އަދިވެސް އާމިރް ހާން އާ އެކު މަސައްކަތްކުރަން ބޭނުން: ސާންޔާ

އަދިވެސް އާމިރް ހާން އާ އެކު މަސައްކަތް ކުރަން ބޭނުން ކަމަށް ސާންޔާ މަލޯތްރާ ބުނެފިއެވެ.

ސާންޔާ ބުނީ ފިލްމީ ދާއިރާގައި އޭނާ އެންމެ މަސައްކަތްކުރާ ހިތްވަނީ ހަންސަލް މެހެތާ، ނިތޭޝް ތިވާރީ އަދި އާމިރް ހާން އާއެކުއެވެ. އޭނާ ބުނީ އާމިރް ހާން ދެން ޑައިރެކްޓް ކުރާ ފިލްމަކުން އޭނާއަށް ފުރުސަތު ލިބޭނެ ކަމަށް އޭނާ އުންމީދު ކުރާކަމަށެވެ. އަދި އާމިރް ހާން އަކީ ފިލްމުތައް ވަރަށް ޝައުގުވެރިކަމާއެކު އުފައްދާ ފަރާތެއް ކަމަށް ސާންޔާ ދެކެއެވެ.

2016 ވަނަ އަހަރު ނެރުނު ފިލްމް ޑަންގަލް އިން އާމިރްހާންގެ ފަރާތުން މަޝްހޫރު ވެގެންދިޔަ ތަރި ސާންޔާ މަލޯތްރާ ބުނީ އޭނާ ދަނީ އަދިވެސް އެ ދާއިރާގެ ކަންތައްތައް ދަސްކުރަމުން ކަމަށެވެ.

ސާންޔާ ބުނީ އޭނާ މިހާރު ދަނީ ރިތޭޝް ބަތްރާގެ ފޮޓޯގްރާފް އާ، އަޔުޝްމާން ކުރާނާ އާއެކު ބަދާއި ހޯ އަދި ވިޝާލް ބާރަދްވާޖް ގެ ޗުރިޔާ އަށް ތައްޔާރު ވަމުންނެވެ. ސާންޔާ ބުނީ އޭނާ އަކީ އެކްޓަރެއް ކަމަށް އަދިވެސް ގަބޫލު ނުކުރެވޭ ކަމަށާއި މިހާރު މޮޅު އެކްޓަރުންނާ ޑައިރެކްޓަރުންނާއެކު މަސައްކަތް ކުރުމުގެ ފުރުސަތު ލިބުމުން އޭނާ ވަރަށް އުފާވާ ކަމަށެވެ. އޭނާ ބުނީ އެކްޓް ކުރުމަކީ އޭނާއަށް ވަރަށް އާ ކަމެއް ކަމަށާއި ކޮންމެ ފިލްމަކުންވެސް އާ ކަންތައްތަކެއް ދަސްވެގެން ދާނެކަމަށެވެ.

ފިލްމީ އެއްވެސް ބެކްރައުންޑްއެއް ނެތް އެކްޓަރ އަކަށް ފިލް އިންޑަސްޓްރީގައި ފައިހަމަކުރުމަކީ އުނދަގޫ ކަމަކަށް ވާނެކަމަށް ސާންޔާ ދެކެއެވެ. ސާންޔާ ބުނީ ފިލްމް ޑަންގަލްގެ ކުރިން އޭނާ ކުރާނެ މަސައްކަތެއް ނުލިބިގެން އުޅުނެނިކޮށް އޭނާއަށް އޮޑިޝަންއަކަށް އެންމެ ފުރަތަމަ ގުޅީ ކާސްޓިން ޑައިރެކްޓަރ މުކޭޝް ޗާބްރާއެވެ.

ފިލްމް ޑަންގަލްގައި ސާންޔާ އަދާކޮށްފައިވަނި ވަނީ ބަބީތާ ކިޔާ ރެސްލާއެއް ރޯލެވެ.