ސިވިލް ކޯޓަށް އަދީބު ހުށަހެޅުއްވި މައްސަލަ ބޭރުކޮށްލައިފި
ބޭރުކޮށްލީ އިޖުރާއަތުތައް ފުރިހަމަ ނުވާ ކަމަށް ބުނެ
އަހުމަދު އަދީބު: ރާއްޖެއިން ބޭރުން ބޭސްފަރުވާއަށް އެދި ކުރި ދައުވަ ވަނީ ބޭރުކޮށްލާފައި
ރާއްޖެއިން ބޭރުން ބޭސްފަރުވާ ހޯއްދެވުމަށް، ކުރީގެ ނައިބު ރައީސް އަހުމަދު އަދީބު ސިވިލް ކޯޓަށް ހުށަހެޅުއްވި މައްސަލަ އެ ކޯޓުން ބޭރުކޮށްލައިފިއެވެ.
ރާއްޖެއިން ބޭރުން ބޭސްފަރުވާ ހޯއްދެވުމަށް އެދި އަދީބު ސިވިލް ކޯޓުގައި ދައުވާ ކުރީ "ގްލުކޮމާ" ކިޔާ ލޮލުގެ ބައްޔެއް ޖެހި، ރާއްޖެއިން ބޭރުން ބޭސްފަރުވާ ހޯދުމަށް ޑޮކްޓަރުން ލަފާ ދެއްވާފައިވާއިރު، ވެސް ދައުލަތުން އެކަންކަން ފުރިހަމަ ނުކުރާތީއެވެ. ކަރެކްޝަނަލް ސާވިސް އާއި ފުލުހުންނާއި ހޯމް މިނިސްޓްރީ މައްޗަށް އަދީބު އުފުލި ދައުވާއާ ގުޅިގެން ސިވިލް ކޯޓުގައި ދައުލަތް ތަމްސީލު ކުރީ ބަންޑާރަ ނައިބުގެ އޮފީހުގެ ވަކީލުންނެވެ.
އެ މައްސަލައިގެ ފުރަތަމަ އަޑުއެހުން ބޭއްވީ މިދިޔަ މަހުގެ 26 ވަނަ ދުވަހުއެވެ. އެ އަޑުއެހުމުގައި އަދީބު ވިދާޅުވެފައި ވަނީ ލޮލުގެ ފެނުން ގެއްލި ދިއުމުގެ ކުރިން، ގާޒީ ގޮތެއް ނިންމަވައި ދެއްވުމަށެވެ. އޭނާއަށް ލިބެންޖެހޭ ބޭސްފަރުވާ ދައުލަތުން ފުރިހަމަ ނުކުރުމަކީ މަދަނީ ހައްގެއް ގެއްލިގެން ދިއުން ކަމަށާއި ސިވިލް ކޯޓުގައި ދައުވާ އުފުލީ އޭނާގެ ލޮލުގެ ފެނުން ގެއްލި ދިއުމުގެ ކުރިން ހައްގު ހޯދުމަށް ކަމަށް އަދީބު ވިދާޅުވެފައިވެއެވެ.
ބަންޑާރަ ނައިބުގެ އޮފީހުގެ ވަކީލު ސިވިލް ކޯޓުގައި ވިދާޅުވެފައި ވަނީ އަދީބު ކުރެއްވި ދައުވާއަކީ އެ ކޯޓުގައި ކުރިއަށް ގެންދެވޭނެ ދައުވާއެއް ނޫން ކަމަށާއި ސަބަބަކީ ގައިދީންނަށް ރާއްޖެއިން ބޭރުން ފަރުވާ ހޯދުމަށް ފުރިހަމަ ކުރަންޖެހޭ އިޖުރާއަތުތައް އޭނާ ފުރިހަމަ ކުރައްވާފައި ނުވުމުން ކަމަށެވެ. އަދީބަށް ރާއްޖެއިން ބޭރުން ފަރުވާ ދިނުމަށް މޯލްޑިވްސް މެޑިކަލް ކައުންސިލުން ހުއްދަ ދީފައި ނުވާ ކަމަށް ބަންޑާރަ ނައިބުގެ އޮފީހުގެ ވަކީލު ވިދާޅުވެފައިވެއެވެ.
