މަސީހުގެ އިތުބާރު ނެތް ކަމުގެ މައްސަލަ މާދަމާއަށް އެޖެންޑާކޮށްފި
31 އޮކްޓޯބަރު 2018 | ބުދަ 11:46މާދަމާއަށް އެޖެންޑާ ކުރީ މިދިޔަ އަހަރު ހުށަހެޅި މައްސަލަ
ރައްޔިތުންގެ މަޖިލީހުގެ ރައީސް އަބްދުﷲ މަސީހު
ރައްޔިތުންގެ މަޖިލީހުގެ ރައީސް އަބްދުﷲ މަސީހު މުހައްމަދުގެ އިތުބާރު ނެތް ކަމުގެ ވޯޓުގެ މައްސަލަ ބުރާސްފަތި ދުވަހުގެ ރައްޔިތުންގެ މަޖިލީހުގެ ޖަލްސާއަށް އެޖެންޑާ ކޮށްފިއެވެ.
މާދަމާގެ ޖަލްސާއަށް އެޖެންޑާ ކޮށްފައި ވަނީ މިދިޔަ އަހަރު މަސީހާ ދެކޮޅަށް ހުށަހެޅި އިތުބާރު ނެތް ކަމުގެ މައްސަލައެވެ. މިދިޔަ އަހަރުގެ ޖުލައި ތިން ވަނަ ދުވަހު މަސީހާ ދެކޮޅަށް ހުށަހެޅި އެ މައްސަލާގައި ސޮއި ކުރައްވާފައި ވަނީ 45 މެމްބަރުންނެވެ.
މަސީހުގެ އިތުބާރު ނެތް ކަމުގެ މައްސަލާގައި ބުރާސްފަތި ދުވަހު ބާއްވާ މަޖިލީހުގެ ޖަލްސާ އެޖެންޑާކޮށްފައި ވަނީ ބުރާސްފަތި ދުވަހުގެ ރޭ 8:30އަށެވެ.
ކެލާ ދާއިރާގެ މެމްބަރު އަލީ އާރިފު މުގައްރިރުކަން ކުރައްވާ އާންމު ކޮމެޓީން ނިންމާފައި ވަނީ އެ މައްސަލައިގައި ޖަވާބުދާރީވުމަށް މަސީހަށް އިތުރު ވަގުތު ވެސް ނުދިނުމަށެވެ.
މަސީހްގެ އިތުބާރު ނެތްކަމުގެ މައްސަލައެއް މި މަހުގެ ތެރޭގައި 51 މެންބަރުންގެ ސޮޔާ އެކު ވަނީ މަޖިލީހަށް ހުށަހަޅާފައެވެ.
މަސީހުގެ އިތުބާރު ނެތްކަމުގެ މައްސަލަ އެންމެ ފުރަތަމަ ހުށަހެޅީ މާޗް 8، 2017 ގައެވެ. އެ ފަހަރު ހުށަހެޅި 26 މެމްބަރުންގެ ސޮޔާއެކު އެވެ. އެ މައްސަލަ މަޖިލީހަށް ހުށަހެޅި ދުވަހު އިދިކޮޅު ފަރާތްތައް މަޖިލީހުން ބޭރުކޮށް، ރޯލް ކޯލް ވޯޓް ނަގައި މައްސަލަ ބޭރު ކޮށްލިއެވެ. ދެ ވަނަ ފަހަރަށް މަސީހުގެ މައްސަލަ ހުށަހެޅީ 31 މެމްބަރުންގެ ސޮޔާ އެކު އޭޕްރީލް 9 ގައެވެ. އެ ފަހަރު އެ މައްސަލަ މަޖިލީހުން ބޭރުކޮށްލީ، މަޖިލީހުގެ ގަވާއިދަށް ކުއްލިއަކަށް ގެނައި ބަދަލާއެކުއެވެ. ގަވާއިދަށް ގެނައި ބަދަލުގައި ބުނެފައި ވަނީ އިތުބާރު ނެތްކަމުގެ މައްސަލަ ހުށަހެޅޭނީ 42 މެމްބަރުންގެ ސޮޔާއެކުއެވެ.
