އުރީދޫ ދިވެހި ޕްރިމިއާ ލީގު ނިމެންދެން އިންޑިއާ ރެފްރީން ބޭނުން ކުރަން ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމައިފި އެވެ.

ރާއްޖެއެމްވީ އަށް މައުލޫމާތު ދެއްވަމުން އެފްއޭއެމްގެ ރައީސް ބައްސާމް އަދީލް ޖަލީލު ވިދާޅުވީ، ރެފްރީންގެ މައްސަލަ އަށް ވަގުތީ ހައްލެއް ގެނައުމުގެ ގޮތުން އިންޑިއާ ރެފްރީން ބޭނުންކުރަން ފަށާފައިވާ ކަމަށާއި، ލީގު ނިމެންދެން އެ ރެފްރީން ތިބޭނެ ކަމަށެވެ.

ބައްސާމް ވިދާޅުވީ، ރެފްރީންގެ ކަންތައް ހައްލު ކުރުމަށް އެފްއޭއެމް އިން މަސައްކަތް ކުރަމުން އަންނަ ކަމަށާއި، އެގޮތުން ކަންތައްތައް ހަރުދަނާ ކުރުމަށް އޭއެފްސީއާ ގުޅިގެން ރެފްރީސް ޑައިރެކްޓަރެއް ހޯދުމުގެ މަސައްކަތް ވެސް ކުރަމުން އަންނަ ކަމަށެވެ.

އޭނާ ވިދާޅުވީ، ލީގުގެ ދެވަނަ ބުރުގައި ބޭރުގެ ރެފްރީން ބޭނުންކުރަން މީގެކުރިން ނިންމި ކަމަށާއި، އެހެން ނަމަވެސް އެކަމަށް އަވަސް ފިޔަވަޅެއް އަޅާ ފުރަތަމަ ބުރު ނުނިމެނީސް ބޭރު ރެފްރީން ބޭނުންކުރަން ޖެހުނީ ތަކުރާރުކޮށް ރާއްޖޭގެ ރެފްރީންނާ ބެހޭގޮތުން ޝަކުވާތައް އަންނަން ފެށުމުން ކަމަށެވެ.

ބައްސާމް ވިދާޅުވީ، ރެފްރީންގެ ކަންތައްތައް ހައްލުކުރުމަށް ރެފްރީސް ކޮމެޓީން ގަވައިދުތައް ހަރުދަނާކުރުމުގެ މަސައްކަތް ކުރަމުން އަންނަ ކަމަށެވެ.

ރެފްރީންގެ މައްސަލަ ފެންމަތިވާން ފެށީ ގްރީން ސްޓްރީޓް އާއި މާޒިޔާ ސްޕޯޓްސް އެންޑް ރެކްރިއޭޝަން ބައްދަލުކުރި މެޗަށް ފަހު ހިނގައިދިޔަ ކަންތައްތަކުންނެވެ. އެ މެޗުގައި ގްރީންގެ ބިދޭސީ ކުޅުންތެރިޔާ ސުބޯލް އިލިއާ މެޗުގެ 51 ވަނަ މިނެޓުގައި ރެފްރީއާ ދިމާލަށް އެއްޗެއް ބުނި ކަމަށް ބުނެ އޭނާއަށް ދެވަނަ ރީނދޫ ކާޑް ދެއްކުމާއެކު، އެކަމާ ހިތްހަމަނުޖެހިގެން ގްރީންގެ ކުޅުންތެރިން ނުރުހުން ފާޅުކުރަމުން ދަނިކޮށް ރެފްރީ ނިއުޝާދް މެޗުގެ ކުޅުން ހުއްޓާލުމަށް ފަހު ދަނޑުން ފައިބައިގެން ދިޔައެވެ. މެޗުގެ ފުރިހަމަ ވަގުތު ހަމަނުވަނީސް މެޗުގެ ކުޅުން ހުއްޓާލާފައިވާއިރު އޭރު 1-0 އަކުން ކުރީގަ އޮތީ މާޒިޔާއެވެ.

މި މެޗުގެ ފުރަތަމަ ހާފުގައި ރެފްރީކަން ކުރި އާދަމް ފަޒީލް ދެވަނަ ހާފަށް ނުކުމެފައި ނުވާއިރު ދެވަނަ ހާފުގައި ރެފްރީކަން ކުރަން ނުކުތީ މުހައްމަދު ނިއުޝާދެވެ.

މިކަމުގެ ސަބަބުން އެފްއޭމްގެ ރެފްރީސް ކޮމިޓީ އިން ވަނީ އެ ކޮމިޓީއަށް ހުށަހެޅިފައިވާ މައްސަލަތައް ބަލައި ވަކިގޮތެއް ނިމެންދެން، އެފްއޭމްގެ އެއްވެސް މުބާރާތެއްގެ މެޗެއްގައި ރެފްރީކަން ނުކުރެވޭގޮތަށް ވަގުތީގޮތުން ނައުޝާދު ސަސްޕެންޑު ކޮށްފައެވެ.

ހަމައެހެންމެ އެފްއޭމްގެ ރެފްރީސް ޑިޕާޓްމަންޓް ހިންގުން އިތުރަށް ހަރުދަނާ ކުރުމުގެ ގޮތުންނާ އެ އިދާރާގެ އިދާރީ އޮނިގަނޑު މުރާޖަޢާކޮށް އަލުން އެކުލަވާލަން ހަމަޖެހިފައިވާތީވެ، ރެފްރީސް ޑިޕާޓްމަންޓާ މިހާރު ހަވާލުވެ ހުރި އަޙްމަދު އަމީޒު ވެސް އެ މަގާމުން ވަނީ ވަކިކޮށްފައެވެ.