ގާޒީ ކުރެއްވި ހުކުމުގައި ބުނެފައި ވަނީ ގައިދީންނަށް ރާއްޖެއިން ބޭރުން ފަރުވާ ހޯދަންޖެހޭ ގަވާއިދުގެ އިޖުރާތުތައް އަދީބު ފުރިހަމަ ކުރައްވާފައި ނުވާ ކަން، ލިޔެކިޔުންތަކުންނާއި އެމަނިކުފާނުގެ ބަހުން ޝަރީއަތަށް ސާބިތުވާ ކަމަށެވެ.
އެކަމާ ގުޅިގެން އަދީބުގެ ގާނޫނީ ވަކީލު މޫސާ ސިރާޖު ވިދާޅުވީ އަދީބު ބަލަހައްޓަވަމުން ގެންދަވަނީ ދައުލަތުން ކަމަށާއި ފުރިހަމަ ކުރަންޖެހޭ އިޖުރާއަތުތައް ފުރިހަމަ ކުރަންޖެހޭނީ ދައުލަތުން ކަމަށެވެ. އަދި އެ އިޖުރާއަތު ފުރިހަމަ ނުވާ ކަމަށް ބުނެ، ގާޒީ ހުކުމް ކުރެއްވީ ގަވާއިދު ނެތް މާއްދާތަކެއް ހިމަނުއްވައިގެން ކަމަށް ސިރާޖު ވިދާޅުވިއެވެ.
"ބަންދުގައި ހުންނަ މީހާ ފުރިހަމަ ކުރަންޖެހޭ ހަމައެކަނި އިޖުރާއަތަކީ އޭނާ ބަލިވީމަ ތިމަންނަ ބަލިވެއްޖެއޭ ޑޮކްޓަރަށް ދައްކައިދޭށޭ ބުނުން. އެއީކީ އަޅުގަނޑުމެންނާ ބެހޭ ކަމެއް ނޫން. އޭގެ ބަދަލުގައި އަޅުގަނޑު ކަންބޮޑުވަނީ މައްސަލައިގެ މައުޟޫއަށް ދިއުމުގެ ބަދަލުގައި މިހާ ތާކުންތާކުން ނުޖެހޭ ހުކުމްތައް ކުރާތީ. ގަވާއިދަކަށް ހަވާލާދޭއިރުގައި ތިން ސަފްހާގެ ގަވާއިދަކަށް ހަވާލާދޭއިރުގައި ތަންކޮޅެއް ބޮޑަށް ބަލާލަންވާދޭއިރުގައި މީއިކީ ގަބޫލު ކުރެވޭނެ ކަމެއް ނޫން،" ސިރާޖު ވިދާޅުވިއެވެ.
އޭނާ ވިދާޅުވީ އަދީބުގެ ލޮލުގެ ހާލަތު ސީރިއަސްވަމުންދާއިރު ވެސް ޑޮކްޓަރަށް ނުދައްކަވާތާ ތިން މަސްވެފައިވާ ކަމަށާއި އެންމެފަހުން ޑޮކްޓަރަށް ދައްކާފައި ވަނީ ފެބްރުއަރީ މަހުގެ އެއް ވަނަ ދުވަހު ކަމަށެވެ. އޭގެ ފަހުން ޑޮކްޓަރަށް ނުދަނީ މެޑިކަލް ބޯޑަށް ހުށަހަޅައިގެން ރާއްޖެއިން ބޭރުން ފަރުވާ ހޯދަން ޑޮކްޓަރުން ލަފާދީފާނެތީ ކަމަށް ސިރާޖު ވިދާޅުވިއެވެ.
"ޑޮކްޓަރަށް ދެއްކީމަ ޑޮކްޓަރުން ލޯ ބަލާފަ މި ބުނަނީ ތިމަންނަމެންނަކަށް ނުވާނެއޭ. ޖެހޭނީ ރާއްޖެއިން ބޭރުން ފަރުވާ ހޯދަން ލިޔާށޭ. މިރާއްޖޭގައި ނެތޭ ނެތޭ ފަރުވާ ކުރެވޭކަށް،" ސިރާޖު ވިދާޅުވިއެވެ.
އަދީބު ހުށަހެޅުއްވި މައްސަލަ ސިވިލް ކޯޓުން އަންގާރަ ދުވަހު ބޭރުކޮށްލީ ދައުލަތުން ހުށަހެޅުއްވި ކަންކަމަކަށް ރިޔާއަތް ކުރެއްވުމަށްފަހުއެވެ.
