ދިވެހި ޕްރިމިއާ ލީގުގެ ޗެމްޕިއަންކަން ހޯދާ ނިއު އޭއެފްސީ ކަޕުން ޖާގަ ހޯދައިފި

އުރީދޫ ދިވެހި ޕްރިމިއާ ލީގުގެ ޗެމްޕިއަންކަން ހޯދާ ނިއުރޭޑިއަންޓް ސްޕޯޓްސް ކްލަބް އޭއެފްސީ ކަޕުން ޖާގަ ހޯދައިފިއެވެ.

ލީގުގެ ޗެމްޕިއަންކަން ނިއު އިން ހޯދީ ޓީސީއާ ދެކޮޅަށް ކުޅުނު މެޗު 2-3 ގެ ނަތީޖާއިން ކާމިޔާބުކޮށްގެންނެވެ.

ގަލޮޅު ދަނޑުގައި ކުޅުނު މެޗު ފެށިގެން 10 މިނެޓު ތެރޭގައި ނިއު އިން ވަނީ ދެ ލަނޑުގެ ލީޑެއް ނަގާފައެވެ. އަލީ ފާސިރު (ސެންޓޭ) ގެ ލަނޑުން ދެވަނަ މިނެޓުގައި ނިއު އިން ލީޑު ނެގިއިރު، ހަތްވަނަ މިނެޓުގައި ނިއުގެ ސްޕެއިން ފޯވާޑް އެޑްރިއަން ގަލާޑޯ ވަނީ އެޓީމަށް ލީޑު ފުޅާކޮށްދީފައެވެ.

މި ލަނޑުތަކަށްފަހު ނިއު އިން މޮޅަށް ކުޅެމުންދިޔައިރު، ލަނޑު ޖަހަން ގިނަ ހުސް ފުރުސަތުތައް އެޓީމަށް ވަނީ ލިބިގެންގޮސްފައެވެ. ފުރަތަމަ ހާފްގައި ޓީސީ އަށް މާ އެދެވޭ ކުޅުމެއް ނުދެއްކޭ އިރު، އެޓީމަށް ލަނޑު ޖަހަންވެސް ރަނގަޅު ފުރުސަތުތަކެއް ލިބިގެންގޮސްފައެއް ނުވެއެވެ.

ފުރަތަމަ ހާފް ނިމުނީ 0-2 ގެ ނަތީޖާއިން ޓީސީގެ މައްޗަށް ނިއު ކުރީގައި އޮވެގެންނެވެ.

ދެވަނަ ހާފް ފެށިގެން ޓީސީން އެޓީމުގެ ކުޅުން ރަނގަޅުކޮށް އެޓޭކްތައް ވަރުގަދަކުރިއެވެ. އެހެންނަމަވެސް ނިއުގެ ވަރުގަދަ ޑިފެންސްލައިން ފޫއަޅުވާލުމަށްފަހު ލަނޑެއް ނުޖެހިގެން އުޅެނިކޮށް، ނިއު އިން ވަނީ އެޓީމުގެ ލީޑު އިތުރަށް ފުޅާކޮށްފައެވެ. މި ލަނޑު 74 ވަނަ މިނެޓުގައި ނިއު އަށް ކާމިޔާބުކޮށްދިނީވެސް ސެންޓޭއެވެ.

މެޗުގެ ފަހު 15 މިނެޓު ތެރޭގައި ޓީސީގެ ފަރާތުން މޮޅު ކުޅުމެއް ފެނިގެންގޮސްފައިވާއިރު، އެޓީމުން ވަނީ ދެ ލަނޑު ކާމިޔާބުކޮށްފައެވެ. މި ދެ ލަނޑުވެސް އެޓީމަށް ކާމިޔާބުކޮށްދިނީ އިބްރާހިމް މަހުދީ ހުސެއިން (ކުދުއިއްބެ) އެވެ.

މީގެއިތުރުން މެޗުގެ ފަހުވަގުތުކޮޅު ތެރޭގައިވެސް ޓީސީ އަށް ވަނީ ނަތީޖާ ހަމަހަމަކުރުމަށް ފުރުސަތުތަކެއް ލިބިގެންގޮސްފައެވެ. އެގޮތުން ޓީސީގެ ބިދޭސީ ކުޅުންތެރިޔާ ސްޓެވާޓް އަށް ލިބުނު ފުރުސަތުތައް ހިމެނެއެވެ.

މި ނަތީޖާއާއެކު ނިއު ވަނީ 36 ޕޮއިންޓް ހަމަކޮށް ޕޮއިންޓް ތާވަލުގެ އެއްވަނައިގައި ހަތް ޕޮއިންޓްގެ ލީޑެއް ނަގާފައެވެ. މެޗުން ބަލިވި ޓީސީ އޮތީ 29 ޕޮއިންޓާއެކު ޕޮއިންޓް ތާވަލުގެ ދެވަނައިގައެވެ.