ރާއްޖޭގައި ޗުއްޓީ ހޭދަ ކުރަމުން ދަނިކޮށް މިޝަން އިމްޕޮސިބަލް ގެ ތަރި ރެބެކާ ފާގަސަން ބަލިވެގެން ޓޮމް ކްރޫޒަށް ގުޅައި ހެލިކޮޕްޓަރެއް ފޮނުވައިދޭން އެދެފި

ރަށެއްގައި އެކަހެރިވެފައި ހުއްޓާ ކުއްލި ގޮތަކަށް ބަލިވެއްޖެ ނަމަ، އާންމު ގޮތެއްގައި އެންމެ ފުރަތަމަ އެހީތެރިކަމަށް އެދޭނީ ޑޮކްޓަރެއްގެ ކިބައިންނެވެ. ނަމަވެސް، މަޝްހޫރު ބަތަލާ ރެބެކާ ފާގަސަން މިފަދަ ހާލަތެއް ދިމާވެގެން އެހީއަށް އެދުނީ އޭނާގެ އެކުވެރި އެކްޓަރު ޓޮމް ކްރޫޒްގެ ކިބައިންނެވެ.

"ޑޫން" އަދި އައު ފިލްމު "މާސީ" އިން ފެނިގެންދާ ރެބެކާ އާއި ޓޮމް ކްރޫޒްގެ މެދުގައި ގާތް އެކުވެރިކަމެއް އުފެދުނީ "މިޝަން އިމްޕޮސިބަލް" ފިލްމުތަކުގައި އެކުގައި މަސައްކަތް ކުރި ދުވަސްވަރު އެވެ. ރާއްޖޭ ގައި ޗުއްޓީ ހޭދަކުރަނިކޮށް ކުރިމަތިވި ސިއްހީ ކުއްލި މައްސަލައެއްގައި އޭނާ އެހީއަށް އެދުނީ މި ގާތްކަމުގެ ސަބަބުން ކަމަށް ބޭރުގެ ބައެއް މީޑިއާ ތަކުން ރިޕޯޓުކޮށްފައިވެ އެވެ.

އިނގިރޭސިވިލާތުގެ ނޫހެއް ކަމަށްވާ "ދި އިންޑިޕެންޑެންޓް" އަށް ދިން އިންޓަވިއުއެއްގައި ރެބެކާ ކިޔައިދިން ގޮތުގައި، ރާއްޖޭގައި ހުއްޓާ ބަނޑަށް ދިމާވި ބޮޑު އުނދަގުލެއްގެ ސަބަބުން އޭނާ ޓޮމް ކްރޫޒަށް ގުޅިއެވެ. "އަހަރެން އޭނާ ގާތު ބުނިން، އަހަންނަށް ހެލިކޮޕްޓަރެއް ލިބިދާނެ ހެއްޔޭ؟ އެއީ މިހާރު ވިސްނާލުމުން ވަރަށް މަޖާ ކަމެއް،" އޭނާ ބުންޏެވެ.

ރެބެކާ ބުނި ގޮތުގައި އޭނާ ބަލިވީ ބަނޑުގެ މައްސަލަ އެއް ޖެހިގެންނެވެ. އެ ވަގުތު އޭނާ ހީކުރީ ބަނޑުގައި ބޮޑު ފަންޏެއް އުޅެނީ ކަމަށް ކަމުގައި އިންޓަވިއުގައި ބުނެފައިވެ އެވެ. ބަލިވުމުން ޗުއްޓީ ހޭދަ ކުރަމުން ދިޔަ ރަށުން ފުރައިގެން ދިއުމަށް އެހީތެރިވެވޭނީ ކާކަށްތޯ އޭނާގެ ފިރިމީހާ ރޯރީ ސެއިންޓް ކްލެއާ ގާތު އެހުމުން، ފިރިމީހާ ލަފާދިނީ ޓޮމް ކްރޫޒަށް ހެލިކޮޕްޓަރެއް ހަމަޖެއްސިދާނެ ކަމަށެވެ.

"ހަގީގަތުގައި އަހަންނަށް ޖެހިފައި ހުރީ ގޭސްޓްރޯއެންޓްރައިޓިސް (ބަނޑާއި ގޮހޮރުގެ ބައްޔެއް). މިއީ ފަހަރެއްގައި މާ ގިނަ ތަފްސީލު ދެވުނީ ކަމަށް ވެދާނެ،" އޭނާ މަޖާ ރޫހެއްގައި ދި އިންޑިޕެންޑެންޓަށް ކިޔައިދިން ކަމަށް އެ ނޫހުން ރިޕޯޓު ކޮށްފައިވެ އެވެ.

އުމުރުން 42 އަހަރުގެ ސްވިޑަންގެ ތަރި ރެބެކާ ފާގަސަން އެންމެ ފުރަތަމަ "މިޝަން އިމްޕޮސިބަލް" ފްރެންޗައިޒް އާ ގުޅުނީ 2015 ވަނަ އަހަރުގެ "ރޯގް ނޭޝަން" އިންނެވެ. އޭގެ ފަހުން "ފޯލް އައުޓް" (2018) އަދި "ޑެޑް ރެކޮނިން" (2023) ގައި ވެސް އޭނާ ވަނީ އީލްސާ ފޯސްޓްގެ ރޯލު އަދާކޮށްފަ އެވެ.

އޭނާގެ އެހެން ފާހަގަކޮށްލެވޭ މަސައްކަތްތަކުގެ ތެރޭގައި "ޑޫން" ގެ ދެ އެޕިސޯޑުގެ އިތުރުން "ލައިފް" (2017)، "ޑޮކްޓަރ ސްލީޕް" (2019) އަދި ނެޓްފްލިކްސްގެ "އަ ހައުސް އޮފް ޑައިނަމައިޓް" (2025) ހިމެނެ އެވެ.

މީގެ އިތުރުން، 2023 ވަނަ އަހަރުން ފެށިގެން އޭނާ އަންނަނީ އެޕަލް ޓީވީ ޕްލަސްގެ މަގުބޫލު ސީރީޒް "ސައިލޯ" ގެ މުހިންމު ރޯލެއް އަދާކުރަމުންނެވެ. ރެބެކާގެ އައު ފިލްމު "މާސީ" ސިނަމާތަކަށް އަންނާނީ މި މަހުގެ 23 ވަނަ ދުވަހުއެވެ. މި ފިލްމުގައި އޭނާ އާ އެކު ފެނިގެން ދާނީ ކްރިސް ޕްރެޓް އެވެ.