ގައުމީ ބެޑްމިންޓަން މުބާރާތް: ސިންގަލްސް ފިރިހެން ބައިގެ ޗެމްޕިއަންކަން އަޖުފާން ހޯދައިފި

މައިލޯ 45 ވަނަ ގައުމީ ބެޑްމިންޓަން މުބާރާތުގެ ފުރަތަމަ ޑިވިޝަންގެ ފިރިހެން ސިންގަލްސް ބައިގެ ޗެމްޕިއަންކަން މުހައްމަދު އަޖުފާން ހޯދައިފިއެވެ.

އަޖުފާން ޗެމްޕިއަންކަން ހޯދީ އަންގާރަ ދުވަހުގެ ރޭ ކުރިއަށްދިޔަ ފައިނަލް މެޗުގައި ނިބާލް އަހުމަދާ ވާދަކޮށްގެންނެވެ. އަޖުފާން ސެޓްތައް ގެންދިޔައީ 12-21 އަދި 04-21 އިންނެވެ. މިއީ މުބާރާތުގެ ތަށި އަޖުފާން ހޯދި އަށް ވަނަ ފަހަރެވެ.

އަންގާރަ ދުވަހުގެ ރޭ ކުރިޔަށްދިޔަ މިކްސް ޑަބަލްސްގެ ޗެމްޕިއަންކަން ހޯދީ ޒަޔާން އާއި ފާތިމަތު ނަބާހާ ބަލިކުރުމަށް ފަހު އަހުމަދު ތޯއިފް އާއި ނަބީގެ ޕެއާއެވެ. މެޗުގެ ސެޓްތައް ދިޔައީ 22-20 އަދި 17-21 އިންނެވެ.

އަންގާރަ ދުވަހު ހަވީރު ކުރިޔަށްދިޔަ ފުރަތަމަ ޑިވިޝަންގެ ސިންގަލްސް ބައިގެ ޗެމްޕިއަންކަން ހޯދީ ފާތިމަތު ނަބާހާއެވެ. ޗެމްޕިއަންކަން ނަބާހާ ހޯދީ ފައިނަލުގައި އާމިނަތު ޝަހުރުނާޒް ބަލިކުރުމަށް ފަހުއެވެ.

މުބާރާތުގެ މެންސް ޑަބަލްސް ބައިގެ ޗެމްޕިއަންކަން ހޯދީ ހަސަން އަޝްފީން އާއި އިބްރާހިމް ޝާމިއުއެވެ. މި ދެ ކުޅުންތެރިން ޗެމްޕިއަންކަން ހޯދީ ފައިނަލުގައި ނަޝްފާން މުހައްމަދު އަދި ނަޝީއު ޝަރަފުއްދީން ބަލިކުރުމަށް ފަހުއެވެ.

މުބާރާތުގެ ވިމެންސް ޑަބަލްސް ބައިގެ ޗެމްޕިއަންކަން ހޯދީ އާމިނަތު ނަބީހާ އާއި ފާތިމަތު ނަބާހާއެވެ. މި ދެ ކުޅުންތެރިން ޗެމްޕިއަންކަން ހޯދީ ފައިނަލުގައި އައިޝަތު އަފްނާން އާއި އާމިނަތު ޝަހުރުނާޒް ބަލިކުރުމަށް ފަހުއެވެ.

މި ފަހަރުގެ ޓީމް އިވެންޓްގެ ޗެމްޕިއަންކަން ހޯދީ ސީއެސް ސްޕޯޓްސްއެވެ. ހުރިހާ މެޗަކުން މޮޅުވެގެން ސީއެސް ތަށި އުފުލާލީ ފައިނަލުގައި ޔުނައިޓެޑް ވިކްޓަރީގެ މައްޗަށް ކުރިހޯދައިގެންނެވެ. ޓީމް އިވެންޓުގެ ޗެމްޕިއަންކަން އެންމެ ފަހުން ހަ ފަހަރު ވެސް ހޯދީ އެޑްވޮކޭޓިން ދަ ރައިޓްސް އޮފް ޗިލްޑްރެން (އާކް) އިންނެވެ. އެ ޓީމުން މި ފަހަރުގެ މުބާރާތުގައި ބައިވެރިއެއް ނުވެއެވެ.