އުރީދޫ ދިވެހި ޕްރިމިއާ ލީގުގައި އިބްރާހިމް މަހުދީ (ކުދު އިއްބެ) ގެ ލަނޑުން އއ.މާޅޮސް ބަލިކޮށް، ޓީސީ ސްޕޯޓްސް ކްލަބުން ފަރަގުކުޑަކޮށްފި އެވެ.

ހޮނިހިރު ދުވަހުގެ ރޭ ކުޅުނު މެޗު މާޅޮހާ ވާދަކޮށް ޓީސީން މެޗު ކާމިޔާބު ކުރީ 0-1 ގެ ނަތީޖާއަކުންނެވެ.

ގަލޮޅު ދަނޑުގައި ކުޅުނު މި މެޗު ފެށިގެން ތިންވަނަ މިނެޓުގައި ޓީސީން ވަނީ މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބު ކޮށްދިނީ އިބްރާހިމް މަހުދީ (ކުދު އިއްބެ) އެވެ. މި ލަނޑަށްފަހު ވެސް ޓީސީން ދިޔައީ މާޅޮސްގެ ހާފަށް ބާރުބޮޑުކޮށް ހަމަލާ އުފައްދަމުންނެވެ.

ފުރަތަމަ ހާފްގައި ޓީސީގެ އިތުރުން މާޅޮހަށް ވެސް ވަނީ ލަނޑު ޖެހުމަށް ފުރުސަތުތަކެއް ލިބި ބޭކާރުވެފައެވެ. ފުރަތަމަ ހާފް ނިމުނީ 0-1 ގެ ނަތީޖާއިން މާޅޮސްގެ މައްޗަށް ޓީސީ ކުރީގައި އޮވެގެންނެވެ.

ދެވަނަ ހާފް ފެށިގެން މާޅޮހުން ވަނީ އެޓީމުގެ ކުޅުން ރަނގަޅުކޮށްފައެވެ. އެގޮތުން ޓީސީގެ ހާފަށް ބާރުބޮޑުކޮށް އެޓީމުން ވަނީ ފުލުފުލުގައި ލަނޑު ޖެހުމަށް ފުރުސަތު ހޯދާފައެވެ.

ދެވަނަ ހާފްގައި މާޅޮސްގެ މުނޯޒް އަށް ވަނީ ނަތީޖާ ހަމަހަމަކުރުމަށް ގިނަ ފުރުސަތުތަކެއް ލިބި ބޭކާރުވެފައެވެ. މީގެއިތުރުން ޓީސީއަށް ވެސް ވަނީ ދެވަނަ ހާފްގައި ލީޑު ފުޅާކުރުމަށް ވެސް ގިނަ ފުރުސަތުތައް ލިބި ބޭކާރުވެފައެވެ.

މި ނަތީޖާއާއެކު ޓީސީ އޮތީ ކުޅުނު 12 މެޗުން ލިބުނު 29 ޕޮއިންޓާއެކު، ޕޮއިންޓް ތާވަލުގެ ދެވަނައިގައެވެ. މެޗުން ބަލިވި މާޅޮސް އޮތީ ކުޅުނު 12 މެޗުން ލިބުނު 8 ޕޮއިންޓާއެކު ޕޮއިންޓް ތާވަލުގެ ހަތްވަނައިގައެވެ. ޕޮއިންޓް ތާވަލުގެ އެއްވަނައިގައި ކުޅުނު 11 މެޗުން ލިބުނު 30 ޕޮއިންޓާއެކު އޮތީ ނިއުރޭޑިއަންޓް ސްޕޯޓްސް ކްލަބެވެ.