ބޮލީވުޑްގެ މަޝްހޫރު ތަރި ޝިލްޕާ ޝެޓީއާއި، އޭނާގެ ފިރިމީހާ ރާޖް ކުންދްރާ ރާއްޖެ އަތުވެއްޖެއެވެ.
ޝިލްޕާ ވަނީ އެދެމަފިރިންގެ ކައިވެންޏަށް 9 އަހަރު ފުރުމުގެ އުފާ ފާހަގަކުރުމުގެ ގޮތުން ޗުއްޓީ ހޭދަކޮށްލުމަށް ރާއްޖެއަށް އަންނަ ޚަބަރު ސޯޝަލް މީޑިއާގައި ހިއްސާ ކޮށްފައެވެ.
ޝިލްޕާ މިހާރު ރާއްޖެ އައިސްފައިވާއިރު، ރާއްޖޭގައި ހޭދަކުރާ ވަގުތުތައް އެނާގެ ފޭނުންނަށް ދައްކާލުމަށް ސޯޝަލް މީޑިއާގައި ރާއްޖޭގެ ރިސޯޓެއްގެ ސްޕާއެއްގެ ފޮޓޯއެއްވަނީ އާންމުކޮށްފައެވެ. ނަމަވެސް އެއީ ކޮން ރިސޯޓެއް ކަން ބަޔާންކޮށްފައެއް ނުވެއެވެ.
ޝިލްޕާ ވަނީ މިދިޔަ އޭޕްރީލް މަހުގައިވެސް ޗުއްޓީ ހޭދަކޮށްލުމަށް އާއިލާއާއެކު ރާއްޖެ އައިސްފައެވެ. އެފަހަރު އޭނާ ހުރީ ކަނުހުރާ މޯލްޑިވްސް ރިސޯޓުގައެވެ.
ބްރިޓިޝްގެ ރިއަލިޓީ ސީރީޒް "ސެލެބްރިޓީ ބިގް ބްރަދަރ" ގެ ބައިވެރިއެއްގެ ގޮތުގައި ޝިލްޕާ ބައިވެރިވެގެން އުޅެނިކޮށް އިނގިރޭސިވިލަތުގައި ވިޔަފާރި ކުރަމުން އަންނަ މަލްޓި މިލިއަނަރު ރާޖް އާއި ޝިލްޕާ ދިމާވެ، ކައިވެނިކޮށްފައިވަނީ 2009 ވަނަ އަހަރު އެވެ.
