ރާއްޖެއިން ބޭރުގައި ދިރިއުޅޭ ދިވެހިން ވޯޓްލުމަށް ރީރަޖިސްޓްރީ ކުރުމަށް އެމްބެސީތަކަށް ހުށައަޅާ ފޯމް ރަޖިސްޓްރީ ނުވެ ގިނަ ދުވަސްތަކެއްވާ ކަމުގެ ޝަކުވާ ލިބެމުންދާ ކަމަށް ގުޅިފައިވާ ސިޔާސީ ޕާޓީތަކުގެ ފަރާތުން އިންތިހާބުގައި ވާދަކުރައްވާ އެމްޑީޕީގެ ކެނޑިޑޭޓް އިބްރާހިމް މުހައްމަދު ސޯލިހު (އިބޫ) ވިދާޅުވެއްޖެވެ.
މެލޭޝިއާ އާއި ސިންގަޕޫރަށް ކުރެއްވި ދެ ދުވަހުގެ ކެމްޕެއިން ދަތުރުފުޅު ނިންމާލެއްވުމަށް ފަހު ބުރާސްފަތި ދުވަހު މާލެ ވަޑައިގެން ނޫސްވެރިންނަން މައުލޫމާތު ދެއްވަމުން އިބޫ ވިދާޅުވީ ރީރަޖިސްޓްރީ ކުރުމަށް އެ ދެގައުމުގެ އެމްބެސީތަށް ހުށައަޅާ ފޯމްތަށް ރަޖިސްޓްރީނުވެ ގިނަ ދުވަސްތަކެއްވާކަމުގެ ޝަކުވާ ލިބިފައިވާ ކަމަށެވެ. އެއީ ކަންބޮޑުވެލައްވާ ކަމެއްކަން ފާހަގަކުރައްވަމުން އިބޫ ވިދާޅުވީ ވޯޓުފޮށި ބަހައްޓާ ގައުމުތަކުގެ އެމްބެސީތަކަށް ހުށައަޅާ ރީރަޖިސްޓްރީ ފޯމްތަށް އަވަހަށް އިލެކްޝަން ކޮމިޝަނަން ފޮނުވާ ރީރަޖިސްޓްރީޝަންގެ ކަންކަން ނިންމާދެއްވުމަށް އެދިވަޑައިގަންނަވާ ކަމަށެވެ.
"ރީރަޖިސްޓްރީކުރަން އެމްބަސީތަކަށް ހުށައަޅާ ފޯމްތަށް ރަޖިސްޓްރީ ނުވެ ގިނަ ދުވަސްވާ ޝަކުވާ އެބަ އާދޭ އަޅުގަނޑުމެންނަށް، އެހެންވީމަ އެއާއި ދޭތެރޭގައި ކަންބޮޑުވުންތަކެއް އެބަހުރި، އަޅުގަނޑުމެންގެ އެދުމަކީ އެމްބެސީތަކުންވެސް ރައްޔިތުން މި ހުށައަޅާ ފޯމްތަށް ވީހާވެސް އަވަހަކަށް އިލެކްޝަން ކޮމިޝަނަން ފޮނުވާ، އޭގެ ރަޖިސްޓްރޭޝަން ކަންކަން ނިންމާދިނުން، އެހެންނޫނީ ރައްޔިތުންނަން ވޯޓުލާން ތައްޔާރަށް ތިބި އެފަރާތްތަކަށް މީގެ ކަންބޮޑުވުންތަކެއް އެބަ އާދޭ" މެލެޝީއާއި ސިންގަޕޫރުގައި ކެމްޕެއިން ހިންގާ އިސްފަރާތްތަކާއި ބައްދަލުކުރެއްވުމަށްފަހު މާލެ ވަޑައިގެން އިބޫ ވިދާޅުވިއެވެ.
އެފަދަ ޝައްކެއް ރާއްޖެއިން ބޭރުގައި ދިރިއުޅުއްވާ ރައްޔިތަކަށް ކުރެވޭނަމަ އަލުން ފޯމެއް ފުރުއްވާ ޔަގީންކަން އޮންނަ ފަރާތެއް މެދުވެރިކޮށް ކުރިއަށް ގެންދިއުމަށް އިބޫ އެދިވަޑައިގެންނެވިއެވެ.
މި ދަތުރުގައި މެލޭޝިއާ އަދި ސިންގަޕޫރުގައި ކެމްޕެއިންގެ މަސައްކަތުގައި އިސްކޮށް ހަރަކާތްރިވާ މީހުންނާއި ބައްދަލުކުރެއްވުމުގެ އިތުރުން، ރާއްޖޭގައި އިންވެސްޓްކޮށްފައިވާ ބޭރުގެ ފަރާތްތަށް އެމަނިކުފާނާއި ބައްދަލުކުރައްވާ ގުޅިފައިވާ ސިޔާސީ ޕާޓީތަކުގެ ސިޔާސަތުތަށް އޮޅުންފިލުވި ކަމަށް އިބޫ ވިދާޅުވިއެވެ.
ރީރަޖިސްޓްރީ ކުރުމަށް ގިނަ ފޯމްތަކެއް އިލެކްޝަން ކޮމިޝަނަން ހުށައެޅުމުން ވާނުވާނޭގި ދާތީ ކަންބޮޑުވުން ފާޅުކުރައްވާ އިބޫ ވިދާޅުވީ އެ ކަމާއި ދޭތެރޭގައި ހިއުމަން ރައިޓްސް ކޮމިޝަނާއި ކަމާއި ބެހޭ މުވައްސަސާތަށް ހަނު ތިބުމަކީ ޝައްކުތަކެއް އުފެދެއް ދިމާވާ ކަމެއް ކަމަށެވެ.
"މިކަންތައްތަށް ބަލަންޖެހޭ ފަރާތްތަކުން ބަލާ، ވީހާވެސް އަވަހަކަށް މިކަން ހަލުވިކޮށް ކުރެވޭނެ ގޮތެއް އިންތިޒާމް ކުރުމަކީ ކުރިއަށް އޮތް އިންތިޚާބު އިންސާފުވެރިކަމާއި އެކީގައި ކުރިއަށް ގެންދިއުމަށް މުހިންމުކަމެއް ކަމުގައި އަޅުގަނޑު ދެކެން " އިބޫ ވިދާޅުވިއެވެ.
ވޯޓުލުމުގެ ޙައްގަށް ސަރުކާރުންނާއި އިލެކްޝަން ކޮމިޝަނުން އަރައިގަންނަމުންދާ ކަމަށް ބުނެ ގުޅިފައިވާ ސިޔާސީ ޕާޓީތަކުން ވަނީ ހިއުމަން ރައިޓްސް ކޮމިޝަނާއި ވެސް ބައްދަލުކޮށްފައެވެ. އިބޫ މާލެ ވަޑައިގެންނެވުމާއި އެކު ކެމްޕެއިން ހަރަކާތްތަށް އިތުރަށް ރޭފިވައިވާ ގޮތަށް ކުރިއަށް ގެންދަވާނެއެވެ. އެގޮތުން ހުކުރު ދުވަހު މާލޭގައި ގުޅިފައިވާ ސިޔާސީ ޕާޓީތަކުގެ ފަރާތުން ޕޯސްޓަރު ހަރުކުރުމުގެ ހަރަކާތެއް ކުރިއަށް ގެންދަން ނިންމާފައިވާއިރު، ކެމްޕެއިން ދަތުރެއްގައި މި ހަފްތާގައި އިބޫ ތ އަތޮޅަށާއި ލ. އަތޮޅަށް ވަޑައިގަންނަވާނެއެވެ.
