ގިރިޖާ ދޭވީ އުމުރުން 88 ގައި މަރުވެއްޖެ

ކްލެސިކް އިންޑިއަން މިއުޒިކް ކަމަށްވާ ތުމްރީގެ ރާނީ ގިރިޖާ ދޭވީ މަރުވެއްޖެއެވެ.

އޭނާ މަރުވެފައިވަނީ އުމުރުން 88 އަހަރުގައެވެ.

ރިޕޯޓްތައް ބުނާ ގޮތުގައި ގިރިޖާ ދޭވީ މަރުވެފައި ވަނީ މެއަށް ތަދެއް އަރައިގެން އިންޑިއާގެ ކޮލްކަތާ ހޮސްޕިޓަލުގައި ފަރުވާ ދެމުން ދަނިކޮށް އަންގާރަ ދުވަހުގެ ވަގުތެއްގައެވެ.

ގިރިޖާ ދޭވީ މަރުވުމާ ގުޅިގެން އިންޑިއާގެ ބޮޑުވަޒީރު ނަރެންދުރަ މޯދީ ކުރެއްވި ޓްވީޓުގައި ވިދާޅުވެފައި ވަނީ ގިރިޖާ ދޭވީގެ މިއުޒިކް އެތައް ޒަމާނަކަށް ދެމިގެންދާނެ ކަމަށާއި އޭނާގެ އިންޑިއަން ކްލަސިކަލް މިއުޒިކް އަބަދުވެސް ހަނދާން ހުންނާނެ ކަމަށެވެ. ގިރިޖާ ދޭވީ މަރުވުމަކީ ހިތާމަގެނުވި ކަމެއް ކަމަށާއި އޭނާއަކީ އިންޑިއަން ކްލެސިކް މިއުޒިކް އިން އެންމެ މޮޅު އެއް ލަވަ ކިޔުންތެރިޔާ ކަމަށް މޯދީގެ ޓްވީޓުގައި ވަނީ ވިދާޅުވެފައެވެ.

ގިރިޖާ ދޭވީ އޭނާގެ ލަވަކިޔުމުގެ ކެރިއަރު ފަށާފައި ވަނީ ވަރަށް ކުޑައިރުއެވެ. އޭނާ އުފަންވެފައި ވަނީ 1929 ވަނަ އަހަރުގެ މެއި މަހުގެ 8 ވަނަ ދުވަހުގައެވެ. އޭނާއަށް ވަނީ "ޕަދުމާ ޝްރީ އެވޯޑް"، "ސަންގީތު ނާޓަކް އެކަޑަމީ ފެލޯޝިޕް" އަދި "މަހަ ސަންގީތު މައްމާން އެވޯޑް" ވެސް ލިބިފައެވެ.