ޗެމްޕިއަންސް ލީގު: ސިޓީ ފަސްބެލުމެއް ނެތި ކުރިޔަށް، ނަޕޯލީ އުއްމީދު ދަމަހައްޓައިފި

ޔުއެފާ ޗެމްޕިއަންސް ލީގުގައި މެންޗެސްޓާ ސިޓީ ކުޅުނު މެޗު އެ ޓީމުން ކާމިޔާބުކުރިއިރު ނަޕޯލީ ވެސް މެޗު ކާމިޔާބުކޮށް ދެވަނަ ބުރުގެ އުއްމީދު ދަމަހައްޓައިފިއެވެ.

ޗެމްޕިއަންސް ލީގުގެ ގްރޫޕް 'އެފް' ގައި އަމިއްލަ ދަނޑުގައި ސިޓީ ވަނީ 1-0 ގެ ނަތީޖާއަކުން ނެދަލޭންޑްސްގެ ފެޔަނޫދް ބަލިކޮށްފައެވެ. ސިޓީގެ ފަރާތުން މޮޅު ކުޅުމެއް ފެނިގެންދިޔަ މި މެޗުގައިއ އެ ޓީމުން ވަނީ ނުރައްކާތެރި ގިނަ ހަމަލާތަކެއް އުފައްދާފައެވެ. އެ ޓީމުން ވަނީ މި މެޗުގައި ގިނަ ވަގުތު ބޯޅަ ގެންގުޅެ މޮޅޫ އެޓޭކިން ފުޓްބޯޅައެއް ކުޅެފައެވެ.

ފެޔަނޫދްއިން ވަނީ ސިޓީއަށް ލަނޑެއް ޖެހިޔަނުދީ 87 މިނެޓު ހިފަހައްޓާފައެވެ. އެހެނަސް މެޗު ނިމެން ދެ މިނެޓަށް ވެފައިވަނިކޮށް ފެޔަނޫދްގެ މޮޅު ޑިފެންސް ސިޓީއަށް ފޫ އަޅުވާލަ ދިނީ ޒުވާން ވިންގާރ ރަހީމް ސްޓާލިންއެވެ. އޭނާއަށް މި ލަނޑު ޖަހައިދިނުމަށް އެހީތެރިވެ ދިނީ އިކޭ ގުންޑޮގަންއެވެ.

މި މޮޅާއެކު ސިޓީއިން ވަނީ ބާކީ އެއް މެޗު އޮއްވައި މި ގްރޫޕުގެ އެއްވަނަ ކަށަވަރު ކޮށްފައެވެ. ފެޔަނޫދްއަށް މުބާރާތުގައި އިތުރަށް ކުރިޔަށް ދިޔުމުގެ ހުރިހާ ދޮރެއް ވަނީ ބަންދުވެފައެވެ. ސިޓީއިން ވަނީ މި މޮޅާއެކު އެ ޓީމު މެޗަކުން ބަލިނުވުމުގެ ރެކޯޑު 25 މެޗަށް އިތުރު ކޮށްފައެވެ.

މި ގްރޫޕުގެ ދެވަނަ މެޗުގައި ނަޕޯލީ ވަނީ އަމިއްލަ ދަނޑުގައި 3-0 ގެ ނަތީޖާއަކުން ޔޫކްރެއިންގެ ޝަކްތަރް ޑޮނޭޓްސްކް ބަލިކޮށް ދެވަނަ ބުރުގެ އުއްމީދު ދަމަހައްޓާފައެވެ.

ދެ ޓީމުގެ ފަރާތުން ވެސް މޮޅު ކުޅުމެއް ފެނިގެންދިޔަ މި މެޗުގައި ދެ ޓީމުން ވެސް ވަނީ ފޯރިގަދަ ބަލާހިތްވާ ޒާތުގެ ކުޅުމެއް ދައްކާފައެވެ.

މި މެޗުގެ ފުރަތަމަ ހާފުގައި އެއްވެސް ލަނޑެއް ފެނިގެން ގޮސްފައިނުވާއިރު ނަޕޯލީގެ ތިން ލަނޑު ވެސް ފެނިގެން ގޮސްފައިވަނީ ދެވަނަ ހާފުގައެވެ. ނަޕޯލީގެ ފުރަތަމަ ލަނޑު މެޗުގެ މެޗުގެ 56 ވަނަ މިނެޓުގައި އިޓަލީގެ ޒުވާން ފޯވާޑް ލޮރެންޒީ އިންސައިން ޖަހައިދިންއިރު އެ ޓީމުގެ ދެވަނަ ލަނޑު 81 ވަނަ މިނެޓުގައި ޖަހައިދިނީ މިޑްފީލްޑަރު ޕިއެޓްރަ ޒިލެންސްކީއެވެ. ނަޕޯލީއިން މެޗުގައި ޖެހި ތިންވަނަ ލަނޑު މެޗުގެ 83 ވަނަ މިނެޓުގައި ރައުލް އަލްބިއޯލްގެ އެހީތެރިކަމާއެކު ޖަހައިދިނީ ޑްރައިސް މާޓެންސްއެވެ.

ނަޕޯލީއަށް ދެވަނަ ބުރުގެ ޖާގައެއް ލިބޭނީ ގްރޫޕުގެ ފަހު މެޗުގައި ފެޔަނޫދް ބަލިކޮށްގެންނެވެ. ހަމައެހެންމެ މިވަގުތު ގްރޫޕުގެ ދެވަނައިގައި އޮތް ޝަކްތަރު އެ ޓީމު ދެން ކުޅޭ މެޗުން ބަލިވެއްޖެ ނަމަވެސް ނަޕޯލީ ދެވަނަ ބުރަށް ކޮލިފައިވުމަށް މަގުފަހި ވާނެއެވެ.

މި ގްރޫޕުގެ އެއްވަނައިގައި ކުޅުނު ފަސް މެޗު ވެސް ކާމިޔާބުކޮށް 15 ޕޮއިންޓާއެކު އޮތީ މެންޗެސްޓާ ސިޓީއެވެ. ދެވަނައިގައި ނުވަ ޕޮއިންޓާއެކު ޝަކްތަރު އޮތްއިރު ތިންވަނައިގައި ހަ ޕޮއިންޓާއެކު އޮތީ ނަޕޯލީއެވެ. މި ގްރޫޕުގެ ފުލުގައި އެއްވެސް ޕޮއިންޓެއް ނުލިބި އޮތީ ފެޔަނޫދްއެވެ.