މަސީހުގެ އިތުބާރު ނެތް ކަމުގެ މައްސަލަ ހުށަހަޅަން ސޮއި ހޯދަން ފަށައިފި
9 އޮކްޓޯބަރު 2018 | އަންގާރަ 08:08އެމްޑީއޭ މެމްބަރުންގެ ސޮއި ލިބޭނެ ކަމަށް އުންމީދު ކުރަން: ރޮޒައިނާ
މަސީހުގެ އިތުބާރު ނެތް ކަމުގެ މައްސަލަ 2017 ވަނަ އަހަރު މަޖިލީހަށް ހުށަހެޅުމަށް މަސައްކަތް ކުރެއްވި ޕާޓީތަކުގެ އިސް ބޭފުޅުން
ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތް ކަމުގެ މައްސަލަ މަޖިލީހަށް ހުށަހެޅުމަށްޓަކާ ބޭނުންވާ ސޮއި ހޯދުމުގެ މަސައްކަތް ގުޅިފައިވާ ޕާޓީތަކުން ފަށައިފިއެވެ.
މަސީހުގެ އިތުބާރު ނެތް ކަމުގެ މައްސަލަ ހުށަހަޅަން ސޮއި ހޯދަން ފަށާފައިވާކަން އެމްޑީޕީގެ ޕާލަމެންޓްރީ ގްރޫޕުގެ ނައިބު ލީޑަރު ރޮޒައިނާ އާދަމް ވަނީ ރާއްޖެއެމްވީއަށް ކަށަވަރުކޮށްދެއްވާފައެވެ. ރޮޒޭ ވިދާޅުވީ ގުޅިފައިވާ ޕާޓީތަކުގެ މަޖިލިސް މެމްބަރުން މަސީހާ ދެކޮޅަށް ސޮއި ކުރައްވަން ފަށްޓަވާފައިވާ ކަމަށާއި ސަރުކާރު ކޯލިޝަނުން ވަކިވި އެމްޑީއޭ މަޖިލިސް މެމްބަރުންގެ ސޮއިވެސް މަސީހާ ދެކޮޅަށް ލިބޭނެ ކަމަށް އުންމީދު ކުރައްވާ ކަމަށެވެ.
އެމްޑީއޭ މަޖިލިސް މެމްބަރުންގެ އަދަދަކީ ފަހެކެވެ. ގުޅިފައިވާ ޕާޓީތަކުގެ މަޖިލިސް މެމްބަރުންގެ އަދަދަކީ 35 އެވެ.
މަސީހާ ދެކޮޅަށް އިތުބާރު ނެތް ކަމުގެ މައްސަލަ ހުށަހެޅުމަށް އެންމެ މަދުވެގެން 42 މެމްބަރުންގެ ސޮއި ބޭނުންވާނެއެވެ. މިއީ މަސީހާ ދެކޮޅަށް އިތުބާރު ނެތް ކަމުގެ މައްސަލަ ހުށަހަޅާ ހަތަރު ވަނަ ފަހަރެވެ.
އިތުބާރު ނެތް ކަމުގެ މައްސަލަ މަސީހާ ދެކޮޅަށް އެންމެ ފަހުން ހުށަހެޅި ފަހަރު ސަރުކާރާއި އިލެކްޝަންސް ކޮމިޝަނާ ގުޅިގެން ވަނީ 12 މެމްބަރުންގެ ގޮނޑިއާމެދު ސުވާލު އުފައްދައި، މައްސަލަ ހުއްޓުވާފައެވެ. ނަމަވެސް ހަތަރު މެމްބަރެއްގެ ގޮނޑީގެ ސައްހަކަން ސުޕްރީމް ކޯޓުން ހޯމަ ދުވަހު ވަނީ ކަށަވަރުކޮށްދީފައެވެ. އެއާއެކު ބާކީ ތިއްބެވި އަށް މެމްބަރުންގެ މެންބަރުކަންވެސް ސަލާމަތްވާނެ ކަމުގެ ޔަގީންކަން ލިބިފައިވާ ކަމަށް ގުޅިފައިވާ ޕާޓީތަކުން ދަނީ ބުނަމުންނެވެ.
