މުސްލިމުންގެ ހިތި ބުއިމުގެ ގޮތުގައި ބޭނުންކުރަމުންދިޔަ ކޮފީއަށް މުޅި ދުނިޔޭގެ ހިތްޖެހިފައިވާއިރު، ކޮފީގެ އެކި ބާވަތްތައް ބާޒުން ލިބެން އެބަހުއްޓެވެ. އެހެންނަމަވެސް، ޕެޓްރޯލުގެ ބަދަލުގައި ކޮފީ ބޭނުންކޮށްގެން އުޅަނދެއް ދުއްވަފާނެ ކަމަށް ގަބޫލުކުރުން ވާނީ ދަތި ކަމަކަށެވެ.
އެހެން ނަމަވެސް، މިދިޔަ ހޯމަ ދުވަހާ ހަމައިން މިއީ ވެދާނެ ކަމެއް ކަމާ މެދު ސުވާލު އުފެއްދި ފަރާތްތަކަށް މިވަނީ ފުރިހަމަ ޖަވާބެއް ލިބިފައެވެ. ލަންޑަނުގެ ބަޔޯ-ބީން އިން ޝެލް ކުންފުންޏާއި އަރޖެންޓް އެނަރޖީއާ ގުޅިގެން މިވަނީ ކޮފީ ބޭނުންކޮށްގެން ބަޔޯ ފިޔުލްއެއް އުފައްދާފަ އެވެ.
ބަޔޯ-ބީން އިން ވަނީ، ކޮފީގެ ވޭސްޓް ބްލެންޑު ކޮށްގެން އެއިން ނުކުންނަ ތެލާއި ޑީސަލް އެއްކޮށްގެން ބަސް އޮފަރޭޓް ކުރެވޭނެ ގޮތަށް މަގު ފަހިކޮށްފައެވެ.
އެ ކުންފުނިން ބުނިގޮތުގައި 200,000 އަށްވުރެ ގިނަ ޓަނުގެ ކޮފީ ލަންޑަނުގައި ދިރިއުޅޭ މީހުން އަހަރެއްގެ މައްޗަށް އިސްރާފު ކުރެއެވެ.
އެ ކުންފުނިން ލަފާކުރާ ގޮތުގައި އަހަރެއްގެ މައްޗަށް 2.55 މިލިއަން ތައްޓަށްވާވަރުގެ ކޮފީ ބޭނުންކޮށްގެން އުފައްދާ ތެލާއި ޑީސަލް އެއްކޮށްގެން އެއް އަހަރު ދުވަހުގެ މުއްދަތަކަށް ބަސް އޮފަރޭޓު ކުރެވިދާނެއެވެ.
މި ކުންފުނިން މިހާތަނަށް ވަނީ ހަ ހާސް ލީޓަރުގެ ކޮފީ ތެޔޮ އުފައްދާފައެވެ.
