އެމްޑީޕީގެ ކޮންގްރެސްގައި ބައިވެރިވުމަށް ކޮންގްރެސްގެ މަންދޫބުން އުކުޅަހަށް ފުރައިފިއެވެ.

އެމްޑީޕީގެ ކޮންގްރެސްގައި ބައިވެރިވުމުގެ ހައްގު 1184 މީހުނަން ލިބިފައިވާއިރު، ތަފާތު އެކި ސަބަބުތަކާ ހުރެ، ކޮންގްރެސްގައި ބައިވެރި ވާނީ ޖުމްލަ 800 އެއްހާ މަންދޫބުން ކަމަށް އެމްޑީޕީން ވަނީ އަންދާޒާ ކޮށްފައެވެ.

އަތޮޅުތެރޭގެ ރަށްތަކުން ހުކުރު ދުވަހު ކޮންގްރެސްގައި ބައިވެރިވުމަށް މާލެ އައި މަންދޫބުން ރަޖިސްޓްރޭޝަންގެ ކަންކަން ނިންމުމަށް ފަހު ފުރާފައި ވަނީ ހޮނިހިރު ދުވަހު ހެނދުނު 7:00 ގައި ހަ ނަންބަރު ޖެޓީންނެވެ. ލޯންޗުތަކުގައި އުޅަހަށްދާން ހަ ނަންބަރު ޖެޓީން ފުރާފައި ވަނީ އަތޮޅުތެރޭގެ ރަށްތަކުގެ އެމްޑީޕީ ކައުންސިލަރުންނާއި، ގޮފިތަކުގެ ރައީސުންގެ އިތުރުން އެޕާޓީގެ ކޮމެޓީތަކުގެ މެންބަރުންނެވެ. ހުދުކުލައިގެ ގަމީހާ ރީދު ޓައީ ކޮންގްރެސްގެ ފިރިހެން މަންދޫބުން ބޭންކޮށްގެން ތިބިއިރު، ކޮންގްރެސްގެ އަންހެން މަންދޫބުން ލައިގެންތިބީ ދިވެހި ހެދުމެވެ.

އެމްޑީޕީގެ ގައުމީ މަޖިލީހުގެ މެންބަރުން އުކުޅަހަށް ދިއުމަށް ފުރާފައި ވަނީ ހެނދުނު 6:00 ގައި ޓީޖެޓީ ސަރަހައްދުނެވެ. ކޮންގްރެސްގެ މަންދޫބުން އަނބުރާ މާލެ އައުމަށް ހަމަޖެހިފައި ވަނީ ހޮނިހިރު ދުވަހުގެ ރޭ ކޮންގްރެސްގެ ހަރަކާތްތައް  ނިންމާލުމަށްފަހުގައެވެ. 

އެމްޑީޕީގެ ކޮންގްރެސްއަކީ އެ ޕާޓީގެ އެންމެ މުހިއްމު ނިންމުންތައް ނިންމާ މަހާސިންތާއެވެ. އެ ބައްދަލުވުމުގައި އެ ޕާޓީގެ އަސާސީ ގަވާއިދަށް ވެސް އިސްލާހުތަކެއް ގެންނާނެއެވެ. އަދި ކުރިން ނިންމާފައިވާ ނިންމުންތަކަށް ބަދަލު ގެނައުމުގެ ބާރުގެ ވެސް ކޮންގްރެސްއަށް ލިބިގެންވެއެވެ.

އެމްޑީޕީގެ އެންމެ މުހިއްމު އެއް ގުނަވަން ކަމަށްވާ، އެ ޕާޓީގެ ކޮންގްރެސް ހޮނިހިރު ދުވަހުގެ 11:00 ގައި އުކުޅަހުގައި ފެށުމަށް ނިންމާފައިވާއިރު، މިއީ އެޕާޓީގެ "އާދަޔާ ހިލާފު ކޮންގްރެސް" އެކެވެ. ރިޔާސީ އިންތިހާބަށް 83 ދުވަހަށް ވެފައި ވަނިކޮށް، އެމްޑީޕީން ބާއްވާ ކޮންގްރެސް ވެގެންދާނީ އެ ޕާޓީގެ އާންމު މެމްބަރުންނަށް އުފާވެރި ނިންމުންތަކެއް ފާސްކުރާނެ ކޮންގްރެސްއަކަށް ކަމަށް އެމްޑީޕީން ބުނެއެވެ.

އެމްޑީޕީގެ ފުރަތަމަ ކޮންގްރެސް ބާއްވާފައި ވަނީ 2005 ވަނަ އަހަރުއެވެ. ދެ ވަނަ ކޮންގްރެސް ބާއްވާފައި ވަނީ 2010 ވަނަ އަހަރުއެވެ. އެ ދެ ކޮންގްރެސް ވެސް ދަރުބާރުގޭގައި ބާއްވާފައިވާއިރު، މިއީ މާލެއިން ބޭރުގައި ބާއްވާ ފުރަތަމަ ކޮންގްރެސްއެވެ.