޯޑް ތަކެއް ހޯދާފައެވެ.