ސާބިއާގެ ރައީސް ވޫޗިޗް އިސްތިއުފާ ދެއްވަން ނިންމަވައިފި

ސާބިއާގެ ރައީސް އެލެގްޒެންޑަރ ވޫޗިޗް، ކުރިއަށް އޮތް މަދު ހަފުތާ ތަކެއްގެ ތެރޭގައި މަޤާމުން އިސްތިއުފާ ދެއްވާނެކަން އިއުލާނު ކުރައްވައިފި އެވެ.

ވޫޗިޗް މިކަން ހާމަ ކުރެއްވީ ހޮނިހިރު ދުވަހު އެ ޤައުމުގެ ވެރިރަށް ބެލްގްރޭޑްގައި ބޭއްވި ސަރުކާރަށް ތާއީދުކުރާ މީހުންގެ ބޮޑު އެއްވުމެއްގައި ވާހަކަ ދައްކަވަމުންނެވެ.

ސަޕޯޓަރުންނާ މުޚާތަބު ކުރައްވަމުން ވޫޗިޗް ވިދާޅުވީ، އޭނާ ރައީސް ކަމުގެ މަޤާމުގައި ހުންނަވާނީ އެންމެ ދެތިން ހަފުތާއަކު ކަމަށާއި، އެއަށް ފަހު މަޤާމުން އިސްތިއުފާ ދެއްވާނެ ކަމަށެވެ. މިއީ ރައީސް ކަމުގެ ހައިސިއްޔަތުން އޭނާ ރައްޔިތުންނާ މުޚާތަބު ކުރައްވާ ފަހު ފަހަރަށް ވުން އެކަށީގެންވާ ކަމަށް ވެސް ވިދާޅުވި އެވެ. ވޫޗިޗްގެ މި ނިންމުމާ އެކު، ސާބިއާގައި ރިޔާސީ އިންތިޚާބު އަދި ބަރުލަމާނީ އިންތިޚާބު އަވަސް ވެގެންދާނެ އެވެ.

މަޤާމުން އިސްތިއުފާ ދެއްވާނެކަން އިއުލާނު ކުރެއްވި ނަމަވެސް، އިސްތިއުފާ ދެއްވާނެ ސީދާ ތާރީޚެއް ނުވަތަ އިންތިޚާބު ބާއްވާނެ ދުވަހެއް ވޫޗިޗް ހާމަ ކުރައްވާފައި ނުވެ އެވެ. ނަމަވެސް އޭނާ ނިސްބަތްވާ ކަނާއަތު ފިޔައިގެ ސާބިއަން ޕްރޮގްރެސިވް ޕާޓީ އަށް ކުރިއަށް އޮތް އިންތިޚާބުގައި އެހީތެރި ވެދެއްވާނެ ކަމަށާއި، ކުރިއަށް ވުރެ ފުރިހަމަ ކާމިޔާބީއެއް އެ ޕާޓީ އިން ހޯދާނެ ކަމަށް ވޫޗިޗް ވިދާޅުވި އެވެ.

ވޫޗިޗްގެ ރިޔާސީ ދެ ވަނަ ދައުރު ހަމަވާން އޮތީ 2027 ވަނަ އަހަރުގެ މެދު ތެރޭގައި އެވެ. ފާއިތުވި 14 އަހަރު ސާބިއާގެ ސަރުކާރު ކޮންޓްރޯލް ކުރަމުންދާ ޕޮޕިއުލިސްޓް ޕާޓީގެ ލީޑަރުގެ ގޮތުގައި ވޫޗިޗް ވަނީ ޤައުމުގެ ބާރުތައް އޭނާގެ މުށް ދަށަށް ގެންނަވާފައި އެވެ. ނަމަވެސް، ފާއިތުވި މަސް ތަކުގައި އޭނާގެ ސަރުކާރާ ދެކޮޅަށް ދަރިވަރުން އިސްވެ ތިބެ ކުރަމުންދާ މުޒާހަރާ ތަކުގެ ސަބަބުން ސަރުކާރަށް ވަނީ ބޮޑެތި ގޮންޖެހުން ތަކެއް ކުރިމަތިވެފައި އެވެ.

ސާބިއާގައި ސަރުކާރާ ދެކޮޅަށް ފުޅާ ދާއިރާއެއްގައި މުޒާހަރާ ކުރަން ފެށީ 2024 ވަނަ އަހަރުގެ ނޮވެމްބަރު މަހު ނޯވީ ސާޑް ރޭލްވޭ ސްޓޭޝަނުގައި ހިނގި ނުރައްކާތެރި ހާދިސާއެއްގައި 16 މީހުން މަރުވުމާ ގުޅިގެންނެވެ. މި ހާދިސާއާ ގުޅިގެން އާންމުންގެ ނުރުހުން ސަރުކާރަށް އަމާޒުވެ، އެތައް ހާސް ބަޔަކު މަގު ތަކަށް ނުކުމެ މުޒާހަރާ ކުރަން ފެށި އެވެ. މި މުޒާހަރާ ތަކުގެ ތެރެއިން އެތައް ސަތޭކަ ބަޔަކު ހައްޔަރު ކޮށްފައިވާއިރު، ސާބިއާގެ ފުލުހުން ބާރުގެ ބޭނުން ނަހަމަ ގޮތުގައި ކުރާ ކަމަށް ބުނެ ވިލާތުގެ އިއްތިހާދުން ވަނީ ކަންބޮޑުވުން ފާޅު ކޮށްފައި އެވެ.

މި މުޒާހަރާ ތަކުގެ ސަބަބުން 2025 ވަނަ އަހަރުގެ ޖެނުއަރީ މަހު އޭރުގެ ބޮޑު ވަޒީރު މިލޯސް ވޫޗެވިޗް ވަނީ މަޤާމުން އިސްތިއުފާ ދެއްވާފައި އެވެ. ވޫޗިޗް މީގެ ކުރިން ވަނީ މުޒާހަރާގެ ބައިވެރިންނަކީ ބޭރުގެ އެޖެންޓުން ކަމަށް ސިފަ ކުރައްވައި، އެމީހުން މަސައްކަތް ކުރަނީ ޤައުމު ބައިބައިކޮށް، ސަރުކާރު ވައްޓާލަން ކަމަށް ތުހުމަތު ކުރައްވާފައި އެވެ.

ސާބިއާގެ ރައީސް ވޫޗިޗްގެ އެއްވުމަށް ރައްދު ދިނުމުގެ ގޮތުން، ސާބިއާގެ މެދު ތެރޭގެ ރަށެއް ކަމަށްވާ ކްރަލްޖެވޯގައި އާދިއްތަ ދުވަހު ދަރިވަރުން އިސްވެ ބޮޑު އެއްވުމެއް ބޭއްވުމަށް ވަނީ ރާވާފައި އެވެ. މި އެއްވުމުގައި ޤައުމީ އެއްބައިވަންތަ ކަމަށް ގޮވާލުމުގެ އިތުރުން، އިންތިޚާބު އަވަސް ކުރުމަށް ކުރާ ޑިމާންޑުތައް އައު ކުރާނެ ކަމަށް ބެލެވެ އެވެ.