ދިވެހި ޕްރިމިއާ ލީގުގައި ގދ.ތިނަދޫ އެއްވަރުވެ، މާޒިޔާ ސްޕޯޓްސް އެންޑް ރެކްރިއޭޝަނަށް އިތުރު ހުރަސްތަކާ ކުރިމަތިލާން ޖެހިއްޖެއެވެ.

ބުދަ ދުވަހު ހަވީރު ތިނަދޫ އަދި މާޒިޔާ ބައްދަލުކުރި ފޯރިގަދަ މެޗު އެއްވަރުވީ 1-1 ގެ ނަތީޖާއަކުންނެވެ.

ގަލޮޅު ދަނޑުގައި ކުޅުނު މި މެޗުގައި ތިނަދޫގެ ފަރާތުން މޮޅު ކުޅުމެއް ފެނިގެންގޮސްފައިވާއިރު، އެޓީމަށް ވަނީ މެޗުގައި ލަނޑު ޖަހަން ވެސް ގިނަ ހުސް ފުރުސަތުތަކެއް ލިބި ބޭކާރުވެފައެވެ.

ފުރަތަމަ ހާފްގައި މާޒިޔާއަށް ވެސް ވަނީ ލަނޑު ޖެހުމަށް ފުރުސަތުތަކެއް ލިބިފައެވެ. އެހެންނަމަވަސް އެޓީމުގެ ކެރިޗް އަދި އުމެއިރު އަށް ލިބުނު ފުރުސަތުތައް ގޯލަށް ވައްދާލެވޭގޮތް ވަނީ ނުވެފައެވެ.

ފުރަތަމަ ހާފް ނިމުނީ 0-0 ގެ ނަތީޖާއިން ދެޓީމު އެއްވަރުވެގެންނެވެ.

ދެވަނަ ހާފް ފެށިގެން ވެސް ތިނަދޫގެ ފަރާތުން ނުރައްކާތެރި ހަމަލާތަކެއް ވަނީ ފެނިގެންގޮސްފައެވެ. އެހެން ނަމަވެސް ތިނަދޫ އިން ރަނގަޅަށް ކުޅެމުން ދަނިކޮށް 63 ވަނަ މިނެޓުގައި މެޗުގެ ލީޑު ނެގީ މާޒިޔާއިންނެވެ. މި ލަނޑު ބަދަލު ކުޅުންތެރިޔާ އަހުމަދު އިމާޒް (އާއްކޮ) ނަގައިދިން ހުރަހަކުން އެއްފަހަރުން ބޮލުން ޖަހައިގެން ގޯލުތެރެއަށް ފޮނުވާލީ އުމެއިރުއެވެ.

މި ލަނޑަށް ފަހު މާޒިޔާގެ ކެރިޗް އަށް ވަނީ ލީޑު ފުޅާކުރުމަށް ހުސް ފުރުސަތެއް ލިބިފައެވެ. އެހެން ނަމަވެސް އޭނާ ފޮނުވާލި ބޯޅަ އަމާޒުވީ ގޯލު ދަނޑިއަށެވެ.

މާޒިޔާ އިން ލީޑު ނެގިތާ ދެ މިނެޓު ފަހުން ތިނަދޫ އިން ވަނީ ނަތީޖާ ހަމަހަމަ ކޮށްފައެވެ. މި ލަނޑު މުޅިން ހުހަށް ހުރެ މާޒިޔާގެ ޕެނަލްޓީ އޭރިޔާ ބޭރުން ފޮނުވާލީ އަހުމަދު ނޫމާން (ހެލްމެޓު) އެވެ.

މި ނަތީޖާއާއެކު މާޒިޔާ އޮތީ 10 މެޗުން ލިބުނު 20 ޕޮއިންޓާއެކު ޕޮއިންޓް ތާވަލުގެ ތިންވަނައިގައެވެ. ތިނަދޫ ވަނީ ގްރީންއާ އެއް އަދަދަކަށް ޕޮއިންޓް ހޯދާ އެޓީމު ފަހަތަށް ޖައްސާލުމަށްފަހު ޕޮއިންޓް ތާވަލުގެ ހަތަރުވަނައަށް ޖެހިލާފައެވެ. ތިނަދޫ އަދި ގްރީން އަށް ލިބިފައިވަނީ 12 ޕޮއިންޓެވެ.