ރާއްޖެޓީވީން ހުޅުވައިދިނީ މުހިއްމު ފުރުޞަތެއް، ވަނައަކަށް ޓާގެޓެއް ނުކުރަން: ސްޓޭޓަސްގެ ޓީމް

ނިމިގެންދިޔަ ރަމަޟާން މަހު ރާއްޖެޓީވީން ކުރިއަށްގެންދިޔަ ކުރުފިލްމު ފެސްޓިވަލަކީ، ލިބިގެންދިޔަ މުހިއްމު ފުރުޞަތެއް ކަމަށާ، ފެސްޓިވަލަށް ފިލްމު ހުށަހެޅީ ވަނައަކަށް އަމާޒުކޮށް ނޫންކަމަށް އެ މުބާރާތުގެ އެންމެ މޮޅު ކުރުފިލްމަކަށް ހޮވުނު "ސްޓޭޓަސް" ގެ ޓީމުން ބުނެފިއެވެ.

ރާއްޖެއެމްވީއާއި ވާހަކަ ދައްކަމުން، ފިލްމު އުފެއްދުމުގެ މަސައްކަތުގައި ހަރަކާތްތެރިވި ދެ ޒުވާނުންގެ ތެރެއިން ފިލްމުގެ ޓެކްނިކަލް މަސައްކަތްތައް ކުރި ޝައްމާން ޝާކިރު ބުނީ، ރާއްޖެޓީވީން ހުޅުވާލި ފުރުޞަތަކީ ފިލްމީ ދާއިރާއަށް ނުކުންނަން ބޭނުންވެފައި ތިބި ޒުވާނުންނާއި، ހުނަރު ދައްކައިލުމަށް ބޭނުންވެފައިތިބި ފަރާތްތަކަށް ލިބިގެންދިޔަ މުހިއްމު ފުރުޞަތެއް ކަމަށެވެ. ޝައްމާން އިތުރަށް ބުނީ، މުބާރާތަށް ފިލްމު ހުށަހެޅި ވަނައަކަށް އަމާޒުކޮށްގެން ނޫން ކަމަށާ، ނަމަވެސް ޖަޖުންގެ ފަރާތުން ފިލްމަށް ލިބިގެންދިޔަ ފާޑުކިޔުންތަކާއިއެކު ވަނަ ލިބޭނެ ކަމަށް އުއްމީދު ކުރި ކަމަށެވެ.

ފިލްމުގެ ސްކްރިޕްޓާއި ޑައިލޮގްތައް ތައްޔާރުކުރި އަލީ ޝާމިން ބުނީ މި ފިލްމަކީ ކުރިންވެސް ތައްޔާރުކުރަން ނިންމާފައި އޮތް ފިލްމެއް ކަމަށާ، ނަމަވެސް އޭރު ފިލްމަށް ވަކި ޑެޑްލައިނެއް ކަނޑަނާޅާ ކަމަށެވެ. ޝާމިން ބުނީ ފިލްމުގެ މަސައްކަތް އަވަސްކޮށްލީ ރާއްޖެޓީވީން ކުރު ފިލްމު މުބާރާތް އިޢުލާނުކުރުމުން ކަމަށެވެ.

ރާއްޖެޓީވީގެ ކުރު ފިލްމު މުބާރާތުގައި އެންމެ މޮޅު ފިލްމުގެ ވަނަ ލިބުނު "ސްޓޭޓަސް"އަށް ވަނީ 50،000ރ. ގެ ފައިސާގެ އިނާމެއް ދީފައެވެ. މި އިނާމު ހަވާލު ކޮށްދީފައި ވަނީ ރާއްޖެޓީވީގެ ސީއޯއޯ ހުސައިން ފިޔާޒް މޫސާއެވެ. މުބާރާތުގެ އެންމެ މޮޅު ފިލްމު ހޮވާފައި ވަނީ ޖަޖުންގެ މާރކްސްގެ 60 ޕަސެންޓް އާއި އެސްއެމްއެސްގެ 20 ޕަސެންޓް އިތުރުން ރާއްޖެއެމްވީގެ ވެބްސައިޓްގެ ރޭޓިންގްސް އިން 20 ޕަސެންޓް އިންނެވެ.