ސީރިޔާ އަތުންވެސް ތަފާތުބޮޑުކޮށް ގައުމީ 16 އަހަރުން ދަށުގެ ޓީމު ބަލިވެއްޖެ

ސީރިޔާ އަތުންވެސް ތަފާތުބޮޑޫކޮށް ގައުމީ 16 އަހަރުން ދަށުގެ ފުޓުބޯޅަ ޓީމު ބަލިވެއްޖެ އެވެ.

އޭއެފްސީ 16 އަހަރުން ދަށުގެ މުބާރާތަށް ކޮލިފައިވުމަށް ބޭއްވި ރައުންޑުގައި ސީރިޔާ އަތުން ރާއްޖެ ބަލިވީ 0-6 ގެ ތަފާތުބޮޑު ނަތީޖާއަކުންނެވެ.

ތަޖިކިސްތާނުގައި ކުޅުނު މި މެޗުގެ ފުރަތަމަ ހާފްގައި ސީރިޔާ އިން ވަނީ ރާއްޖެ ކޮޅަށް ތިން ލަނޑު ޖަހާފައެވެ. އެގޮތުން ފުރަތަމަ ލަނޑު ހަތްވަނަ މިނެޓުގައި އޮމަރް ނަގްނޫހް ކާމިޔާބުކުރިއިރު، 14 ވަނަ މިނެޓުގައި މުހައްމަދު މާޓޮކް ވަނީ އެޓީމަށް ލީޑު ފުޅާކޮށްދީފައެވެ. ސީރިޔާގެ ތިންވަނަ ލަނޑު 33 ވަނަ މިނެޓުގައި ކާމިޔާބުކޮށްދިނީ ޔާސިން އަބޯ ޗަންތާއެވެ.

ދެވަނަ ހާފް ފެށިގެން ފުރަތަމަ މިނެޓުގައި ސީރިޔާ އިން ވަނީ ލީޑު އިތުރަށް ފުޅާކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ބަދަލު ކުޅުންތެރިޔެއްގެ ގޮތުގައި ކުޅެން އެރި އަބްދުލް ރަހްމާން އަލް ކާތިބް އެވެ.

މި ލަނޑަށްފަހުވެސް ސީރިޔާ އިން ދިޔައީ ރާއްޖޭގެ ގޯލަށް ނުރައްކާ ކުރަމުންނެވެ. އެގޮތުން 58 ވަނަ މިނެޓޫގައި އަހުމަދު ހާތިމް ވަނީ ސީރިޔާގެ ފަސް ވަނަ ލަނޑު ކާމިޔާބުކޮށްފައެވެ.

މެޗުގެ އިތުރުވަގުތުގައި ސީރިޔާގެ ހަވަނަ ލަނޑު އެޓީމަށް ކާމިޔާބުކޮށްދިނީ ބަދަލު ކުޅުންތެރިޔެއްގެ ގޮތުގައި ކުޅެން އެރި އަހުމަދު އަމަރާ އެވެ.

ރާއްޖެ ހިމެނޭ ގްރޫޕްގައި ސީރިޔާގެ އިތުރުން ދެން ހިމެނެނީ އޮމާން އަދި ތަޖިކިސްތާން އެވެ. ފުރަތަމަ މެޗުގައި އޮމާންއާ ދެކޮޅަށް ރާއްޖެ ނިކުތް އިރު، ރާއްޖެ ވަނީ 0-8 ގެ ނަތީޖާއަކުން އެޓީމު އަތުން ބަލިވެފައެވެ. ދެވަނަ މެޗުގައި ރާއްޖެ ބަލިވީ ތަޖިކިސްތާނާ ވާދަކޮށް 0-14 ގެ ނަތީޖާއަކުންނެވެ.

ގްރޫޕް ބީގެ އެއްވަނައިގައި ހަ ޕޮއިންޓާއެކު އޮތީ ތަޖިކިސްތާން އެވެ. ދެވަނައިގައި ހަ ޕޮއިންޓާއެކު ތަޖިކިސްތާނަށްވުރެ، ލަނޑު މަދުން އޮތީ އޮމާން އެވެ. ތިންވަނައިގައި ތިން ޕޮއިންޓާއެކު އޮތީ ސީރިޔާ އެވެ. އެއްވެސް ޕޮއިންޓެއް ނުލިބި ބައިކޮޅަށް ވަތް 28 ލަނޑާއެކު ފުލުގައި އޮތީ ރާއްޖެ އެވެ. މި ގްރޫޕްގެ އެއްވަނަ އަދި ދެވަނަ ކަށަވަރުވާނީ އޮމާން އަދި ތަޖިކިސްތާން ބައްދަލުކުރާ މެޗަށްފަހު އެވެ.