މުލިއާގެތަ ނުވަތަ ދިމްޔާތުތަ؟: މިސުވާލުގައި ވެސް ރައީސް މިހެއްދެވީ އިތުރުފުޅެއް؟

ރައީސުލްޖުމްހޫރިއްޔާ ޑރ. މުހައްމަދު މުއިއްޒަކީ ޒުވާނުންނާ ގާތް ގުޅުމެއް ބާއްވާ، ޒުވާނުންގެ އަޑުއަހާ ވެރިއެއްގެ ގޮތުގައި ދެއްކުމަށް ގިނަ މަސައްކަތްތަކެއް ކުރައްވަމުން ގެންދަވާ ބޭފުޅެކެވެ. އެގޮތުން ދާދިފަހުން ކުރިއަށް ގެންދިޔަ "އެސްޕްރެސޯ ވިތު ރައީސް" ހަރަކާތަކީ ޒުވާނުންގެ ބައެއް ސުވާލުތަކަށް ޖަވާބު ދިނުމުގެ ގޮތުން ޓީވީއަކުން ކުރިއަށް ގެންދިޔަ ޕްރޮގްރާމެކެވެ. 

މި ޕްރޮގްރާމްގެ ތެރެއިން ރައީސް ދެއްވި ބައެއް ޖަވާބުތަކާ ގުޅިގެން އަނެއްކާ ވެސް ބައެއް ކަންކަމުގައި ވަނީ ސުވާލު އުފެދިފަ އެވެ.

މި ޕްރޮގްރާމްގައި ޕްރެޒެންޓަރު ކުރި ސުވާލަކީ '' ޑޫޔޫ ޕްރެފަރ މުލިއާގެ އޯ ދިމްޔާތު؟

މި ސުވާލަގެ ޖަވާބުގައި ރައީސް ވިދާޅުވީ އެމަނިކުފާނު އަބަދުވެސް އުޅުއްވާ ހިތްވަނީ އަމިއްލަ ގެކޮޅު މ. ދިމްޔާތުގައި ކަމަށެވެ. އަދި ވެރިކަމުގެ ފުރަތަމަ ތިން މަސް ދުވަހު ދިމްޔާތުގައި ދިރިއުޅުއްވީ ވެސް މުލިއާގެއަށް ބަދަލުވާން ބޭނުންފުޅު ނުވާތީ ކަމަށް އެމަނިކުފާނު ވިދާޅުވި އެވެ. މުލިއާގެއަށް ބަދަލުވާން ޖެހުނީ ސަލާމަތީ ސަބަބުތަކަށްޓަކައި ސަލާމަތީ ބާރުތަކުން ދިން ޕްރެޝަރާ ހެދި، އެ ނޫން ގޮތެއް ނެތިގެން ކަމަށް ރައީސް ސިފަކުރެއްވި އެވެ.

އަޅުގަނޑުމެން މިހެން އުޅެފައި ހަމަ ދަމޭ ގޮސްފައި ގޭގައި މަޑުކޮށްލަން ދެން އޯވަރ ނައިޓްކޮށްލާ ހަދާލާފައި ވެސް ގެ މިސްވާތީވެ. ދެން ޒިންމާގެ ގޮތުން މަސްއޫލިއްޔަތުގެ ގޮތުން އައިސް މުލިއާގޭގައި ހުންނަނީ ހުންނަން ޖެހިގެން. ފުރަތަމަ 3 ވަރަކަށް މަސްދުވަހު ދިމްޔާތުގައި ހުރެވޭތޯ އުޅުނިން. އޭގެ ސަބަބުން ސެކިއުރިޓީ ބޭފުޅުން މައްސަލަ ޖައްސަނީ. އެބޭފުޅުންނަށް އެކަންކަން ރަނގަޅަށް ކުރަން އުދަނގޫ ވަނީ. ދެން މިހެން ގޮސް ބައިވަރު ވާހަކަތައް އައީމަ އެގޮތުން ބަދަލުވީ. ބަޓް ޔަރ ދިމްޔާތު ފޯ ޝުއަރ 

ރައީސުލްޖުމްހޫރިއްޔާ ޑރ. މުހައްމަދު މުއިއްޒު

ނަމަވެސް އޭރު ރައީސް އޮފީހުން އާންމުކުރި މައުލޫމާތުތަކަށް ބަލާއިރު ރައީސްގެ މި ވާހަކަފުޅަކީ ހަގީގަތާ ހިލާފު، ކަނޑައެޅިގެން އިތުރުފުޅެއްކަން ހާމަވެ އެވެ. ވެރިކަމުގެ ފުރަތަމަ ތިން މަސް ދުވަހު ރައީސް ދިމްޔާތުގައި އުޅުއްވީ މުލިއާގެއަށް ބަދަލުވާން ބޭނުންފުޅު ނުވެގެންނެއް ނޫނެވެ. އެއީ މުލިއާގޭގައި ބޮޑެތި މަރާމާތުތަކެއް ކުރަމުންދާތީ އެވެ. ރައީސް އޮފީހުން އޭރު ބުނެފައިވާ ގޮތުގައި މުލިއާގެ މަރާމާތު ކުރުމަށް 3.6 މިލިއަން ރުފިޔާ ހަރަދުކޮށްފައިވެ އެވެ. އަދި މަރާމާތު ނިމުމުން ރައީސްގެ ދެކަނބަލުން އެގެއަށް ބަދަލުވެވަޑައިގަންނަވާނެ ކަން ވެސް އޭރު އޮތީ ކަށާވަރުކޮށްދީފަ އެވެ.

ދައުލަތުގެ ބަޖެޓުން އެތައް މިލިއަން ރުފިޔާއެއް ހަރަދުކޮށްގެން މުލިއާގެ މަރާމާތުކޮށް އެތަނަށް ބަދަލުވުމަށްފަހު، ދެ އަހަރެއްހާ ދުވަސް ފަހުން ޒުވާނުންގެ ކުރިމަތީގައި އެއީ މަޖުބޫރުވެގެން ކުރި ކަމެއްގެ ގޮތުގައި ރައީސް މިވަނީ ވާހަކަ ދައްކަވާފަ އެވެ. މިއީ ސިޔާސީ މަންފާއަކަށްޓަކައި ހަގީގަތް އޮޅުވާލުމެއް ނުންތޯ އެވެ. ދައުލަތުގެ މުދަލާއި ފައިސާ ބޭނުންކޮށްގެން ކުރާ ކަންކަމުގެ ހަގީގަތް ރައްޔިތުންނަށް އެނގެން އޮންނަ އިރު، އެކަންކަން އޮޅުވާލުމަކީ ޒިންމާދާރު ވެރިއެއްގެ ފަރާތުން ފެނިގެންވާނެ ސިފައެއް ނޫނެވެ. މުލިއާގެއަށް ކުރި ބޮޑު ހަރަދާއި، އެތަނަށް ބަދަލުވުމުގެ އަސްލު ސަބަބު ފޮރުވައި، އެއީ ސަލާމަތީ ބާރުތަކުގެ ބޯޅައަކަށް ހެއްދެވުމަކީ ސިޔާސީ ގޮތުން ހެއްދެވި ވަރަށް ބޮޑު ދޮގެއްނުންތޯ އެވެ.