ގައުމީ ބެޑްމިންޓަން މުބާރާތް: ސިންގަލްސް އަންހެން ބައިގެ ޗެމްޕިއަންކަން ނަބާހާ ހޯދައިފި
ނަބާހާ ޗެމްޕިއަންކަން ހޯދީ ޝަހުރުނާޒް ބަލިކުރުމަށްފަހު
ގައުމީ ބެޑްމިންޓަން މުބާރާތުގެ ތެރެއިން
މައިލޯ 45 ވަނަ ގައުމީ ބެޑްމިންޓަން މުބާރާތުގެ ފުރަތަމަ ޑިވިޝަންގެ ސިންގަލްސް އަންހެން ބައިގެ ޗެމްޕިއަންކަން ފާތިމަތު ނަބާހާ ހޯދައިފިއެވެ.
އަންގާރަ ދުވަހު ހަވީރު ކުޅުނު އަންހެން ސިންގަލްސް ބައިގެ ޗެމްޕިއަންކަން ނަބާހާ ހޯދީ ފައިނަލުގައި އާމިނަތު ޝަހުރުނާޒް ބަލިކުރުމަށްފަހުއެވެ.
މުބާރާތުގެ މެންސް ޑަބަލްސް ބައިގެ ޗެމްޕިއަންކަން ހޯދީ ހަސަން އަޝްފީން އާއި އިބްރާހިމް ޝާމިއުއެވެ. މި ދެ ކުޅުންތެރިން ޗެމްޕިއަންކަން ހޯދީ ފައިނަލުގައި ނަޝްފާން މުހައްމަދު އަދި ނަޝީއު ޝަރަފުއްދީން ބަލިކުރުމަށްފަހުއެވެ.
މުބާރާތުގެ ވިމެންސް ޑަބަލްސް ބައިގެ ޗެމްޕިއަންކަން ހޯދީ އާމިނަތު ނަބީހާ އާއި ފާތިމަތު ނަބާހާއެވެ. މި ދެ ކުޅުންތެރިން ޗެމްޕިއަންކަން ހޯދީ ފައިނަލުގައި އައިޝަތު އަފްނާން އާއި އާމިނަތު ޝަހުރުނާޒް ބަލިކުރުމަށްފަހުއެވެ.
މުބާރާތުގައި އަންގާރަ ދުވަހުގެރޭ މެންސް ސިންގަލްސް އަދި މިކްސް ޑަބަލްސް ބައިގެ ފައިނަލް މެޗުތައް ކުރިޔަށްދާނެއެވެ.
ފިރިހެން ސިންގަލްސް ބައިގެ ފައިނަލުގައި ވާދަކުރާނީ މުހައްމަދު އަޖުފާން އާއި ނިބާލް އަހުމަދުއެވެ. މިކްސް ޑަބަލްސް ބައިގެ ފައިނަލުގައި ވާދަކުރާނީ ހުސެއިން ޒަޔާން އާއި ފާތިމަތު ނަބާހާގެ ޕެއާ އަދި ތޯއިފް މުހައްމަދު އާއި އާމިނަތު ނަބީހާގެ ޕެއާއެވެ.
