ކިންގް ސަލްމާން މިސްކިތުގެ ސްޓަރަކްޗަރަލް ކޮންކްރީޓް މަސައްކަތް ނިމިއްޖެ
12 ނޮވެމްބަރު 2018 | ހޯމަ 21:11،އައު ސަރުކާރުން މިސްކިތުގެ މަސައްކަތް ހުއްޓާނުލައްވާ ކުރިއަށް ގެންދެވުމަށް ވަނީ އެދިފައި
ކިންގް ސަލްމާން މިސްކިތް
ސައުދީ ސަރުކާރުގެ ހިލޭ އެހީގެ ދަށުން މާލޭގައި އެއްފަހަރާ 6000 މީހުންނަށް ނަމާދުކުރެވޭ ގޮތަށް އަޅާ ކިންގް ސަލްމާން މިސްކިތުގެ އޮނިގަނޑުގެ (ސްޓަރަކްޗަރަލް ކޮންކްރީޓް) މަސައްކަތް ނިމިއްޖެއެވެ.
ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވީ ރާއްޖޭގެ އެންމެ ބޮޑު މިސްކިތުގެ ސްޓަރަކްޓަރަލްގެ ކޮންކްރީޓްގެ މަސައްކަތް ނިމިފައިވާ ކަމަށާއި، އައު ސަރުކާރުން މިސްކިތުގެ މަސައްކަތް ހުއްޓާނުލައްވާ ކުރިއަށް ގެންދެވުމަށްއެދޭ ކަމަށެވެ.
ޑރ މުއިއްޒު މިހެން ވިދާޅުވެފައިވާރު، އިންތިޚާބީ ރައީސް އިބްރާހިމް މުހައްމަދު ސޯލިހު ވަނީ ތަރައްގީގެ މަޝްރޫއުތައް ނުހުއްޓުވައި ކުރިއަށް ގެންދަވާނެ ކަމަށާއި، ރައްޔިތުންގެ ފައިދާއަށް މަސައްކަތް ކޮށްދެއްވާނެ ކަމުގެ ޔަގީންކަން ދެއްވާފައެވެ.
ސައޫދީ ރަސްގެފާނު ސަލްމާން ބިން އަބްދުލް އަޒީޒް "ކިންގް ސަލްމާން"ގެ ނަމުން ނަންދެވިފައިވާ މިމިސްކިތަކީ ރާއްޖޭގެ މިނިވަން ކަމަށް 50 އަހަރު ފުރުމުގެ މުނާސަބަތުގައި ސައުދީ ސަރުކާރުގެ އަޅާދޭން ނިންމި މިސްކިތެކެވެ. ހަ ފަންގިފިލާގެ މި މިސްކިތުގައި ކުތުބުހާނާއަކާއި، ގުރްއާނާއި ބެހޭ މަރުކަޒަކާއި، މަލްޓި-ޕާރޕަސް ހޯލަކާއި، ކިލާސްރޫމްތަކާއި، ޖަލްސާކުރާ މާލަންތަށް ހިމެނެއެވެ.
