ގުޅިފައިވާ ސިޔާސީ ޕާޓީތަކުގެ ރަނިންގ މޭޓް ކަމަކީ ކާށިދޫ ދާއިރާގެ ރައްޔިތުން ނިމިދިޔަ ރައްޔިތުންގެ މަޖިލީހުގެ އިންތިހާބުގައި އެމަނިކުފާނަން ތާއިދުކޮށް އިންތިހާބުކުރެއްވުމުން ލިބިވަޑައިގެންނެވި ފުރުސަތެއް ކަމަށް ފައިސަލް ވިދާޅުވެއްޖެއެވެ.
އެމްޑީޕީގެ ރިޔާސީ ކެނޑިޑޭޓް އިބްރާހިމް މުހައްމަދު ސޯލިހު (އިބޫ)ގެ ރަނިން މޭޓް ހުކުރުދުވަހު ހެނދުނު ކާށިދޫ އަށް ވަޑައިގެން އެރަށުގެ ރައްޔިތުންނާއި ވާހަކަ ދައްކަވަމުން ވިދާޅުވީ ކުރިއެކޭ އެއްގޮތަށް އެމަނިކުފާނު މަސައްކަތް ކުރައްވަނީ ތަފާތުކުރުމެއް ނެތި ހުރިހާ ރައްޔިތުންގެ އަޑު އަހާއިގެން ކަމަށެވެ.
"އަޅުގަނޑުގެ ފުރަތަމަ ދަތުރުގައި ކާށިދޫގައި ތިޔަ ބޭފުޅުންނާ ބައްދަލުވި ދުވަހު އަޅުގަނޑު ފުރަތަމަ ވެސް ދެންނެވި ގޮތަށް، އަޅުގަނޑު އިރާދަކުރެއްވިއްޔާ މަސައްކަތް ކުރާނީ މުޅި މުޖުތަމައުގެ މައްސަލަހަތަށް. މުޅި މުޖުތަމަގެ ކުރިއެރުމަށް" ބަނދަރު މަތީގައި ހުންނަވައި ކާށިދޫގެ ރައްޔިތުންނާ ވާހަކަ ދައްކަވަމުން ފައިސަލް ވިދާޅުވިއެވެ.
ކާށިދޫ ދާއިރާއަށް ދިމާވެފައިވާ އެންމެ ބޮޑު އެއް މައްސަލަކީ ސިއްހީ މައްސަލަކަން ފާހަގަކުރައްވަމުން ފައިސަލް ވިދާޅުވީ ގުޅިފައިވާ ސިޔާސީ ޕާޓީތަކުގެ ވެރިކަމެއްގައި ރާއްޖޭގެ ސިއްހީ ނިޒާމް ޙަރުދަނާ ކުރައްވާނެ ކަމަށެވެ. އަދި ކުރިއަކޭ އެއްގޮތަށް މަސައްކަތް ކުރައްވާ އުސޫލުން އިޖްތިމާއީ ކަންކަމުމުގައި އެމަނިކުފާނު މަސައްކަތް ކުރައްވާނެ ކަމަށް ފައިސަލް ވިދާޅުވިއެވެ. ރައްޔިތުން މާޔޫސްވުމެއް ނެތި ކުރިއަށް އޮތް ރިޔަސީ އިންތިހާބު ކާމިޔާބުކޮށްދިނުމަށް ގަދައަޅައި މަސައްކަތް ކުރެއްވުމަށް ފައިސަލް އެދިވަޑައިގެންނެވިއެވެ.
"އަޅުގަނޑަށް ފެނޭ މި ރަށުގެ ސިއްހީ ހާލަތު. އަދި ދިވެހި ރާއްޖޭގެ ކޮންމެ ރަށެއްގެ ސިއްހީ ހާލަތު ވެސް. އަޅުގަނޑު ގަބޫލުކުރާ ގޮތުގައި ދިވެހި ރާއްޖެ ތަރައްގީވެގެންދާނީ ރާއްޖޭގެ ކޮންމެ ރަށަކަށް ވަކި ވަކިން އަޅާލެވިގެން. ރާއްޖެއަކީ ހުރިހާ ރަށްތަކަށް ހިމެނޭ ގޮތަށް އޮންނަ ގައުމެއް ކަމަށް ދެކިގެން،" ފައިސަލް ވިދާޅުވިއެވެ.
ފައިސަލް ކާށިދޫއަށް ވަޑައިގެންނުވުމުން އެރަށުގެ ރައްޔިތުން ވަނީ ޙޫނު މަރުހަބާއެއް ދަންނަވާފައެވެ.
ހުކުރު ދުވަހުގެ މެންދުރު ކުރީގައި ކާށިދޫއަށް ފައިސަލް ވަޑައިގެން ދޮރުން ދޮރަށް ވަނީ ހިންގަވާފައެވެ. އަދި ހުކުރު ނަމާދަށް ފަހު ގާފަރަށް ވަޑައިގެން ދޮރުންދޮރަށް ހިންގަވައި އެރަށުގެ ކެމްޕޭން ޓީމުތަކާ ބައްދަލު ކުރެއްވުމަށް ވެސް ވަނީ ހަމަޖެހިފައެވެ. މި ދަތުރުފުޅަކީ އެމްޑީޕީގެ ރިޔާސީ ކެނޑިޑޭޓް އިބްރާހިމް މުހައްމަދު ސާލިހްގެ ރަނިންމޭޓް ކަމަށް ފައިސަލް ކަނޑައެޅުއްވި ފަހުން އެމަނިކުފާނު، ރައްޔިތުންގެ މަޖިލީހުގެ ގޮނޑި ފުރުއްވާ ދާއިރާގެ ރަށްތަކަށް ވަޑައިގަންނަވާ ފުރަތަމަ ފަހަރެވެ. މި ފަހަރުގެ ކެމްޕެއިން ދަތުރެއްގައި ފައިސަލް އެންމެ ފުރަތަމަ ވަޑައިގެންނެވީ އޭނާގެ އުފަންރަށް ކަމަށްވާ ފުވައްމުލަކު ސިޓީއަށާއި، އައްޑޫ ސިޓީއަށެވެ. ގުޅިފައިވާ ސިޔާސީ ޕާޓީތަކުގެ ޓީމަށް އެ ދެ ސިޓީން ހޫނު މަރުހަބާއެއް ކިޔާފައިވެއެވެ.
