ވޯޓު ކަރުދާސް ނައްތާލި މައްސަލަ ތަހުގީގުކޮށް ދިނުމަށް ޕީޕީއެމުން އެދިއްޖެ
އެކަން ކުރި ގޮތް އާންމުކޮށް ދިނުމަށް ފުލުހުންނަށް ގޮވާލި
ޕީޕީއެމުން ބޭއްވި ޕްރެސް ކޮންފަރެންސް
ރިޔާސީ އިންތިހާބުގެ ވޯޓު ކަރުދާސްތައް ނައްތާލީ އިންތިހާބާ ގުޅޭ މައްސަލަތަކެއް ފުލުހުން ތަހުގީގު ކުރަމުންދާ ދަނޑިވަޅެއްގައި ކަމަށް ބުނެ، ވޯޓު ކަރުދާސް ނައްތާލި މައްސަލަ ބަލައި ދިނުމަށް ފުލުހުންނަށް ޕީޕީއެމުން ގޮވާލައިފިއެވެ.
ރިޔާސީ އިންތިހާބުގައި ބޮޑު ފަރަގަކުން ނާކާމިޔާބުވި ރައީސް އަބްދުﷲ ޔާމީންގެ ޕީޕީއެމުން ނެރުނު ބަޔާނެއްގައި ބުނެފައި ވަނީ ވޯޓު ކަރުދާސްތަކަކީ އިލެކްޝަންސް ކޮމިޝަނާއި ފުލުހުން ގުޅިގެން ބަލަހައްޓަންޖެހޭ އަމާނާތެއް ކަމަށެވެ. ނަމަވެސް އިންތިހާބާ ގުޅޭ މައްސަލަތަކެއް ތަހުގީގު ކުރަމުންދާ ވަގުތެއްގައި އެ ކަރުދާސް ނައްތާލުމަކީ ބޮޑު ޖަރީމާއެއް ކަމަށް އެ ޕާޓީން ބުނެފައި ވެއެވެ.
ޕީޕީއެމްއިން ފުލުހުންނަށް ގޮވާލާފައި ވަނީ ވޯޓު ކަރުދާސް ނައްތާލި މައްސަލާގައި އީސީ ޖަވާބުދާރީ ކުރުވައި، އެކަން ތަހުގީގު ކުރުމަށް ފަހު، އެކަން ހިނގައިދިޔަ ގޮތުގެ މައުލޫމާތު އާންމު ކުރުމަށެވެ.
"އިންތިހާބާ ގުޅޭ މައްސަލަތަކެއް ތަހުގީގު ކުރެވެމުންދާ މިފަދަ މުހިންމު ވަގުތެއްގައި ވޯޓުކަރުދާސް ނައްތާލި ނައްތާލުން ފުލުހުން ތަހުގީގުކޮށް އީސީ ޖަވާބުދާރީ ކުރުވައި އަދި ކަންހިނގައިދިޔަ ގޮތުގެ މައުލުމާތު އާންމު ކުރުމަށް ފުލުހުންނަށް މި ޕާޓީން ގޮވާލަމެވެ،" ޕީޕީއެމްއިން ނެރުނު ބަޔާނުގައި ބުނެފައި ވެއެވެ.
ރިޔާސީ އިންތިހާބުގެ ނަތީޖާއަށް ބަދަލު އަންނާނެ ވަރުގެ ހެއްކެއް ހުށަހެޅިފައި ނުވާތީ، އިންތިހާބު ބާތިލު ކުރެވެން ނެތް ކަމަށް ސުޕްރީމް ކޯޓުން ހުކުމްކޮށްފައި ވަނިކޮށް ޕީޕީއެމުން ނެރުނު ބަޔާނުގައި އިންތިހާބުގައި އޮޅުވާލުންތަކާއި މަކަރާއި ހީލަތް ހަދާފައިވާ ކަމަށް ތުހުމަތުކޮށްފައި ވެއެވެ. އިންތިހާބުގައި ވޯޓު އޮޅުވާލުމަށް ހިންގި ކަންތައްތަކަކީ އިލެކްޝަންސް ކޮމިޝަނުން ރާވައިގެން ހިންގާފައިވާ ޖަރީމާއެއްކަން އެ ޕާޓީން ބުނެފައި ވެއެވެ.
ޕީޕީއެމުން އެ ބަޔާން ނެރެފައި ވަނީ ވޯޓް ކަރުދާސްތައް ނައްތާލި ސަބަބު ތަކުރާރުކޮށް އީސީން އޮޅުން ފިލުވައި ދީފައި ވަނިކޮށެވެ. އެ ކޮމިޝަނުން އަންގާރަ ދުވަހު ބޭއްވި ޕްރެސް ކޮންފަރެންސާއި އީސީގެ ރައީސް އަހުމަދު ޝަރީފު ކުރެއްވި ޓްވީޓުގައި ވެސް ވަނީ އެކަން ކިޔައިދީފައިވެއެވެ. ޝަރީފު ވިދާޅުވީ ވޯޓު ކަރުދާސް ނައްތާލީ ގާނޫނުގައި އެ ކަން ކުރަން ބުނެފައިވާ މުއްދަތަށް ވުރެ ވެސް ފަހުން ކަމަށާއި އެކަމާ ގުޅޭ މައްސަލައެއް ފުލުހުން ބަލަމުން އަންނަކަން އަންގާފައި ނެތް ކަމަށެވެ.
