1 ކިލޯއަށް ވުރެ ގިނަ ކޮކޭން ދިރުވާލައިގެން ތައިލެންޑަށް އެތެރެކުރަން އުޅުނު އަންހެނަކު ހައްޔަރުކޮށްފި

ތައިލެންޑުގެ ރަށެއް ކަމަށްވާ ޕުކެޓަށް 1.2 ކިލޯގްރާމްގެ ކޮކޭން އެތެރެ ކުރަން އުޅުނު އައިވަރީ ކޯސްޓު ގެ އުމުރުން 27 އަހަރުގެ އަންހެނަކު ހައްޔަރުކޮށްފިއެވެ.

ޕުކެޓުގެ "ޕުކެޓް އިންޓަނޭޝަނަލް އެއާޕޯޓުގެ" އޮފިޝަލުންނަށް އޭނާ ކޮކޭން ތައިލެންޑަށް އެތެރެކުރަން އުޅޭކަން އެގުނީ އެއާޕޯޓުގެ އެކްސްރޭ އިން އެކަން އެގުމުންނެވެ. ބުދަ ދުވަހުގެ ރޭ އެ އަންހެން މީހާ ކޮކޭން އެތެރެ ކުރަން އުޅުނީ ދިރުވާލައިގެންކަމަށްވާއިރު، ކޮކޭން ހުރީ އޭނާ ބަނޑުތެރޭ ހުރި ޕެކެޓުތަކެއްގެ އެތެރޭގައެވެ.

އެއާޕޯޓުގެ އެކްސްރޭ އިން އެނގުނު ގޮތުގައި ކުޑަ ކޮކޭން ބަންދުކޮށްފައި ހުރި 60 ޕެކެޓު އަންހެން މީހާގެ ބަނޑުތެރޭގައި ހުއްޓެވެ. ތައިލެންޑުގެ އޮފީސް އޮފް ނާކޮޓިކިސް ކޮންޓްރޯލް ބޯރޑް އިން ބުނެފައިވަނީ އަންހެން މީހާ ކޮކޭން ތައިލެންޑަށް ގެނައީ ކޮކޭން ބޭނުންކުރާ މަހުޖަނުންތަކަކަށް ކަމަށް ބެލެވޭ ކަމަށެވެ.

ތައިލެންޑަށް ކޮކޭން އެތެރެ ކުރަން އުޅުނު އަންހެން މީހާ އަކީ ގަތަރުގެ ދޯހާ އިން އައި ފްލައިޓަކުން އައި މީހެކެވެ.