ޕްރިމިއާ ލީގު: ޓޮޓެންހަމް ބަލިކޮށް ތާވަލުގެ ދެވަނަ އަށް ޔުނައިޓެޑް ޖެހިލައިފި

ޕްރިމިއާ ލީގުގައި ޓޮޓެންހަމް ހޮޓްސްޕާ ބަލިކޮށް ޕޮއިންޓް ތާވަލުގެ ދެވަނަ އަށް މެންޗެސްޓާ ޔުނައިޓެޑް ޖެހިލައިފިއެވެ.

ހޮނިހިރު ދުވަހު ކުޅުނު މެޗު ޓޮޓެންހަމްއާ ވާދަކޮށް ޔުނައިޓެޑް މެޗު ކާމިޔާބު ކުރީ 0-1 ގެ ނަތީޖާއަކުންނެވެ.

ޔުނައިޓެޑް ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށް ރަނގަޅަށް ކުޅެމުންދިޔައީ އެޓީމުންނެވެ. އެގޮތުން ޓޮޓެންހަމްގެ ހާފަށް ބާރުބޮޑުކޮށް ޔުނައިޓެޑުން ދިޔައީ ލަނޑު ޖެހުމަށް ފުރުސަތު ހޯދަމުންނެވެ.

އެހެން ނަމަވެސް ޓޮޓެންހަމް އިން ވަނީ ފުރަތަމަ ހާފްގެ ވަކި ހިސާބަކުން މެޗުގެ ކޮންޓްރޯލް ހޯދާ ޔުނައިޓެޑްގެ ގޯލަށް ނުރައްކާކުރަން ފަށާފައެވެ. އެގޮތުން ލަނޑު ޖެހުމަށް އެޓީމަށް ވެސް ވަނީ ފުރުސަތުތަކެއް ލިބި ބޭކާރުވެފައެވެ.

ފުރަތަމަ ހާފް ނިމުނީ 0-0 ގެ ނަތީޖާއިން ދެޓީމު އެއްވަރުވެގެންނެވެ.

ދެވަނަ ހާފް ފެށިގެން ޔުނައިޓެޑުން ވަނީ އެޓީމުގެ އެޓޭކްތައް ގިނަކޮށްފައެވެ. އެގޮތުން 54 ވަނަ މިނެޓުގައި މާކަސް ރަޝްފޯޑް އަށް ވަނީ ލީޑު ނެގުމަށް ހުސް ފުރުސަތެއް ލިބި ބޭކާރުވެފައެވެ.

މެޗުގައި ފެނިގެންދިޔަ ހަމައެކަނި ލަނޑު 81 ވަނަ މިނެޓުގައި ރޮމެލޫ ލުކާކޫގެ އެހީތެރިކަމާއެކު ކާމިޔާބުކޮށްދިނީ ބަދަލު ކުޅުންތެރިޔާ އެންތޮނީ މާޝިއާލްއެވެ. މި ލަނޑަށް ފަހު ޓޮޓެންހަމްގެ ފަރާތުން ފުލުފުލުން ހަމަލާތަކެއް ފެނިގެންގޮސްފައިވާއިރު، ޔުނައިޓެޑުން ވަނީ ހުރިހާ ހަމަލާތަކެއް ދިފާއުކޮށް ތިން ޕޮއިންޓް ކަށަވަރު ކޮށްފައެވެ.

މި ނަތީޖާއާއެކު ޔުނައިޓެޑް ވަނީ 23 ޕޮއިންޓް ހަމަކޮށް، ޓޮޓެންހަމް ފަހަތަށްޖައްސާލުމަށްފަހު ޕޮއިންޓް ތާވަލުގެ ދެވަނައަށް ޖެހިލާފައެވެ. ޓޮޓެންހަމް އޮތީ 20 ޕޮއިންޓާއެކު ޕޮއިންޓް ތާވަލުގެ ތިންވަނައިގައެވެ.