ވާދަވެރި ކުޅުމަކަށް ފަހު ފޮނަދޫ މެދުއަވަށު ސްޕޯޓްސް ކްލަބް ބަލިކޮށް ޕޮލިސް ކްލަބުން ގައުމީ ވޮލީ ބޯލް މުބާރާތުގެ އަންހެން ބައިގެ ތަށި އުފުލާލައިފިއެވެ.

ޒުވާނުންގެ މަރުކަޒުގެ އެތެރޭ ކޯޓުގައި ބުދަ ދުވަހުގެ ރޭ ކުޅުނު މެޗު ފޮނަދޫއާ ވާދަކޮށް ޕޮލިހުން މެޗު ކާމިޔާބުކުރީ ތިން ސެޓު ދެ ސެޓުންނެވެ. މެޗުގެ ފުރަތަމަ ސެޓް 15-25 އިން ފޮނަދޫ ކާމިޔާބުކުރިއިރު، ދެވަނަ ސެޓް 19-25 އިން ޕޮލިހުން ވަނީ ކާމިޔާބުކޮށްފައެވެ.

ތިންވަނަ ސެޓް 17-25 އިން ޕޮލިސް ގެންގޮސް ލީޑު ހޯދި ނަމަވެސް ހަތަރުވަނަ ސެޓު ފޯރިގަދަ ކުޅުމަކަށް ފަހު 24-26 އިން ފޮނަދޫއިން ވަނީ ގެންގޮސްފައެވެ. ނަތީޖާ ނެރުމަށް ކުޅުނު ފަހު ސެޓުގައި 08-15 ގެ ނަތީޖާއަކުން ފޮނަދޫގެ މައްޗަށް ޕޮލިހުން ވަނީ ކުރިހޯދާފައެވެ.

ފާއިތުވެދިޔަ ދެ ގައުމީ މުބާރާތުގައި ވެސް ޕޮލިސް ވަނީ ފައިނަލުން ބަލިވެފައެވެ. ޕޮލިސް ފައިނަލުން އެ ދެ ފަހަރު ވެސް ބަލިވީ ފުވައްމުލަކު މިސްކިތްމަގު އެންމެންގެ ގުޅުން އަތުންނެވެ.

މުބާރާތުގެ މޮޅު ކުޅުންތެރިޔާގެ މަގާމް ހޯދީ ޕޮލިހުގެ ހައްވަ އެވެ. ޑްރީމްޓީމުގައި ހިމެނެނީ އޭނާގެ އިތުރުން ނުހާ އާއި ފޮނަދޫގެ ޝައްފަ އާއި ޖޫޒާން އާއި މާޖިދާ އަދި ހައްވާ ސަހާގެ އިތުރުން ކްލަބް ވެމްކޯގެ ޝައުފާ އާދަމް އެވެ. މުބާރާތުގެ އެންމެ އުއްމީދީ ކުޅުންތެރިއަކަށް ޕޮލިހުގެ ޝަހާ ހޮވުނުއިރު، ފެއާ ޕްލޭ ޓީމަކީ ޕޮލިހެވެ.