އިންޑޮނީޝިއާ ބަލިކޮށް ގައުމީ އަންހެން ޓީމަށް ތިންވަނަ، ސާބަސް!

އިންޓަރނޭޝަނަލް ވިމެންސް ކުއަޑްރަންގިއުލާ މުބާރާތުގައި ޕެނަލްޓީ ޖަހައިގެން އިންޑޮނީޝިއާ ބަލިކޮށް ރާއްޖޭގެ އަންހެން ގައުމީ ފުޓުބޯޅަ ޓީމުން މުބާރާތުގެ ތިން ވަނަ ހޯދައިފިއެވެ.

ސިންގަޕޫރުގައި ކުރިޔަށްދާ މި މުބާރާތުގައި ވާދަކުރަނީ ރާއްޖެ އާއި ސިންގަޕޫރުގެ އިތުރުން އިންޑޮނީޝިއާ އާއި ލަގްޒަމްބާގެވެ. މުބާރާތުގައި ކުޅުނު ފުރަތަމަ މެޗުން ސިންގަޕޫރާ ވާދަކޮށް ރާއްޖެ ވަނީ 0-1 ގެ ނަތީޖާ އިން ބަލިވެފައެވެ.

މުބާރާތުގެ ޗެމްޕިއަންކަން ހޯދީ ލަގްޒަމްބާގެވެ. އެޓީމުން ޗެމްޕިއަންކަން ހޯދީ ފައިނަލުގައި ސިންގަޕޫރާ ވާދަކޮށް 0-4 ގެ ނަތީޖާ އިން މެޗު ކާމިޔާބުކޮށްގެންނެވެ.

މުބާރާތުގެ ޗެމްޕިއަންކަން ހޯދި ލަގްޒަމްބާގް - ފޮޓޯ: ސޯޝަލް މީޑިއާ

ސިންގަޕޫރުގައި ރާއްޖެ އާއި އިންޑޮނީޝިއާ ބައްދަލުކުރި ތިންވަނަ ހޮވާ މެޗުގެ ފުރިހަމަ ވަގުތު ހަމަވިއިރު ވެސް ދެޓީމު ވަނީ 0-0 ގެ ނަތީޖާ އިން އެއްވަރުވެފައެވެ.

އެގޮތުން ނަތިޖާ ނެރުމަށް ޖެހި ޕެނަލްޓީގައި ރާއްޖެ އިން ވަނީ 1-2 ގެ ނަތީޖާ އިން އިންޑޮނީޝިއާގެ މައްޗަށް ކުރި ހޯދާފައެވެ. ރާއްޖޭގެ ޕެނަލްޓީތައް ކާމިޔާބުކޮށްފައި ވަނީ ޝަހުލާ ތައުފީގާއި، މަރިޔަމް މިރުފަތުއެވެ.

އޯގަސްޓް މަހު ނިމިދިޔަ އޭޝިއަން ގޭމްސްގައި އިންޑޮނީޝިއާ އަތުން 0-6 އިން އަންހެން ޓީމު ބަލިވި އިރު، ދާދި ފަހުން ނިމުނު އޮލިމްޕިކް ކޮލިފައިންގައި އިންޑޮނީޝިއާ އާ ވާދަކޮށް ރާއްޖެ ބަލިވީ 1-3 އިންނެވެ.

ގައުމީ އަންހެން ޓީމު ފަހަކަށް އައިސް ހޯދަމުން އަންނަ ނަތީޖާތަކާ ގުޅިގެން ގިނަ ބައެއްގެ ތައުރީފު އެޓީމަށް ދަނީ އޮހެމުންނެވެ. އެގޮތުން މި ކާމިޔާބީއާ ގުޅިގެންވެސް ގިނަ ބަޔަކު އަންނަނީ އުފާފާޅުކޮށް ޓީމަށް މަރުހަބާ ކިޔަމުންނެވެ.